“Москва” жомеъ масжидининг очилиш маросими бўлиб ўтди

Рукн: Янгиликлар Чоп этилган: 23.09.2015

23 сентябрь куни Москванинг “Проспект мира” даҳасида янгидан бунёд этилган “Москва” жомеъ масжидининг тантанали очилиш маросими ўтказилди. Унда Россия Федерацияси президенти Владимир Путин, Туркия Республикаси президенти Ражаб Тоййиб Эрдоған, Фаластин давлати раҳбари Маҳмуд Аббос иштирок этди.

Маросимда Россия Федерацияси муфтийлар кенгашининг раиси, Россия мусулмонлари диний идораси раиси, муфтий шайх Равил Ғайнутдин таклифига биноан Ўзбекистондан Вазирлар Маҳкамаси ҳузуридаги Дин ишлари бўйича қўмита Масжидлар бўлими бошлиғи Муҳаммад Бобур Йўлдошев ва Ўзбекистон мусулмонлари идораси Матбуот котиби Жалолиддин Нуриддинов ҳам қатнашди.

Бир вақтнинг ўзида 10 000 намозхон ибодат қилиши мумкин бўлган ушбу масжид Европадаги энг муаззам жомеъдир. Унинг майдони 20 000 кв. метрни ташкил этади. 6 қаватли ушбу масжид қуббаси 46 метр бўлиб, олтин зарварақ билан қопланган. Қубба атрофида 78 метрли икки минора ҳам мавжуд.

Асосий хонақоҳда 140 қандил мавжуд бўлиб, улардан энг каттаси 3,5 метр диаметрни ташкил этади. Масжид безакларини туркиялик усталар бажаришди, гиламлар ҳам Туркиядан келтирилди.

Масжидда аёллар учун алоҳида хоналар, конференц-зал, музокаралар хонаси мавжуд. Масжид биносида Россия мусулмонлари музейи ҳам очилади.

Масжид 1904 йили қурилган. Совет йилларида ҳам шаҳардаги ягона жомеъ масжиди сифатида фаолият юритган. Унинг қайта таъмири учун 10 йил сарфланди.

Жомеъ масжиди учун хайрия маблағлари ҳисобидан 170 миллион доллар сарфланди.

* * *

23 sentyabr kuni Moskvaning “Prospekt mira” dahasida yangidan bunyod etilgan “Moskva” jome’ masjidining tantanali ochilish marosimi o‘tkazildi. Unda Rossiya Federatsiyasi prezidenti Vladimir Putin, Turkiya Respublikasi prezidenti Rajab Toyyib Erdog‘an, Falastin davlati rahbari Mahmud Abbos ishtirok etdi.

Marosimda Rossiya Federatsiyasi muftiylar kengashining raisi, Rossiya musulmonlari diniy idorasi raisi, muftiy shayx Ravil G‘aynutdin taklifiga binoan O‘zbekistondan Vazirlar Mahkamasi huzuridagi Din ishlari bo‘yicha qo‘mita Masjidlar bo‘limi boshlig‘i Muhammad Bobur Yo‘ldoshev va O‘zbekiston musulmonlari idorasi Matbuot kotibi Jaloliddin Nuriddinov ham qatnashdi.

Bir vaqtning o‘zida 10 000 namozxon ibodat qilishi mumkin bo‘lgan ushbu masjid Yevropadagi eng muazzam jome’dir. Uning maydoni 20 000 kv. metrni tashkil etadi. 6 qavatli ushbu masjid qubbasi 46 metr bo‘lib, oltin zarvaraq bilan qoplangan. Qubba atrofida 78 metrli ikki minora ham mavjud.

Asosiy xonaqohda 140 qandil mavjud bo‘lib, ulardan eng kattasi 3,5 metr diametrni tashkil etadi. Masjid bezaklarini turkiyalik ustalar bajarishdi, gilamlar ham Turkiyadan keltirildi.

Masjidda ayollar uchun alohida xonalar, konferents-zal, muzokaralar xonasi mavjud. Masjid binosida Rossiya musulmonlari muzeyi ham ochiladi.

Masjid 1904 yili qurilgan. Sovet yillarida ham shahardagi yagona jome’ masjidi sifatida faoliyat yuritgan. Uning qayta ta’miri uchun 10 yil sarflandi.

Jome’ masjidi uchun xayriya mablag‘lari hisobidan 170 million dollar sarflandi.