Рамазон ойида пойтахт масжидлари томонидан 200 дан ортиқ аравачалар муҳтож кишиларга топширилди
Рамазон ойида Тошкент шаҳридаги масжидлар имом-хатиблари ташаббуси билан ҳомийлар кўмагида шаҳримиздаги “Меҳрибонлик”, “Мурувват”, “Саҳоват” уйлари, меҳнат фахрийлари, нуроний кексалар, имконияти чекланган кишилар, шунингдек кам таъминланган, ёрдамга, меҳр-муруватга муҳтож кишилар ҳолидан хабар олиниб, моддий ва маънавий эътибор кўрсатилмоқда. Алоҳида таъкидлаш жоизки, улуғ айёмда пойтахтимиздаги масжидлар томонидан жами 200 дан ортиқ аравачалар муҳтож кишиларга топширилди.
Аввалроқ Тошкент шаҳридаги «Мирза Юсуф» жомеъ масжиди “Матонатли инсонлар учун хайрия” акциясини ташкил этган эди. Бу тадбирда динимизнинг кўрсатмаларига мувофиқ, муҳтож кишиларни, имконияти чекланганларни руҳан қўллаб-қувватлаш, оғирини енгил, узоғини яқин қилиш, меҳр-мурувват кўрсатиш, имкони бор юртдошларимиз матонатли инсонлар учун зарур бўлган аравачаларни олиб беришлари ният қилинган. Ушбу акция давомида Тошкент шаҳри, Жиззах ва Сирдарё вилоятларида матонатли инсонлар учун аравачалар олиб берилди.
Рамазон ойидаги хайрия тадбирларида Республикамизнинг барча масжидлари ташаббус кўрсатишмоқда. Наманган вилояти Чуст шаҳри "Саид Насимхон тўра" жомеъ масжиди имом хатиб ноиби Мақсудхон Иномхонов ҳомийларни жалб қилган ҳолда Наманган вилояти, Поп туманидаги "Мурувват" ногиронлар уйига ташриф буюриб, у ердаги меҳр ва эътиборга муҳтож кишиларга меҳр кўрсатиб, кийим-кечак ва озиқ-овқатдан иборат хайрия совғалари топширди.
Ramazon oyida Toshkent shahridagi masjidlar imom-xatiblari tashabbusi bilan homiylar ko‘magida shahrimizdagi “Mehribonlik”, “Muruvvat”, “Sahovat” uylari, mehnat faxriylari, nuroniy keksalar, imkoniyati cheklangan kishilar, shuningdek kam ta’minlangan, yordamga, mehr-muruvatga muhtoj kishilar holidan xabar olinib, moddiy va ma’naviy e’tibor ko‘rsatilmoqda. Alohida ta’kidlash joizki, ulug‘ ayyomda poytaxtimizdagi masjidlar tomonidan jami 200 dan ortiq aravachalar muhtoj kishilarga topshirildi.
Avvalroq Toshkent shahridagi «Mirza Yusuf» jome’ masjidi “Matonatli insonlar uchun xayriya” aktsiyasini tashkil etgan edi. Bu tadbirda dinimizning ko‘rsatmalariga muvofiq, muhtoj kishilarni, imkoniyati cheklanganlarni ruhan qo‘llab-quvvatlash, og‘irini yengil, uzog‘ini yaqin qilish, mehr-muruvvat ko‘rsatish, imkoni bor yurtdoshlarimiz matonatli insonlar uchun zarur bo‘lgan aravachalarni olib berishlari niyat qilingan. Ushbu aktsiya davomida Toshkent shahri, Jizzax va Sirdaryo viloyatlarida matonatli insonlar uchun aravachalar olib berildi.
Ramazon oyidagi xayriya tadbirlarida Respublikamizning barcha masjidlari tashabbus ko‘rsatishmoqda. Namangan viloyati Chust shahri "Said Nasimxon to‘ra" jome’ masjidi imom xatib noibi Maqsudxon Inomxonov homiylarni jalb qilgan holda Namangan viloyati, Pop tumanidagi "Muruvvat" nogironlar uyiga tashrif buyurib, u yerdagi mehr va e’tiborga muhtoj kishilarga mehr ko‘rsatib, kiyim-kechak va oziq-ovqatdan iborat xayriya sovg‘alari topshirdi.