Ўзбекистон диний идораси ва дин ишлари бўйича қўмита сайтларида Шайх Муҳаммад Содиқ Муҳаммад Юсуф ҳақларида мақолалар чоп этилди

Рукн: Янгиликлар Чоп этилган: 13.03.2015

Ўзбекистон диний идораси расмий сайтида чоп этилган “Дин хизматига бахшида умр” мақоласида  фазилатли Шайх Муҳаммад Содиқ Муҳаммад Юсуф раҳимаҳуллоҳнинг мазумнли ҳаёт ва ижод йўллари ҳикоя қилинади. “Ислом маърифатини халқимиз ва дунё мусулмонларига етказишда диёримиз олиму уламоларининг ҳиссаси беқиёс. Ана шундай уламолардан бири Шайх Муҳаммадсодиқ Муҳаммадюсуф эди. У киши узоқ йиллар дин хизматида самарали фаолият кўрсатиб, хайрли ишларни амалга оширди”, дейилади мақолада.

Шайхнинг динимиз тараққиётига қўшган ҳиссалари ҳақида сўз кетар экан, “Ислом дини равнақига салмоқли ҳисса қўшган, довруғи нафақат Ўзбекистон балки қўшни ва хориж мамлакатларида ҳам маълум бўлган Шайх Муҳаммад Содиқ Муҳаммад Юсуф ҳазратларининг фаолиятлари мўмин-мусулмонлар хотирасида абадий қолажак”, дея таъкидланади ушбу мақолада.

Ўзбекистон мусулмонлари идораси раиси, муфтий Усмонхон Алимов имзо чеккан “Таъзиянома”да “Биз устозимизнинг ҳар бир қилган ишларидан Расулуллоҳ соллаллоҳу алайҳи васалламнинг сийратларини, суннатларини ўрганар эдик. У кишидан илм ва одобни бирдек олар эдик. Шайх Муҳаммад Содиқ Муҳаммад Юсуф халқ хизматига астойдил бел боғлаган севимли пешволардан эдилар. Устоз диний илмларни ривожлантириш йўлида самарали ижод қилдилар. У кишининг “Имон”, “Тасаввуф ҳақида тасаввур”, “Ихтилофлар ҳақида”, “Дин насийҳатдир”, “Шоядки тақводор бўлсак”, “Поклик иймондандир”, “Ҳаж ибодати”, “Исломда инсон ҳуқуқлари”, “Жамият кўксига урилган заҳарли ханжар”, “Ислом мусаффолиги йўлида”, “Ислом маънавий жиноятларга қарши”, “Рамазонни қандай қаршилаймиз”, “Сунний ақийдалар”, “Кифоя”, “Одоблар хазийнаси”, “Руҳий тарбия”, “Ҳадис ва ҳаёт”, “Тафсири ҳилол”, “Олтин силсила” туркуми, рус тилида нашр этилган “Васатыя – путь жизни”, “Ислам и экология”, “Способны ли вы верить в существование Аллаха (О вере)” каби кўплаб илмий-маърифий асарлари нашр этилган”, дейилади.

Ўзбекистон Республикаси Вазирлар Маҳкамаси ҳузуридаги дин ишлари бўйича қўмита сайтида чоп этилган “Ҳидоят йўли” мақоласида Шайх Муҳаммад Содиқ Муҳаммад Юсуфнинг минтақамиз мусулмонларига соф ислом таълимотларини етказиш, уларга ахлоқ-одоб, маърифат зиёларини тарқатиш йўлида мислсиз меҳнат қилиб, ўзидан бой илмий-маърифий мерос қолдирган олимлардан эканлиги таъкидланиб, у зотнинг чорак аср аввал бутун ислом олами, унинг бирдамлиги ва ўзаро биродарлигига хавф сола бошлаган ва ҳали ҳамон ислом уммати бошига соя солиб турган мазҳабсизлик, сохта салафийлик иллатларига қарши қаратилган илмий фаолиятига юксак баҳо берилган.

* * *

O‘zbekiston diniy idorasi rasmiy saytida chop etilgan “Din xizmatiga baxshida umr” maqolasida  fazilatli Shayx Muhammad Sodiq Muhammad Yusuf rahimahullohning mazumnli hayot va ijod yo‘llari hikoya qilinadi. “Islom ma’rifatini xalqimiz va dunyo musulmonlariga yetkazishda diyorimiz olimu ulamolarining hissasi beqiyos. Ana shunday ulamolardan biri Shayx Muhammadsodiq Muhammadyusuf edi. U kishi uzoq yillar din xizmatida samarali faoliyat ko‘rsatib, xayrli ishlarni amalga oshirdi”, deyiladi maqolada.

Shayxning dinimiz taraqqiyotiga qo‘shgan hissalari haqida so‘z ketar ekan, “Islom dini ravnaqiga salmoqli hissa qo‘shgan, dovrug‘i nafaqat O‘zbekiston balki qo‘shni va xorij mamlakatlarida ham ma’lum bo‘lgan Shayx Muhammad Sodiq Muhammad Yusuf hazratlarining faoliyatlari mo‘min-musulmonlar xotirasida abadiy qolajak”, deya ta’kidlanadi ushbu maqolada.

O‘zbekiston musulmonlari idorasi raisi, muftiy Usmonxon Alimov imzo chekkan “Ta’ziyanoma”da “Biz ustozimizning har bir qilgan ishlaridan Rasululloh sollallohu alayhi vasallamning siyratlarini, sunnatlarini o‘rganar edik. U kishidan ilm va odobni birdek olar edik. Shayx Muhammad Sodiq Muhammad Yusuf xalq xizmatiga astoydil bel bog‘lagan sevimli peshvolardan edilar. Ustoz diniy ilmlarni rivojlantirish yo‘lida samarali ijod qildilar. U kishining “Imon”, “Tasavvuf haqida tasavvur”, “Ixtiloflar haqida”, “Din nasiyhatdir”, “Shoyadki taqvodor bo‘lsak”, “Poklik iymondandir”, “Haj ibodati”, “Islomda inson huquqlari”, “Jamiyat ko‘ksiga urilgan zaharli xanjar”, “Islom musaffoligi yo‘lida”, “Islom ma’naviy jinoyatlarga qarshi”, “Ramazonni qanday qarshilaymiz”, “Sunniy aqiydalar”, “Kifoya”, “Odoblar xaziynasi”, “Ruhiy tarbiya”, “Hadis va hayot”, “Tafsiri hilol”, “Oltin silsila” turkumi, rus tilida nashr etilgan “Vasatыya – put jizni”, “Islam i ekologiya”, “Sposobnы li vы verit v suщestvovanie Allaxa (O vere)” kabi ko‘plab ilmiy-ma’rifiy asarlari nashr etilgan”, deyiladi.

O‘zbekiston Respublikasi Vazirlar Mahkamasi huzuridagi din ishlari bo‘yicha qo‘mita saytida chop etilgan “Hidoyat yo‘li” maqolasida Shayx Muhammad Sodiq Muhammad Yusufning mintaqamiz musulmonlariga sof islom ta’limotlarini yetkazish, ularga axloq-odob, ma’rifat ziyolarini tarqatish yo‘lida mislsiz mehnat qilib, o‘zidan boy ilmiy-ma’rifiy meros qoldirgan olimlardan ekanligi ta’kidlanib, u zotning chorak asr avval butun islom olami, uning birdamligi va o‘zaro birodarligiga xavf sola boshlagan va hali hamon islom ummati boshiga soya solib turgan mazhabsizlik, soxta salafiylik illatlariga qarshi qaratilgan ilmiy faoliyatiga yuksak baho berilgan.