Бу йилги Умра мавсумида 6 миллион киши зиёратни амалга оширди

Саудия Арабистони Ҳаж ишлари вазирлиги “Умра – 2014” мавсуми якунига етганлигини ва унда рекорд натижа – жами бўлиб 6 миллиондан ортиқ киши умра амалларини бажарганликларини маълум қилди, дея хабар беради Дин ишлари бўйича қўмита ахборот хизмати.

Ҳаж ишлари вазири ўринбосари Абдуллоҳ ибн Муҳаммад Марғилонийнинг сўзларига кўра, бу йилги рекорд натижага эришилишида махсус ишлаб чиқилган “Умра электрон кузатуви” дастурининг биринчи марта амалга оширилиши ҳам муҳим ўрин тутган.

Дастур воситасида бутун жаҳондан келаётган зиёратчилар, яъни умра зиёратига келаётган шахслар, ва уларга хизмат кўрсатаётган ходимлар учун қатор қулайликлар яратилган. Жумладан, умра зиёрати учун келиб тушаётган аризаларни кўриб чиқиш анча енгиллашган. Шунингдек, Маккаи Мукаррама ва Мадинаи Мунавварадаги хизматчилар учун бутун жаҳондан умрага келаётган миллионлаб кишиларни кутиб олиш ва уларни белгиланган меҳмонхоналарга тезлик билан жойлаштириш, зарурий электрон мониторинг ишларини амалга ошириш имконияти яратилди. Бу ўз навбатида, аэропортлардаги тирбандликларнинг ҳам сезиларли даражада камайишига хизмат қилди.

“Умра электрон кузатуви” дастурининг янада такомиллаштирилиши ва кейинги мавсумларда ҳам ундан унумли фойдаланилиши айтилмоқда.

* * *

Saudiya Arabistoni Haj ishlari vazirligi “Umra – 2014” mavsumi yakuniga yetganligini va unda rekord natija – jami bo‘lib 6 milliondan ortiq kishi umra amallarini bajarganliklarini ma’lum qildi, deya xabar beradi Din ishlari bo‘yicha qo‘mita axborot xizmati.

Haj ishlari vaziri o‘rinbosari Abdulloh ibn Muhammad Marg‘iloniyning so‘zlariga ko‘ra, bu yilgi rekord natijaga erishilishida maxsus ishlab chiqilgan “Umra elektron kuzatuvi” dasturining birinchi marta amalga oshirilishi ham muhim o‘rin tutgan.

Dastur vositasida butun jahondan kelayotgan ziyoratchilar, ya’ni umra ziyoratiga kelayotgan shaxslar, va ularga xizmat ko‘rsatayotgan xodimlar uchun qator qulayliklar yaratilgan. Jumladan, umra ziyorati uchun kelib tushayotgan arizalarni ko‘rib chiqish ancha yengillashgan. Shuningdek, Makkai Mukarrama va Madinai Munavvaradagi xizmatchilar uchun butun jahondan umraga kelayotgan millionlab kishilarni kutib olish va ularni belgilangan mehmonxonalarga tezlik bilan joylashtirish, zaruriy elektron monitoring ishlarini amalga oshirish imkoniyati yaratildi. Bu o‘z navbatida, aeroportlardagi tirbandliklarning ham sezilarli darajada kamayishiga xizmat qildi.

“Umra elektron kuzatuvi” dasturining yanada takomillashtirilishi va keyingi mavsumlarda ham undan unumli foydalanilishi aytilmoqda.

• Олдинги
• Кейинги