Мовароуннаҳр мадрасаларига бағишланган сайт ташкил этилди

Рукн: Янгиликлар Чоп этилган: 22.02.2017

Islom.uz портали қошида юртимиз Мовароуннаҳрнинг Бухоро, Самарқанд, Марв, Урганч, Ахсикет, Хива, Шош, Марғинон ва бошқа шаҳарларидаги маърифат масканлари бўлмиш мадрасаларда етишиб чиққан алломалар ҳақида, улар таҳсил олган мадрасалар ва ҳозирда юртимиз Ўзбекистонда ишлаб турган мадрасалар ҳақида талабаларга маълумот бериб боришга мўлжалланган madrasa.uz сайти ишга туширилди.

Сайт мутасаддилари миллий қадриятларимиз, бой маънавий меросимизни, Имом Бухорий, Имом Термизий, Бурҳониддин Марғиноний, имом Мотурудий, Баҳоуддин Нақшбандий ва Маҳмуд Замахшарий сингари юртимиздан етишиб чиққан минглаб буюк алломаларнинг Қуръон, ҳадис, ақоид, фиқҳ, тасаввуф ва бошқа илмларга оид улкан меросини чуқур ўрганиш; юксак инсоний ғоялар ва муқаддас қадриятларимизни ўзида ифода этган манбаларни тадқиқ этиш, улардан диний таълим, маънавий-ахлоқий тарбия ишларида фойдаланиш, диний ходимларнинг малакасини, билим ва тажрибасини ошириш бўйича ўқув-услубий ишларни амалга ошириш; ёш авлоднинг руҳий ва маънавий оламини бойитиш, юртимиз тарихи зарварақларига олтин ҳарфлар билан муҳрланган нодир қўлёзмаларни ўрганиш ва уларни келгуси авлодларга етказиш; аждодларимизнинг ҳаёти, ахлоқи ва юксак маънавиятини ифодаловчи илмий ёдгорликларни таржима қилиб, ёшлар қалбида улар қолдирган меросга ҳурмат, эъзоз ва муҳаббат туйғусини шакллантиришни режалаштирганлар.

Сайтда ҳозирда мадрасалар ҳақида маълумотлар ва мақолалар, ақида, тафсир, ҳадис, фиқҳ, сийрат, араб тили, ҳикмат, балоғат, мантиқ фанларига оид дарсликлар ва китоблар киритилган.

Islom.uz portali qoshida yurtimiz Movarounnahrning Buxoro, Samarqand, Marv, Urganch, Axsiket, Xiva, Shosh, Marg‘inon va boshqa shaharlaridagi ma’rifat maskanlari bo‘lmish madrasalarda yetishib chiqqan allomalar haqida, ular tahsil olgan madrasalar va hozirda yurtimiz O‘zbekistonda ishlab turgan madrasalar haqida talabalarga ma’lumot berib borishga mo‘ljallangan madrasa.uz sayti ishga tushirildi.

Sayt mutasaddilari milliy qadriyatlarimiz, boy ma’naviy merosimizni, Imom Buxoriy, Imom Termiziy, Burhoniddin Marg‘inoniy, imom Moturudiy, Bahouddin Naqshbandiy va Mahmud Zamaxshariy singari yurtimizdan yetishib chiqqan minglab buyuk allomalarning Qur’on, hadis, aqoid, fiqh, tasavvuf va boshqa ilmlarga oid ulkan merosini chuqur o‘rganish; yuksak insoniy g‘oyalar va muqaddas qadriyatlarimizni o‘zida ifoda etgan manbalarni tadqiq etish, ulardan diniy ta’lim, ma’naviy-axloqiy tarbiya ishlarida foydalanish, diniy xodimlarning malakasini, bilim va tajribasini oshirish bo‘yicha o‘quv-uslubiy ishlarni amalga oshirish; yosh avlodning ruhiy va ma’naviy olamini boyitish, yurtimiz tarixi zarvaraqlariga oltin harflar bilan muhrlangan nodir qo‘lyozmalarni o‘rganish va ularni kelgusi avlodlarga yetkazish; ajdodlarimizning hayoti, axloqi va yuksak ma’naviyatini ifodalovchi ilmiy yodgorliklarni tarjima qilib, yoshlar qalbida ular qoldirgan merosga hurmat, e’zoz va muhabbat tuyg‘usini shakllantirishni rejalashtirganlar.

Saytda hozirda madrasalar haqida ma’lumotlar va maqolalar, aqida, tafsir, hadis, fiqh, siyrat, arab tili, hikmat, balog‘at, mantiq fanlariga oid darsliklar va kitoblar kiritilgan.