Масжидга борганлар ва намозга келганлар

Рукн: Ибрат Чоп этилган: 10.12.2014

Рамазон ойи эди. Бир куни Аббосийлар давлати бошлиғи Ҳорун ар-Рашид Шайх Баҳлул ҳазратларига қараб: «Эй Баҳлули доно! Шом намозида масжидга боринг ва барча намозга келганларни ифторга таклиф қилинг», деди.
Халифа буюрганидек Шайх Баҳлул ҳазратлари шом намозига масжидга бордилар. Азон айтилиб, намоз адо қилинди.
Намоздан сўнг Шайх Баҳлул ҳазратлари ўн киши билан бирга саройга келдилар.
Ҳорун ар-Рашид жамоат жуда озчилик эканини кўргач, ҳайратланиб:
— Булар ким, эй Баҳлул? — деб сўради.
— Султоним, булар сиз ифторга таклиф қилган кишилардир.
— Мен намозга келган барчани саройга чақиринг демаганмидим?
— Худди шундай, ҳазратим, сиз менга масжидга келганларни эмас, намозга келганларни ифторга таклиф қил, деган эдингиз. Мана, намозга келганлар келишди...
— Қанақасига?..
— Намоздан сўнг камина масжид эшигида туриб, чиқаётганлардан: «Имом намозда қайси сураларни ўқиди?», деб сўрадим. Бу саволга фақатгина мана шу инсонлар жавоб беришди, холос. Масжидга келганлар кўпчилик эди, аммо намозга келганлар фақат шу кишилар экан, — деб жавоб қилди Баҳлули доно.

Фатҳиддин Мансур таржимаси

* * *

Ramazon oyi edi. Bir kuni Abbosiylar davlati boshlig‘i Horun ar-Rashid Shayx Bahlul hazratlariga qarab: «Ey Bahluli dono! Shom namozida masjidga boring va barcha namozga kelganlarni iftorga taklif qiling», dedi.
Xalifa buyurganidek Shayx Bahlul hazratlari shom namoziga masjidga bordilar. Azon aytilib, namoz ado qilindi.
Namozdan so‘ng Shayx Bahlul hazratlari o‘n kishi bilan birga saroyga keldilar.
Horun ar-Rashid jamoat juda ozchilik ekanini ko‘rgach, hayratlanib:
— Bular kim, ey Bahlul? — deb so‘radi.
— Sultonim, bular siz iftorga taklif qilgan kishilardir.
— Men namozga kelgan barchani saroyga chaqiring demaganmidim?
— Xuddi shunday, hazratim, siz menga masjidga kelganlarni emas, namozga kelganlarni iftorga taklif qil, degan edingiz. Mana, namozga kelganlar kelishdi...
— Qanaqasiga?..
— Namozdan so‘ng kamina masjid eshigida turib, chiqayotganlardan: «Imom namozda qaysi suralarni o‘qidi?», deb so‘radim. Bu savolga faqatgina mana shu insonlar javob berishdi, xolos. Masjidga kelganlar ko‘pchilik edi, ammo namozga kelganlar faqat shu kishilar ekan, — deb javob qildi Bahluli dono.