Ўзбек имоми Масжидул Ҳарамда иш бошлади

Рукн: Янгиликлар Чоп этилган: 07.07.2015

Рамазоннинг 20-кечаси Маккаи мукаррамадаги Масжидул Ҳарамда ўқилган таровиҳ намозининг дастлабки ўн ракатига асл миллати ўзбек бўлган Шайх Ҳасан бин Абдулҳамид Бухорий имомлик қилди. Шайх Бухорийга унинг шогирди, асли ўзбек Шайх Аҳмад Юнус Хўжа таблиғчилик қилди (таблиғ – ҳарамайнда имомдан сўнг такбирни такрорлаш).

Масжидул Ҳарам устози бўлган доктор Ҳасан Абдулҳамид Бухорий Маккадаги Уммул-Қурро Университети уламолари кенгашининг аъзосидир. У Уммул-Қурро Университетида шариат ва фиҳқдан таълим олган, 2008 йилдан шу олийгоҳнинг доктори. Доктор Бухорий “Иқтисодий бойкотнинг ҳуқуқий асослари” китоби муаллифи.

Тасдиқланмаган турли норасмий маълумотларга кўра, Саудия Арабистонида 300 000 дан 1 000 000 гача ўзбеклар истиқомат қилишади (уларни туркистонлилар, бухорийлар деб ҳам аташади). Улар асосан Макка, Мадина, Жидда ва Тоиф шаҳарларида ерлашишган.

Россия босқини, қатағонлар сабаб ўзбеклар Саудия Арабистонига ўтган асрнинг бошларидан кела бошлашган. Афғонистонга рус қўшинлар кириши оқибатида ҳам кўплаб ўзбек оилалари Саудия Арабистонидан бошпана топишган.

* * *

Ramazonning 20-kechasi Makkai mukarramadagi Masjidul Haramda o‘qilgan tarovih namozining dastlabki o‘n rakatiga asl millati o‘zbek bo‘lgan Shayx Hasan bin Abdulhamid Buxoriy imomlik qildi. Shayx Buxoriyga uning shogirdi, asli o‘zbek Shayx Ahmad Yunus Xo‘ja tablig‘chilik qildi (tablig‘ – haramaynda imomdan so‘ng takbirni takrorlash).

Masjidul Haram ustozi bo‘lgan doktor Hasan Abdulhamid Buxoriy Makkadagi Ummul-Qurro Universiteti ulamolari kengashining a’zosidir. U Ummul-Qurro Universitetida shariat va fihqdan ta’lim olgan, 2008 yildan shu oliygohning doktori. Doktor Buxoriy “Iqtisodiy boykotning huquqiy asoslari” kitobi muallifi.

Tasdiqlanmagan turli norasmiy ma’lumotlarga ko‘ra, Saudiya Arabistonida 300 000 dan 1 000 000 gacha o‘zbeklar istiqomat qilishadi (ularni turkistonlilar, buxoriylar deb ham atashadi). Ular asosan Makka, Madina, Jidda va Toif shaharlarida yerlashishgan.

Rossiya bosqini, qatag‘onlar sabab o‘zbeklar Saudiya Arabistoniga o‘tgan asrning boshlaridan kela boshlashgan. Afg‘onistonga rus qo‘shinlar kirishi oqibatida ham ko‘plab o‘zbek oilalari Saudiya Arabistonidan boshpana topishgan.