Ўзбекистонлик зиёратчиларнинг дастлабки гуруҳи Ҳаж сафарига жўнаб кетди

Рукн: Янгиликлар Чоп этилган: 10.10.2012

7 октябр куни Ҳаж сафари учун бир гуруҳ юртдошларимиз Саудия Арабистонига жўнаб кетишди. “Ўзбекистон ҳаво йўллари” миллий авиакомпаниясининг Тошкент-Мадина йўналиши бўйича пойтахтимиздаги халқаро аэропортдан йўлга чиққан ҳаво лайнерида дастлабки зиёратчилар Мадинаи мунавварага эсон-омон етиб олдилар.

Тошкент шаҳридан Муборак сафарга отланган зиёратчиларга врачлар, ҳожиларга хизматда бўладиган ишчи гуруҳ вакиллари ҳамда ошпазлар ҳамроҳлик қилдилар.

Зиёратчиларга сафар олдидан Давлат рамзлари туширилган махсус кийим (камзул) ва сумкалар, "Ҳажнома" китобчаси ва ҳаж арконларини ёритиб берувчи видеодастур тақдим этилди.

Ўзбекистон Республикаси Вазирлар Маҳкамаси ҳузуридаги Дин ишлари бўйича қўмита ма‘лумотига кўра, зиёратчиларимиз Мадинадаги “Ал-Масжидун набавий”дан 20-30 метр узоқликдаги “Аброж ат-Тоййиба” меҳмонхонасида туришади. Маккаи мукаррамада эса “Аброж ал-Муҳаммадия” меҳмонхонасида истиқомат қилишади.

Меҳмонхоналарда минишифохона ташкил этилиб, тиббиёт ходимларининг узлуксиз навбатчилиги ташкил этилади. Ўзбекистонлик ҳожиларнинг янада шароитини яхшилаш мақсадида бу йилдан меҳмонхонада 2 000 кишига бир вақтнинг ўзида овқатланиш имкониятига эга бўлган махсус ошхона барпо этилиб, ҳожиларга узлуксиз 24 соат давомида иссиқ чой, замзам суви ва ҳўл мевалар билан таъминлаш хизмати йўлга қўйилади. Зиёратчиларни “Ҳарами шариф”га олиб бориш учун автобуслар ҳаракати, узлуксиз йўлга қўйилади.

Шунингдек, зиёратчилар учун Саудиядаги меҳмонхоналарда сунъий йўлдош орқали Ўзбекистон телевиденияси дастурларини томоша қилиш, Ватанимизда бўлаётган воқеалардан хабардор бўлиш имкониятлари яратилган.

Ҳожиларимиз зиёратни Мадинаи мунаввардан бошлаб, 3 кеча ва 4 кун у ерда туриб, сўнг асосий Ҳаж амалларини бажариш мақсадида Маккаи Мукаррамага йўл олишади.

Бўлғуси ҳожиларимизга қулайлик яратиш мақсадида Бухоро-Мадина, Наманган-Мадина, Самарқанд-Мадина, Термиз-Мадина, Урганч-Мадина, Қарши-Мадина йўналишларида ҳам халқаро рейслар ташкил этилди.

Бу йил Ўзбекистондан 5000 киши ҳаж зиёратига боради. Шунингдек, жотий йилда 6000 дан зийод фуқароларимиз Умра зиёратини бажаришга муваффақ бўлдилар.

* * *

7-oktabr kuni Haj safari uchun bir guruh yurtdoshlarimiz Saudiya Arabistoniga jo‘nab ketishdi. “O‘zbekiston havo yo‘llari” milliy aviakompaniyasining Toshkent-Madina yo‘nalishi bo‘yicha poytaxtimizdagi xalqaro aeroportdan yo‘lga chiqqan havo laynerida dastlabki ziyoratchilar Madinai munavvaraga eson-omon yetib oldilar.

Toshkent shahridan Muborak safarga otlangan ziyoratchilarga vrachlar, hojilarga xizmatda bo‘ladigan ishchi guruh vakillari hamda oshpazlar hamrohlik qildilar.

Ziyoratchilarga safar oldidan Davlat ramzlari tushirilgan maxsus kiyim (kamzul) va sumkalar, "Hajnoma" kitobchasi va haj arkonlarini yoritib beruvchi videodastur taqdim etildi.

O‘zbekiston Respublikasi Vazirlar Mahkamasi huzuridagi Din ishlari bo’yicha qo’mita ma‘lumotiga ko‘ra, ziyoratchilarimiz Madinadagi “Al-Masjidun nabaviy”dan 20-30 metr uzoqlikdagi “Abroj at-Toyyiba” mehmonxonasida turishadi. Makkai mukarramada esa “Abroj al-Muhammadiya” mehmonxonasida istiqomat qilishadi.

Mehmonxonalarda minishifoxona tashkil etilib, tibbiyot xodimlarining uzluksiz navbatchiligi tashkil etiladi. O’zbekistonlik hojilarning yanada sharoitini yaxshilash maqsadida bu yildan mehmonxonada 2 000 kishiga bir vaqtning o’zida ovqatlanish imkoniyatiga ega bo’lgan maxsus oshxona barpo etilib, hojilarga uzluksiz 24 soat davomida issiq choy, zamzam suvi va ho’l mevalar bilan ta’minlash xizmati yo’lga qo’yiladi. Ziyoratchilarni “Harami sharif”ga olib borish uchun avtobuslar harakati, uzluksiz yo’lga qo’yiladi.

Shuningdek, ziyoratchilar uchun Saudiyadagi mehmonxonalarda sun’iy yo’ldosh orqali O’zbekiston televideniyasi dasturlarini tomosha qilish, Vatanimizda bo’layotgan voqealardan xabardor bo’lish imkoniyatlari yaratilgan.

Hojilarimiz ziyoratni Madinai munavvardan boshlab, 3 kecha va 4 kun u yerda turib, so‘ng asosiy Haj amallarini bajarish maqsadida Makkai Mukarramaga yo‘l olishadi.

Bo‘lg‘usi hojilarimizga qulaylik yaratish maqsadida Buxoro-Madina, Namangan-Madina, Samarqand-Madina, Termiz-Madina, Urganch-Madina, Qarshi-Madina yo‘nalishlarida ham xalqaro reyslar tashkil etildi.

Bu yil O‘zbekistondan 5000 kishi haj ziyoratiga boradi. Shunigdek, jotiy yilda 6000 dan ziyod fuqarolarimiz Umra ziyoratini bajarishga muvaffaq bo’ldilar.