Шайх Муҳаммад Содиқ Муҳаммад Юсуфнинг “Ислом тарихи” китоби нашр этилди

Рукн: Янгиликлар Чоп этилган: 25.11.2017

Тошкентдаги “Ҳилол-нашр” нашриётининг мажлислар залида Шайх Муҳаммад Содиқ Муҳаммад Юсуф раҳимаҳуллоҳнинг 2 жилдли “Ислом тарихи” китобининг тақдимот маросими бўлиб ўтди. Маросимда юртимизнинг нуфузли олимлари, чет элдан келган меҳмонлар ва мухлислар иштирок этишди.

Маросимни “Ҳилол-нашр” нашриёти директори Исмоилхон Муҳаммад Содиқ очиб, “Ислом тарихи” китобининг ёзилиш жараёни ҳақида сўзлади. “Мазкур китоб раҳматли устозимиз Шайх Муҳаммад Содиқ Муҳаммад Юсуфнинг ўз қўллари билан тугатган сўнгги китобларидир”, деди у.

“Ислом тарихи” китобининг 1-жилди ҳақида Тошкент Ислом институти катта ўқитувчиси, сийрат фани устози Абдул Азим Зиёвуддин сўзлаб берди. “Ҳазрат ушбу китобни ёзиб бўлиб, муҳаррирлик учун менга топширганларида жуда бахтиёр бўлган эдим. Китобнинг ушбу жилди Одам алайҳиссаломдан хулофои рошидингача бўлган Ислом тарихини ўз ичига олади. Устозимиз неча минг йиллик Ислом тарихини мухсатасар тарзда маҳорат билан шу китобга жамлаганлар”, деди у.

Китобнинг 2-жилди ҳақида тадқиқотчи Абдулҳамид Зайриев гапириб берди. Иккинчи жилдда умавийлар давридан бугунги кунимизга қадар динимиз тарихи ҳикоя қилинади.

Маросимда Шайх ҳазратларининг “Ислом тарихи” китоби ҳақида Ўзбекистон Мусулмонлари диний идораси раиси, муфтий ёрдамчиси Абдулҳамид Турсун, тарих фанлари доктори, профессор Мирсодиқ Исҳоқов, Тошкент вилояти бош имом хатиби Хайрулло Турматов ҳамда Абдуллоҳ махдум фикр билдирдилар.

“Тарих барча ўтган авлодларнинг ҳаёт мадрасасидир. Тарих орқали тириклар ўзлари учун ‎манфаатли нарсани ўрганиб, унга амал қиладилар ҳамда ўзларига зарар етадиган нарсалардан ‎воқиф бўлиб, ундан четда бўладилар.‎ Ислом тарихи деганда, одатда Ислом давлатлари ҳамда мусулмон халқларнинг ваҳий нозил ‎бўлган илк даврдан бошлаб ҳозирги кунгача бўлган тарихи назарда тутилади. Аммо аслида ушбу ‎тарих дунё бошланганидан то ҳозирги, биз яшаб турган пайтгача бўлган даврни ўз ичига олади”, дейилади китобда.

2 жилдли “Ислом тарихи” китобини  “Ҳилол-нашр” нашриётидан ҳамда hilolnashr.uz сайтидан сотиб олишингиз мумкин (89000 сўм). Шунингдек, “Ҳилол-нашр” нашриётида ташкил этилган электрон кутубхонада шу ва Ҳазратнинг бошқа китобларини бепул ўқишингиз мумкин.

* * *

Toshkentdagi “Hilol-nashr” nashriyotining majlislar zalida Shayx Muhammad Sodiq Muhammad Yusuf rahimahullohning 2 jildli “Islom tarixi” kitobining taqdimot marosimi bo‘lib o‘tdi. Marosimda yurtimizning nufuzli olimlari, chet eldan kelgan mehmonlar va muxlislar ishtirok etishdi.

Marosimni “Hilol-nashr” nashriyoti direktori Ismoilxon Muhammad Sodiq ochib, “Islom tarixi” kitobining yozilish jarayoni haqida so‘zladi. “Mazkur kitob rahmatli ustozimiz Shayx Muhammad Sodiq Muhammad Yusufning o‘z qo‘llari bilan tugatgan so‘nggi kitoblaridir”, dedi u.

“Islom tarixi” kitobining 1-jildi haqida Toshkent Islom instituti katta o‘qituvchisi, siyrat fani ustozi Abdul Azim Ziyovuddin so‘zlab berdi. “Hazrat ushbu kitobni yozib bo‘lib, muharrirlik uchun menga topshirganlarida juda baxtiyor bo‘lgan edim. Kitobning ushbu jildi Odam alayhissalomdan xulofoi roshidingacha bo‘lgan Islom tarixini o‘z ichiga oladi. Ustozimiz necha ming yillik Islom tarixini muxsatasar tarzda mahorat bilan shu kitobga jamlaganlar”, dedi u.

Kitobning 2-jildi haqida tadqiqotchi Abdulhamid Zayriev gapirib berdi. Ikkinchi jildda umaviylar davridan bugungi kunimizga qadar dinimiz tarixi hikoya qilinadi.

Marosimda Shayx hazratlarining “Islom tarixi” kitobi haqida O‘zbekiston Musulmonlari diniy idorasi raisi, muftiy yordamchisi Abdulhamid Tursun, tarix fanlari doktori, professor Mirsodiq Ishoqov, Toshkent viloyati bosh imom xatibi Xayrullo Turmatov hamda Abdulloh maxdum fikr bildirdilar.

“Tarix barcha o‘tgan avlodlarning hayot madrasasidir. Tarix orqali tiriklar o‘zlari uchun ‎manfaatli narsani o‘rganib, unga amal qiladilar hamda o‘zlariga zarar yetadigan narsalardan ‎voqif bo‘lib, undan chetda bo‘ladilar.‎ Islom tarixi deganda, odatda Islom davlatlari hamda musulmon xalqlarning vahiy nozil ‎bo‘lgan ilk davrdan boshlab hozirgi kungacha bo‘lgan tarixi nazarda tutiladi. Ammo aslida ushbu ‎tarix dunyo boshlanganidan to hozirgi, biz yashab turgan paytgacha bo‘lgan davrni o‘z ichiga oladi”, deyiladi kitobda.

2 jildli “Islom tarixi” kitobini  “Hilol-nashr” nashriyotidan hamda hilolnashr.uz saytidan sotib olishingiz mumkin (89000 so‘m). Shuningdek, “Hilol-nashr” nashriyotida tashkil etilgan elektron kutubxonada shu va Hazratning boshqa kitoblarini bepul o‘qishingiz mumkin.

 

“Ҳилол-нашр” нашриёти директори Исмоилхон Муҳаммад Содиқ

Тошкент Ислом институти катта ўқитувчиси, сийрат фани устози Абдул Азим Зиёвуддин

Тадқиқотчи Абдулҳамид Зайриев

Тарих фанлари доктори, профессор Мирсодиқ Исҳоқов

Тошкент вилояти бош имом хатиби Хайрулло Турматов

Мулоҳаза қўшиш


Ҳимоя коди
Янгилаш