Масжид.уз сайти танлов эълон қилади

Рукн: Янгиликлар Чоп этилган: 11.06.2015

Ислом.уз порталининг энг ёш ва айни пайтда энг тез оммалашиб бораётган masjid.uz сайтида янги танлов бошланди. Маълумки, «Ўзбекистон масжидлари» сайти юртимизда жойлашган масжидлар ҳақида тезкор ва батафсил маълумотлар берувчи интернет-манба бўлиб, унда масжиднинг номи ва манзилидан ташқари улар ҳақида видео ва фотосуратлар, онлайн харитадаги аниқ координаталар, имом-хатибларнинг исми шарифлари, масжиднинг тарихи ва бугунги кундаги фаолиятига оид кенг кўламли ахборотлар бериб борилади.

Эндиликда замонавий ахборот технологияларининг сўнгги имкониятларидан фойдаланган ҳолда, сайтга кириб, унга ҳали мавжуд бўлмаган масжид ҳақида ҳам маълумотлар киритиш имконияти яратилди. Ушбу танловдан мақсад масжид.уз сайтининг ана шу янги имкониятидан фаолроқ фойдаланишдир.

Танлов шартлари
•    Масжид.уз сайтига кириб, унга янги масжид ҳақидаги маълумотлар киритиш.
•    Масжид.уз сайтига киритилаётган янги масжид ҳақда имкон қадар кўпроқ маълумот киритиш.
•    Масжид.уз сайтига мавжуд масжидлар ҳақидаги ахборотни янги маълумотлар билан бойитиш.

Масжид.уз сайтига энг кўп, энг батафсил, энг бой ва энг қизиқарли маълумотларни ҳаммадан кўп киритган, энг фаол иштирокчиларимиз танлов ғолиби деб топилади.
Танлов 2015 йил 1 сентябргача (ёки 1436 йил зулҳижжа ойининг 10 кунигача) давом этади.
Ҳакамлар ҳайъати танловга тақдим этилган маълумотларни тўплаб, таҳлил қилиб, саралаб, сарҳисоб қилгач, ғолиблар эълон қилинади.
Танлов ғолибларига қимматбаҳо совғалар, «Ҳилол-нашр» матбаа-нашриётида чоп этилган китоб ва медиамаҳсулотлар топширилади.
Танлов ғолибларини тақдирлаш маросимининг санаси ва манзили Ислом.уз портали ва масжид.уз сайтларида алоҳида эълон қилинади.

* * *

Islom.uz portalining eng yosh va ayni paytda eng tez ommalashib borayotgan masjid.uz saytida yangi tanlov boshlandi. Ma’lumki, «O‘zbekiston masjidlari» sayti yurtimizda joylashgan masjidlar haqida tezkor va batafsil ma’lumotlar beruvchi internet-manba bo‘lib, unda masjidning nomi va manzilidan tashqari ular haqida video va fotosuratlar, onlayn xaritadagi aniq koordinatalar, imom-xatiblarning ismi shariflari, masjidning tarixi va bugungi kundagi faoliyatiga oid keng ko‘lamli axborotlar berib boriladi.

Endilikda zamonaviy axborot texnologiyalarining so‘nggi imkoniyatlaridan foydalangan holda, saytga kirib, unga hali mavjud bo‘lmagan masjid haqida ham ma’lumotlar kiritish imkoniyati yaratildi. Ushbu tanlovdan maqsad masjid.uz saytining ana shu yangi imkoniyatidan faolroq foydalanishdir.

Tanlov shartlari
•    Masjid.uz saytiga kirib, unga yangi masjid haqidagi ma’lumotlar kiritish.
•    Masjid.uz saytiga kiritilayotgan yangi masjid haqda imkon qadar ko‘proq ma’lumot kiritish.
•    Masjid.uz saytiga mavjud masjidlar haqidagi axborotni yangi ma’lumotlar bilan boyitish.

Masjid.uz saytiga eng ko‘p, eng batafsil, eng boy va eng qiziqarli ma’lumotlarni hammadan ko‘p kiritgan, eng faol ishtirokchilarimiz tanlov g‘olibi deb topiladi.
Tanlov 2015 yil 1 sentyabrgacha (yoki 1436 yil zulhijja oyining 10 kunigacha) davom etadi.
Hakamlar hay’ati tanlovga taqdim etilgan ma’lumotlarni to‘plab, tahlil qilib, saralab, sarhisob qilgach, g‘oliblar e’lon qilinadi.
Tanlov g‘oliblariga qimmatbaho sovg‘alar, «Hilol-nashr» matbaa-nashriyotida chop etilgan kitob va mediamahsulotlar topshiriladi.
Tanlov g‘oliblarini taqdirlash marosimining sanasi va manzili Islom.uz portali va masjid.uz saytlarida alohida e’lon qilinadi.