Бутун дунё уламолари Шайх Муҳаммад Содиқ Муҳаммад Юсуф вафотлари муносабати билан таъзиянома йўлламоқдалар

Рукн: Янгиликлар Чоп этилган: 14.03.2015

Islom.uz порталида Шайх Муҳаммад Содиқ Муҳаммад Юсуф вафотлари муносабати билан йўлланган таъзияномалар эълон қилинмоқда.

Бутун Дунё Уламолари Кенгаши уюшмасининг таъзияномасида “Шубҳасиз, бугун Ислом уммати раббоний олим ва муаллимларидан бирини йўқотди. Албатта, фазилатли шайх раҳимаҳуллоҳ ҳозирги замон мусулмонларининг буюк олимларидан саналарди. Фазилатли шайх раҳимаҳуллоҳ покиза исломий таълимни тарқатишга, диний саводсизликнинг барҳам топишига ва бағрикенглик, биродарлик руҳининг ёйилишига ғоятда ҳарис эдилар ва бу йўлда жуда катта ва унутилмас ишларни амалга оширишга муваффақ бўлган ҳам эдилар”, дейилади.

Қозоғистон мусулмонлари диний идораси раиси, Бош муфтий Ержан ҳожи Малғажи ўғли Ислом оламининг уламоси, муфтий, устоз шайх Муҳаммад Содиқ Муҳаммад Юсуф вафоти муносабати билан Ўзбекистон мусулмонлари диний идораси раиси Усмонхон Алимовга, марҳумнинг қариндошларига таъзия изҳор қилинган мактубини йўллади.

"Мудҳиш хабар бизнинг ҳам жонимизга оғир ботди. Ўзимнинг ҳамда Қозоғистон мусулмонлари диний бошқармаси номидан Сизга, марҳумнинг қариндошларига таъзия изҳор қиламан.... Шайх Муҳаммад Содиқ Муҳаммад Юсуф бутун умрини илм излаш, шогирд тарбиялаш, китоб ёзиш билан ўтказди. Унинг тарбиялаган шогирдлари билан дин соҳасида қилган меҳнатлари асл динимиз Ислом ривожига ҳисса қўшажак", дейилган таъзия мактубида.

Ямандаги Тарим Ислом институтининг мударриси, Брюсселдаги Европа Ислом маданияти академияси ҳомийлик кенгашининг аъзоси, Таба фондининг бош директори, Уммондаги «Ал-Байт лил фикрил исламий» фондининг аъзоси Ҳабиб Алий Жифрий таъзия мактубида “Бу зот замонамизнинг буюк олимларидан эдилар. Ўзбек халқининг диний саводини кўтаришда муҳим ўрин тутган эдилар. Кўплаб ғоятда манфаатли китобларни талиф қилган эдилар. Ҳатто, эшитишимча, у зот Қуръони каримнинг таржимаси ва тафсири ўлароқ таълиф этган ўзбек тилидаги «Тафсири Ҳилол» китобини кўпчилик қизлар ўзларининг маҳрлари учун тайин қилишган экан” дейилади.

* * *

Islom.uz portalida Shayx Muhammad Sodiq Muhammad Yusuf vafotlari munosabati bilan yo‘llangan ta’ziyanomalar e’lon qilinmoqda.

Butun Dunyo Ulamolari Kengashi uyushmasining ta’ziyanomasida “Shubhasiz, bugun Islom ummati rabboniy olim va muallimlaridan birini yo‘qotdi. Albatta, fazilatli shayx rahimahulloh hozirgi zamon musulmonlarining buyuk olimlaridan sanalardi. Fazilatli shayx rahimahulloh pokiza islomiy ta’limni tarqatishga, diniy savodsizlikning barham topishiga va bag‘rikenglik, birodarlik ruhining yoyilishiga g‘oyatda haris edilar va bu yo‘lda juda katta va unutilmas ishlarni amalga oshirishga muvaffaq bo‘lgan ham edilar”, deyiladi.

Qozog‘iston musulmonlari diniy idorasi raisi, Bosh muftiy Yerjan hoji Malg‘aji o‘g‘li Islom olamining ulamosi, muftiy, ustoz shayx Muhammad Sodiq Muhammad Yusuf vafoti munosabati bilan O‘zbekiston musulmonlari diniy idorasi raisi Usmonxon Alimovga, marhumning qarindoshlariga ta’ziya izhor qilingan maktubini yo‘lladi.

"Mudhish xabar bizning ham jonimizga og‘ir botdi. O‘zimning hamda Qozog‘iston musulmonlari diniy boshqarmasi nomidan Sizga, marhumning qarindoshlariga ta’ziya izhor qilaman.... Shayx Muhammad Sodiq Muhammad Yusuf butun umrini ilm izlash, shogird tarbiyalash, kitob yozish bilan o‘tkazdi. Uning tarbiyalagan shogirdlari bilan din sohasida qilgan mehnatlari asl dinimiz Islom rivojiga hissa qo‘shajak", deyilgan ta’ziya maktubida.

Yamandagi Tarim Islom institutining mudarrisi, Bryusseldagi Yevropa Islom madaniyati akademiyasi homiylik kengashining a’zosi, Taba fondining bosh direktori, Ummondagi «Al-Bayt lil fikril islamiy» fondining a’zosi Habib Aliy Jifriy ta’ziya maktubida “Bu zot zamonamizning buyuk olimlaridan edilar. O‘zbek xalqining diniy savodini ko‘tarishda muhim o‘rin tutgan edilar. Ko‘plab g‘oyatda manfaatli kitoblarni talif qilgan edilar. Hatto, eshitishimcha, u zot Qur’oni karimning tarjimasi va tafsiri o‘laroq ta’lif etgan o‘zbek tilidagi «Tafsiri Hilol» kitobini ko‘pchilik qizlar o‘zlarining mahrlari uchun tayin qilishgan ekan” deyiladi.