Шанхайда Қурбон ҳайити байрам қилинмоқда

Дунёнинг бошқа давлатлари каби Хитойда ҳам 24 сентябрь Қурбон ҳайити куни деб эълон қилинди. Мамлакатнинг йирик шаҳарларидан бўлган Шанхайдаги Хio Tao Yuan масжидида эрта тонгдан хорижлик ва маҳаллий мусулмонлар жамланди. Маҳаллий вақт билан соат 8:30 да имом-хатиб Ҳожи Мусо бошчилигида ҳайит намози адо этилди. Қурбон ҳайити намозига йиғилган жамоат орасида Ҳиндистон, Покистон, Афғонистон, Ўзбекистон, Қирғизистон ва араб давлатларидан келган мусулмонларни кўриш мумкин.

– Масжидимиз Шанхайдаги мусулмонлар учун энг йирик ибодатгоҳ саналади. Бу ерга хорижий давлатлар раҳбарлари ҳам ташриф буюрган. Масжидимиз маҳаллий мусулмонлар жамланадиган маърифий маскан вазифасини ҳам бажаради. Шанхай мусулмонлар уюшмаси айнан бизнинг масжидда жойлашган, – дейди Шанхай шаҳри ҳамда Хio Tao Yuan масжиди имом-хатиби Ҳожи Мусо.

Суҳбатдошимизнинг ҳикоя қилишича, Шанхайда тахминан 200 минг мусулмон истиқомат қилади. Саккизта жоме масжид фаолият юритмоқда. Хусусан, Хio Tao Yuan масжиди 1917 йилда қурилган. 1925 йилда ибодатгоҳ ислом ва хитой меъморчилик анъаналари асосида қайта бунёд этилган. Асосий хонақоҳ ўз бағрига 500 кишини сиғдиради. Бу ерда аёллар учун ҳам алоҳида хоналар мавжуд. Шунингдек, Хio Tao Yuan масжидида бошланғич исломий мактаб ва йирик кутубхона жойлашган.

Шанхайга ислом дини Юань (1271-1368), яъни мўғул сулоласи ҳукмронлиги даврида кириб келган. Айни пайтда Хитойнинг молиявий пойтахти саналган шаҳарда мусулмонлар жамоаси кенгайиб бормоқда.

Собир Камол

* * *

Dunyoning boshqa davlatlari kabi Xitoyda ham 24 sentyabr Qurbon hayiti kuni deb e’lon qilindi. Mamlakatning yirik shaharlaridan bo‘lgan Shanxaydagi Xio Tao Yuan masjidida erta tongdan xorijlik va mahalliy musulmonlar jamlandi. Mahalliy vaqt bilan soat 8:30 da imom-xatib Hoji Muso boshchiligida hayit namozi ado etildi. Qurbon hayiti namoziga yig‘ilgan jamoat orasida Hindiston, Pokiston, Afg‘oniston, O‘zbekiston, Qirg‘iziston va arab davlatlaridan kelgan musulmonlarni ko‘rish mumkin.

– Masjidimiz Shanxaydagi musulmonlar uchun eng yirik ibodatgoh sanaladi. Bu yerga xorijiy davlatlar rahbarlari ham tashrif buyurgan. Masjidimiz mahalliy musulmonlar jamlanadigan ma’rifiy maskan vazifasini ham bajaradi. Shanxay musulmonlar uyushmasi aynan bizning masjidda joylashgan, – deydi Shanxay shahri hamda Xio Tao Yuan masjidi imom-xatibi Hoji Muso.

Suhbatdoshimizning hikoya qilishicha, Shanxayda taxminan 200 ming musulmon istiqomat qiladi. Sakkizta jome masjid faoliyat yuritmoqda. Xususan, Xio Tao Yuan masjidi 1917 yilda qurilgan. 1925 yilda ibodatgoh islom va xitoy me’morchilik an’analari asosida qayta bunyod etilgan. Asosiy xonaqoh o‘z bag‘riga 500 kishini sig‘diradi. Bu yerda ayollar uchun ham alohida xonalar mavjud. Shuningdek, Xio Tao Yuan masjidida boshlang‘ich islomiy maktab va yirik kutubxona joylashgan.

Shanxayga islom dini Yuan (1271-1368), ya’ni mo‘g‘ul sulolasi hukmronligi davrida kirib kelgan. Ayni paytda Xitoyning moliyaviy poytaxti sanalgan shaharda musulmonlar jamoasi kengayib bormoqda.

Sobir Kamol

• Олдинги
• Кейинги