Бухорода Мир Араб олий мадрасаси ташкил қилинди

Ўзбекистон Республикаси Президенти Шавкат Мирзиёевнинг жорий йилнинг 10-11 март кунлари Бухоро вилоятига ташрифи чоғида Бухоро вилоятида Мир Араб олий мадрасасини ташкил қилиш бўйича кўрсатмалар берилган эди. Берилган кўрсатмаларга асосан Ўзбекистон мусулмонлари идораси томонидан Мир Араб олий мадрасаси ташкил қилиниб, 2017 йил 7 июнь куни Ўзбекистон Республикаси Адлия вазирлиги томонидан қисқа муддатда давлат рўйхатидан ўтказилди. Бу ҳақда Кун.уз ахборот портали хабар бермоқда.

Ушбу диний таълим муассасасининг ташкил қилиниши Ўзбекистон Республикаси Конституцияси ва “Виждон эркинлиги ва диний ташкилотлар тўғрисида”ги Қонунда белгиланган фуқароларнинг виждон эркинлиги ҳамда диний таълим олишга бўлган ҳуқуқларини амалга оширишлари учун яна бир имконият бўлди.

Шу муносабат билан Адлия вазирлиги Жамоат, нодавлат нотижорат ва диний ташкилотлар бошқармаси томонидан Ўзбекистон мусулмонлари идораси раиси, муфтий Усмонхон Алимов ва Олий мадраса ректори вазифасини бажарувчи Элов Жобир Рустамовичга Олий мадрасанинг давлат рўйхатидан ўтганлиги тўғрисида гувоҳнома топширилди ва Олий мадрасанинг келгусидаги фаолиятига муваффақиятлар тиланди.

Муфтий Усмонхон Алимов Ўзбекистон Республикаси Президентининг шахсан ташаббуслигида ташкил қилинган мазкур диний таълим муассасаси олий Ислом билим юрти ҳисобланишини таъкидлаган ҳолда, уни Ўзбекистон халқига соф Ислом дини асосларини мукаммал ўрганиш ва мамлакатда диний бағрикенгликнинг таъминланишида муҳим аҳамият касб этишини билдирди ва мазкур таълим муассасасидан Имом ал-Бухорий, Имом ат-Термизий, Баҳоуддин Нақшбанд каби Ислом оламида шуҳрат қозонган буюк алломалар етишиб чиқишини тилаб дуо қилди.

Шу билан бирга, ҳозирги вақтда Бухоро вилоятида янги ташкил қилинган Мир Араб олий мадрасасидан ташқари Мир Араб ислом ўрта махсус билим юрти ҳам ўз фаолиятини давом эттириб боради.

O‘zbekiston Respublikasi Prezidenti Shavkat Mirziyoevning joriy yilning 10-11 mart kunlari Buxoro viloyatiga tashrifi chog‘ida Buxoro viloyatida Mir Arab oliy madrasasini tashkil qilish bo‘yicha ko‘rsatmalar berilgan edi. Berilgan ko‘rsatmalarga asosan O‘zbekiston musulmonlari idorasi tomonidan Mir Arab oliy madrasasi tashkil qilinib, 2017 yil 7 iyun kuni O‘zbekiston Respublikasi Adliya vazirligi tomonidan qisqa muddatda davlat ro‘yxatidan o‘tkazildi. Bu haqda Kun.uz axborot portali xabar bermoqda.

Ushbu diniy ta’lim muassasasining tashkil qilinishi O‘zbekiston Respublikasi Konstitutsiyasi va “Vijdon erkinligi va diniy tashkilotlar to‘g‘risida”gi Qonunda belgilangan fuqarolarning vijdon erkinligi hamda diniy ta’lim olishga bo‘lgan huquqlarini amalga oshirishlari uchun yana bir imkoniyat bo‘ldi.

Shu munosabat bilan Adliya vazirligi Jamoat, nodavlat notijorat va diniy tashkilotlar boshqarmasi tomonidan O‘zbekiston musulmonlari idorasi raisi, muftiy Usmonxon Alimov va Oliy madrasa rektori vazifasini bajaruvchi Elov Jobir Rustamovichga Oliy madrasaning davlat ro‘yxatidan o‘tganligi to‘g‘risida guvohnoma topshirildi va Oliy madrasaning kelgusidagi faoliyatiga muvaffaqiyatlar tilandi.

Muftiy Usmonxon Alimov O‘zbekiston Respublikasi Prezidentining shaxsan tashabbusligida tashkil qilingan mazkur diniy ta’lim muassasasi oliy Islom bilim yurti hisoblanishini ta’kidlagan holda, uni O‘zbekiston xalqiga sof Islom dini asoslarini mukammal o‘rganish va mamlakatda diniy bag‘rikenglikning ta’minlanishida muhim ahamiyat kasb etishini bildirdi va mazkur ta’lim muassasasidan Imom al-Buxoriy, Imom at-Termiziy, Bahouddin Naqshband kabi Islom olamida shuhrat qozongan buyuk allomalar yetishib chiqishini tilab duo qildi.

Shu bilan birga, hozirgi vaqtda Buxoro viloyatida yangi tashkil qilingan Mir Arab oliy madrasasidan tashqari Mir Arab islom o‘rta maxsus bilim yurti ham o‘z faoliyatini davom ettirib boradi.

• Олдинги
• Кейинги