Рамазон мавсумида Ўзбекистондан 670 нафар зиёратчилар Умра сафарига борадилар

Дин ишлари бўйича қўмита Ахборот хизматининг хабар беришича, жорий йилнинг 19-20 июнь кунлари Тошкент Ислом институтининг мажлислар залида “Умра-2014” Рамазон мавсумини намунали ташкил этиш  бўйича йиғилиш бўлиб ўтди.  Йиғилишда Дин ишлари бўйича қўмита, Ўзбекистон мусулмонлари идораси, Соғлиқни сақлаш вазирлиги ходимлари ва гуруҳ раҳбарлари (эллик бошилар) иштирок этдилар. Йиғилишда умра зиёратчиларига ҳар томонлама шарт-шароитлар яратиш мақсадида керакли кўрсатмалар берилди. Шунингдек, гуруҳ раҳбарлари умра зиёратчилари учун тайёрланган араб тили бўйича қўлланма ҳамда Саудия Арабистони Подшоҳлигидаги тартиб-қоидалар  билан таништирилди.

 

Жорий йилда мамлакатимиздан баҳор ва Рамазон мавсумларида 6400 нафар фуқаро умра сафарига юборилиши мўлжалланган эди. Шулардан 5730 нафари баҳор қолган, 670 нафари (куннинг жуда исиб кетишини ҳисобга олиб) Рамазон мавсумида юборилиши белгиланди. Ҳозирги кунда 670 нафар зиёратчилар ҳужжатлари Саудия Арабистонининг Тошкентдаги элчихонасига расмийлаштириш учун киритилмоқда.

 

Жорий йилда ўзбекистонлик зиёратчилар яшашлари учун Мадина шаҳрида “Масжид ан-Набавий” билан ёнма-ён жойлашган “Нур Мавадда”, Макка шаҳрида эса Ҳарамдан 1500-2000 метр узоқликдаги “Нама Мавадда” меҳмонхоналари ижарага олинган (бугунги кунда Макка ва Мадина шаҳарларида қайта қуриш ишлари кенг кўламда давом этаётганлиги боис Макка харами атрофидаги барча меҳмонхоналар бузилмоқда).

 

Фуқароларимизга қулайликлар яратиш мақсадида уч маҳал овқатланишлари учун меҳмонхоналарнинг ўзида ошхона ташкил этилади. Меҳмонхоналарда ҳожиларимиз еб-ичишлари учун 24 соат давомида иссиқ чой, ҳар бир қаватда зам-зам сувлари ҳамда ҳўл мевалар бурчаги ташкил этилади.

 

Фуқароларимиз соғликларини доимий назорат қилиб туриш мақсадида меҳмонхоналарда минишифохона фаолияти йўлга қўйилган бўлиб, зиёратчиларимиз доимий равишда кундузги ва тунги кўриклардан ўтказиб туриладилар.

 

Зиёратчиларимиз учун Саудиядаги меҳмонхоналарда сунъий йўлдош орқали Ўзбекистон телевиденияси дастурларини томоша қилиш, Ватанимизда бўлаётган воқеалардан хабардор бўлиш имкониятлари яратилади.

 

Ҳожиларимизни Саудия Арабистонида кутиб олиш, кузатиш ва уларга қулай шароитлар яратиш ишлари Жиддадаги Бош консуллик таркибида жорий этилган “Ҳаж” ва “Умра” масалалари бўйича атташе билан ҳамкорликда ташкил этилиши айтиб ўтилди.

 

* * *

 

Din ishlari bo‘yicha qo‘mita Axborot xizmatining xabar berishicha, joriy yilning 19-20 iyun kunlari Toshkent Islom institutining majlislar zalida “Umra-2014” Ramazon mavsumini namunali tashkil etish  bo‘yicha yig‘ilish bo‘lib o‘tdi.  Yig‘ilishda Din ishlari bo‘yicha qo‘mita, O‘zbekiston musulmonlari idorasi, Sog‘liqni saqlash vazirligi xodimlari va guruh rahbarlari (ellik boshilar) ishtirok etdilar. Yig‘ilishda umra ziyoratchilariga har tomonlama shart-sharoitlar yaratish maqsadida kerakli ko‘rsatmalar berildi. Shuningdek, guruh rahbarlari umra ziyoratchilari uchun tayyorlangan arab tili bo‘yicha qo‘llanma hamda Saudiya Arabistoni Podshohligidagi tartib-qoidalar  bilan tanishtirildi.

 

Joriy yilda mamlakatimizdan bahor va Ramazon mavsumlarida 6400 nafar fuqaro umra safariga yuborilishi mo‘ljallangan edi. Shulardan 5730 nafari bahor qolgan, 670 nafari (kunning juda isib ketishini hisobga olib) Ramazon mavsumida yuborilishi belgilandi. Hozirgi kunda 670 nafar ziyoratchilar hujjatlari Saudiya Arabistonining Toshkentdagi elchixonasiga rasmiylashtirish uchun kiritilmoqda.

 

Joriy yilda o‘zbekistonlik ziyoratchilar yashashlari uchun Madina shahrida “Masjid an-Nabaviy” bilan yonma-yon joylashgan “Nur Mavadda”, Makka shahrida esa Haramdan 1500-2000 metr uzoqlikdagi “Nama Mavadda” mehmonxonalari ijaraga olingan (bugungi kunda Makka va Madina shaharlarida qayta qurish ishlari keng ko‘lamda davom etayotganligi bois Makka xarami atrofidagi barcha mehmonxonalar buzilmoqda).

 

Fuqarolarimizga qulayliklar yaratish maqsadida uch mahal ovqatlanishlari uchun mehmonxonalarning o‘zida oshxona tashkil etiladi. Mehmonxonalarda hojilarimiz yeb-ichishlari uchun 24 soat davomida issiq choy, har bir qavatda zam-zam suvlari hamda ho‘l mevalar burchagi tashkil etiladi.

 

Fuqarolarimiz sog‘liklarini doimiy nazorat qilib turish maqsadida mehmonxonalarda minishifoxona faoliyati yo‘lga qo‘yilgan bo‘lib, ziyoratchilarimiz doimiy ravishda kunduzgi va tungi ko‘riklardan o‘tkazib turiladilar.

 

Ziyoratchilarimiz uchun Saudiyadagi mehmonxonalarda sun’iy yo‘ldosh orqali O‘zbekiston televideniyasi dasturlarini tomosha qilish, Vatanimizda bo‘layotgan voqealardan xabardor bo‘lish imkoniyatlari yaratiladi.

 

Hojilarimizni Saudiya Arabistonida kutib olish, kuzatish va ularga qulay sharoitlar yaratish ishlari Jiddadagi Bosh konsullik tarkibida joriy etilgan “Haj” va “Umra” masalalari bo‘yicha attashe bilan hamkorlikda tashkil etilishi aytib o‘tildi.