Ўзбекистонлик зиёратчилар Умра сафарига жўнаб кетишди

Рукн: Янгиликлар Чоп этилган: 04.08.2012

Жорий йилнинг 30 июлидан 14 август кунига қадар Ўзбекистонлик зиёратчиларни Рамазон ойидаги (2-босқич) умра сафарига юбориш режалаштирилган, дея хабар беради Ўзбекистон Республикаси Вазирлар Маҳкамаси қошидаги Дин ишлари бўйича қўмита Ахборот хизмати. Ўзбекистонлик зиёратчиларнинг 170 нафардан иборат дастлабки гуруҳи Умра сафарига жўнаб кетишди.

Зиёратчилар Макка ва Мадина шаҳрида умра ибодатларини адо этадилар. Зиёрат 10 кунни ташкил этади (Мадинада 4 кун, Маккада 5 кун, Жиддада 1 кун). Ўзбекистонлик зиёратчиларни жойлаштириш учун Мадина шаҳрида “Масжиди набавий”дан 25 метр масофада жойлашган тўрт юлдузли “Марказ ат-Тоййиба” меҳмонхонаси, Макка шаҳрида эса “Ҳарам масжиди”дан 1000 метр узоқликдаги “Марказ ал- Мавадда” меҳмонхонаси тайёрлаб қўйилган. Зиёратчилар ибодати, овқатланиши (ифторлик, саҳарлик), уларга тиббий хизмат кўрсатиш, кузатиш ва кутиб олиш бўйича барча шароитлар яратилган. Умра зиёратидан фуқароларимизнинг қайтиши 9 август кунидан 25 август кунига қадар амалга оширилади.

Зиёратчиларнинг Тошкент аэропортидан кузатиш тадбирлари Дин ишлари бўйича қўмита, Ўзбекистон мусулмонлари идораси, мутасадди вазирликлар ва идоралар ходимлари (Умра ишчи гуруҳи) билан биргаликда уюшган ҳолда амалга оширилмоқда. Рамазон умра зиёратида жами 2000 нафар фуқароларимизнинг (Тошкент – Жидда – Тошкент йўналиши бўйича 10 та чартер рейсида) сафарлари ташкил этилади. Умра сафари давомида зиёратчиларга 2 нафар ишчи гуруҳ, 10 нафар шифокор ва 2 нафар ошпаз хизмат кўрсатади.

Ушбу умра мавсуми Рамазон ойи - ёзнинг жазирама иссиғига тўғри келишини ҳисобга олган ҳолда, ёши катта, кекса зиёратчилар орасидан сурункали касаллик билан касалланган кишиларга эҳтиёт чораларини кўриш бўйича тавсиялар берилмоқда. Мазкур масалада Соғлиқни сақлаш вазирлиги вакиллари ҳамкорлигида йўриқнома ишлаб чиқилган ва барча зиёратчиларга тарқатилган.

Шунингдек, Саудия Арабистонида об-ҳаво ва иқлим шароитини кескин исиб кетиши натижасида Саудия метрология ва атроф-муҳитни муҳофаза қилиш агентлигининг берган расмий баёнотига кўра, зиёратчилар мавсум даврида муайян вақтларда очиқ ҳудудларда ҳаракат қилмасликлари ҳақида тушунтирилмоқда. Шу боис, ўзбекистонлик зиёратчилар орасида кекса ва сурункали касалликлар билан оғриган фуқароларга ёзнинг иссиқлиги таъсир қилиш эҳтимоли бўлса, рўзасини очиши мумкинлиги юзасидан Ўзбекистон мусулмонлари идораси Уламолар кенгаши тавсияси тушунтириб борилмоқда.

Зиёратчилар учун Саудиядаги меҳмонхоналарда сунъий йўлдош орқали Ўзбекистон телевидениясининг дастурларини томоша қилиб, Ватанимизда бўлаётган воқеалардан хабардор бўлиш имконияти яратилган. Шу билан бирга, сафар мобайнида фуқароларимиз Макка ва Мадина шаҳарларидаги тарихий жойларни зиёрат қилишга муяссар бўладилар. Умра зиёратчиларини Жидда аэропортида кутиб олиш, кузатиш ва уларга қулай шароитлар яратиш ишлари Президентимиз Қарори асосида Жиддадаги Бош консулликда жорий этилган Ҳаж ва умра масалалари бўйича атташе томонидан ташкил этилмоқда.

