Ўзбекистонлик зиёратчилар муқаддас тупроқларда

Дин ишлари бўйича қўмита Ахборот хизматининг хабар қилишича,  бугунги кун ҳолатига кўра Мадинаи Мунавварада 1272 та, Маккаи Мукаррамада эса 1500 та зиёратчилар “Солиҳийя” меҳмонхонасига жойлашиб, ўз ибодатларини  адо этмоқдалар. 

 

Юртдошларимиз Тошкентдан замонавий Боинг авиалайнерларида исломнинг муқаддас шаҳарларидан бири ҳисобланган Мадинаи Мунавварага етиб келмоқдалар. Аэропортда зиёратчиларимизни ишчи гуруҳ вакиллари кутиб олиб, махсус автобусларда Пайғамбаримиз (а.с.)нинг масжидлари ҳисобланган Масжиди Набавийнинг ёнгинасидаги “Ажниҳа тайиба” меҳмонхонасига олиб келиб жойлаштиришмоқда.

 

8 октябрга қадар ўзбекистонлик 5200 нафар зиёратчини (зиёратчиларга хизмат кўрсатиш учун ишчи, тиббий ва ошпазлар гуруҳлари) “Ўзбекистон ҳаво йўллари” Миллий авиакомпаниясининг Тошкент-Мадина, Бухоро-Мадина, Наманган-Мадина, Самарқанд-Мадина, Термиз-Мадина, Урганч-Мадина ҳамда Қарши-Мадина йўналишларида ҳаж сафарига жўнатиш режалаштирилган. Кузатиш ва кутиб олиш тадбирлари Дин ишлари бўйича қўмита, Ўзбекистон мусулмонлари идораси, мутасадди вазирлик ва идоралар ҳамкорлигида амалга оширилмоқда.

 

Зиёратчиларга сафардан олдин Давлат рамзи туширилган махсус кийим (камзул) ва сумкалар, "Ҳажнома" китобчаси ва видеотасмалар тақдим этилди. Барча зиёратчилар марказлашган тиббий пунктларида миненгит ва гриппга қарши зардоб билан эмланди. Саудия Арабистонида ҳаво ҳароратининг юқори даражада бўлиши кузатилаётганлигини инобатга олиб, шифокорлар гуруҳи томонидан зиёратчиларнинг саломатлигини сақлаш мақсадида эслатма-тавсиялар ишлаб чиқилиб, тегишли тушунтириш ишлари олиб борилди.

 

Ўзбекистонлик  зиёратчилар учун Мадина шаҳрида "Масжид ан-Набавий"дан 15 метр масофада жойлашган "Аброж ат-Тоййиба" меҳмонхонаси, Макка шаҳрида эса Ҳарамдан 4500-5000 метр узоқликдаги тўрт юлдузли 5200 сиғимга эга "Солиҳийя" меҳмонхонаси тайёрланган.

 

Зиёратчилар Мадина шаҳрида 3 кеча - 4 кундуз бўлиб, бу ердаги Масжиди Қубо, Масжиди Қиблатайн, Уҳуд тоғи, Шаҳидлар қабристони каби муқаддас қадамжоларни зиёрат қилгандан сўнг Макка шаҳрига йўл оладилар. Зиёратчиларга мавсум давомида ўзбекистонлик 30 нафардан иборат ишчи гуруҳи, 30 нафар шифокор ва 10 нафар ошпаз хизмат кўрсатади.

 

Жорий йилнинг ноябр ойи давомида ўзбекистонлик ҳожиларни "Ўзбекистон ҳаво йўллари" Миллий авиакомпанияси самолётларида Жидда-Тошкент, Жидда-Бухоро, Жидда-Наманган, Жидда-Самарқанд, Жидда-Термиз, Жидда-Урганч ҳамда Жидда-Қарши йўналишлари бўйича Ватанга олиб келиш режалаштирилган.

 

* * *

 

Din ishlari bo‘yicha qo‘mita Axborot xizmatining xabar qilishicha,  bugungi kun holatiga ko‘ra Madinai Munavvarada 1272 ta, Makkai Mukarramada esa 1500 ta ziyoratchilar “Solihiyya” mehmonxonasiga joylashib, o‘z ibodatlarini  ado etmoqdalar. 

 

Yurtdoshlarimiz Toshkentdan zamonaviy Boing avialaynerlarida islomning muqaddas shaharlaridan biri hisoblangan Madinai Munavvaraga yetib kelmoqdalar. Aeroportda ziyoratchilarimizni ishchi guruh vakillari kutib olib, maxsus avtobuslarda Payg‘ambarimiz (a.s.)ning masjidlari hisoblangan Masjidi Nabaviyning yonginasidagi “Ajniha tayiba” mehmonxonasiga olib kelib joylashtirishmoqda.

 

8 oktyabrga qadar o‘zbekistonlik 5200 nafar ziyoratchini (ziyoratchilarga xizmat ko‘rsatish uchun ishchi, tibbiy va oshpazlar guruhlari) “O‘zbekiston havo yo‘llari” Milliy aviakompaniyasining Toshkent-Madina, Buxoro-Madina, Namangan-Madina, Samarqand-Madina, Termiz-Madina, Urganch-Madina hamda Qarshi-Madina yo‘nalishlarida haj safariga jo‘natish rejalashtirilgan. Kuzatish va kutib olish tadbirlari Din ishlari bo‘yicha qo‘mita, O‘zbekiston musulmonlari idorasi, mutasaddi vazirlik va idoralar hamkorligida amalga oshirilmoqda.

 

Ziyoratchilarga safardan oldin Davlat ramzi tushirilgan maxsus kiyim (kamzul) va sumkalar, "Hajnoma" kitobchasi va videotasmalar taqdim etildi. Barcha ziyoratchilar markazlashgan tibbiy punktlarida minengit va grippga qarshi zardob bilan emlandi. Saudiya Arabistonida havo haroratining yuqori darajada bo‘lishi kuzatilayotganligini inobatga olib, shifokorlar guruhi tomonidan ziyoratchilarning salomatligini saqlash maqsadida eslatma-tavsiyalar ishlab chiqilib, tegishli tushuntirish ishlari olib borildi.

 

O‘zbekistonlik  ziyoratchilar uchun Madina shahrida "Masjid an-Nabaviy"dan 15 metr masofada joylashgan "Abroj at-Toyyiba" mehmonxonasi, Makka shahrida esa Haramdan 4500-5000 metr uzoqlikdagi to‘rt yulduzli 5200 sig‘imga ega "Solihiyya" mehmonxonasi tayyorlangan.

 

Ziyoratchilar Madina shahrida 3 kecha - 4 kunduz bo‘lib, bu yerdagi Masjidi Qubo, Masjidi Qiblatayn, Uhud tog‘i, Shahidlar qabristoni kabi muqaddas qadamjolarni ziyorat qilgandan so‘ng Makka shahriga yo‘l oladilar. Ziyoratchilarga mavsum davomida o‘zbekistonlik 30 nafardan iborat ishchi guruhi, 30 nafar shifokor va 10 nafar oshpaz xizmat ko‘rsatadi.

 

Joriy yilning noyabr oyi davomida o‘zbekistonlik hojilarni "O‘zbekiston havo yo‘llari" Milliy aviakompaniyasi samolyotlarida Jidda-Toshkent, Jidda-Buxoro, Jidda-Namangan, Jidda-Samarqand, Jidda-Termiz, Jidda-Urganch hamda Jidda-Qarshi yo‘nalishlari bo‘yicha Vatanga olib kelish rejalashtirilgan.