* * *

Joriy yilning 30 iyulidan 14 avgust kuniga qadar O’zbekistonlik ziyoratchilarni Ramazon oyidagi (2-bosqich) umra safariga yuborish rejalashtirilgan, deya xabar beradi O‘zbekiston Respublikasi Vazirlar Mahkamasi qoshidagi Din ishlari bo’yicha qo’mita Axborot xizmati. O’zbekistonlik ziyoratchilarning 170 nafardan iborat dastlabki guruhi Umra safariga jo‘nab ketishdi.

Ziyoratchilar Makka va Madina shahrida umra ibodatlarini ado etadilar. Ziyorat 10 kunni tashkil etadi (Madinada 4 kun, Makkada 5 kun, Jiddada 1 kun). O’zbekistonlik ziyoratchilarni joylashtirish uchun Madina shahrida “Masjidi nabaviy”dan 25 metr masofada joylashgan to’rt yulduzli “Markaz at-Toyyiba” mehmonxonasi, Makka shahrida esa “Haram masjidi”dan 1000 metr uzoqlikdagi “Markaz al- Mavadda” mehmonxonasi tayyorlab qo’yilgan. Ziyoratchilar ibodati, ovqatlanishi (iftorlik, saharlik), ularga tibbiy xizmat ko’rsatish, kuzatish va kutib olish bo’yicha barcha sharoitlar yaratilgan. Umra ziyoratidan fuqarolarimizning qaytishi 9 avgust kunidan 25 avgust kuniga qadar amalga oshiriladi.

Ziyoratchilarning Toshkent aeroportidan kuzatish tadbirlari Din ishlari bo’yicha qo’mita, O’zbekiston musulmonlari idorasi, mutasaddi vazirliklar va idoralar xodimlari (Umra ishchi guruhi) bilan birgalikda uyushgan holda amalga oshirilmoqda. Ramazon umra ziyoratida jami 2000 nafar fuqarolarimizning (Toshkent – Jidda – Toshkent yo’nalishi bo’yicha 10 ta charter reysida) safarlari tashkil etiladi. Umra safari davomida ziyoratchilarga 2 nafar ishchi guruh, 10 nafar shifokor va 2 nafar oshpaz xizmat ko’rsatadi.

Ushbu umra mavsumi Ramazon oyi - yozning jazirama issig`iga to’g`ri kelishini hisobga olgan holda, yoshi katta, keksa ziyoratchilar orasidan surunkali kasallik bilan kasallangan kishilarga ehtiyot choralarini ko’rish bo’yicha tavsiyalar berilmoqda. Mazkur masalada Sog`liqni saqlash vazirligi vakillari hamkorligida yo’riqnoma ishlab chiqilgan va barcha ziyoratchilarga tarqatilgan.

Shuningdek, Saudiya Arabistonida ob-havo va iqlim sharoitini keskin isib ketishi natijasida Saudiya metrologiya va atrof-muhitni muhofaza qilish agentligining bergan rasmiy bayonotiga ko’ra, ziyoratchilar mavsum davrida muayyan vaqtlarda ochiq hududlarda harakat qilmasliklari haqida tushuntirilmoqda. Shu bois, o’zbekistonlik ziyoratchilar orasida keksa va surunkali kasalliklar bilan og`rigan fuqarolarga yozning issiqligi ta’sir qilish ehtimoli bo’lsa, ro’zasini ochishi mumkinligi yuzasidan O’zbekiston musulmonlari idorasi Ulamolar kengashi tavsiyasi tushuntirib borilmoqda.

Ziyoratchilar uchun Saudiyadagi mehmonxonalarda sun’iy yo’ldosh orqali O’zbekiston televideniyasining dasturlarini tomosha qilib, Vatanimizda bo’layotgan voqealardan xabardor bo’lish imkoniyati yaratilgan. Shu bilan birga, safar mobaynida fuqarolarimiz Makka va Madina shaharlaridagi tarixiy joylarni ziyorat qilishga muyassar bo’ladilar. Umra ziyoratchilarini Jidda aeroportida kutib olish, kuzatish va ularga qulay sharoitlar yaratish ishlari Prezidentimiz Qarori asosida Jiddadagi Bosh konsullikda joriy etilgan Haj va umra masalalari bo’yicha attashe tomonidan tashkil etilmoqda.