Бугун Тошкент шаҳрида “Hilol-nashr” нашриёт-матбаа корхонасининг марказий китоб-ахборот мажмуаси очилиш маросими бўлиб ўтди. Унда нашриёт ходимлари, олимлар ва зиёлилар, китобхон мухлислар иштирок этди.
Янги мажмуа шинам ва гўзал китоб дўкони, қироатхона (китобларни шу ернинг ўзида ўқиш учун шароитлар яратилган), музей (экспонатлардан Шайх Муҳаммад Содиқ Муҳаммад Юсуфнинг чоп этилган деярли барча китоблари, қўлёзмалари ўрин олган), китоб тақдимоти ва маърифий тадбирлар учун мажлислар залидан иборат.
“Hilol-nashr” нашриётининг бош муҳаррири Эркин Малик мажмуа фаолияти билан таништирар экан, Шайх Муҳаммад Содиқ Муҳаммад Юсуф раҳимаҳуллоҳ ташаббуси билан ташкил этилган ушбу зиё маскани ҳамон халқимизга илм улашаётганидан мамнунлигини таъкидлади.
Нашриёт раҳбари Исмоилҳожи Муҳаммад Юсуф нашриётнинг ютуқлари ва келгусидаги режалари ҳақида сўзлади.
“Олтин силсила” тўплами муҳаррирларидан Ҳасанхон Яҳё Абдулмажид китобнинг нашр этилиши жараёни ҳақида маълумот берди. Муҳаррирнинг айтишича, Ислом оламидаги энг машҳур 9 ҳадис китоблари таржимасини ўз ичига олган, 60 жилддан иборат ушбу академик нашр Шайх Муҳаммад Содиқ Муҳаммад Юсуф раҳимаҳуллоҳ раҳбарлигида таржима қилиб бўлинган. Айни пайтда 5 та жилди чоп этилди. Бошқа жилдларини ҳам таҳрир ва нашрга тайёрлаш ишлари олиб борилмоқда.
Ўзбекистон Мусулмонлари идораси фатво бўлими бошлиғи Абдулҳамид Турсунов, Абдуллоҳ ҳожи Исмоилов, юридик фанлар доктори, профессор Ҳалим Бобоев, иқтисод фанлари номзоди, “Фарзанднома” китоби муаллифи Обиддин Маҳмудов ҳам фикр-мулоҳазалари ва таклифлари билан ўртоқлашишди.
“Hilol-nashr” нашриёти матбаа мажмуаси 2010 йилдан матбаа фаолиятини бошлаган. 2011 йилда нашриёт учун лицензия олинган, 2012 йилдан диний-маърифий ва илмий китоблар нашр этила бошланган.
Ҳозирда нашриёт китоблари Қозоғистон, Қирғизистон, Россия ва Жанубий Кореяга экспорт қилинмоқда. Тошкентда 2 та (Чорсу ва Кўкча филиаллари), Андижон, Наманган, Марғилон, Асака, Самарқанд, Денов, Урганч филиаллари мавжуд. Марказий мажмуа Тошкент шаҳри, Сўгалли ота кўчаси, 5-уйда жойлашган.
“Hilol-nashr” нашриёти босма ва электрон китобларини kitoblardunyosi.uz ва e-hilolnashr.uz сайтлари орқали онлайн сотиб олиш ҳам йўлга қўйилган.
Bugun Toshkent shahrida “Hilol-nashr” nashriyot-matbaa korxonasining markaziy kitob-axborot majmuasi ochilish marosimi bo‘lib o‘tdi. Unda nashriyot xodimlari, olimlar va ziyolilar, kitobxon muxlislar ishtirok etdi.
Yangi majmua shinam va go‘zal kitob do‘koni, qiroatxona (kitoblarni shu yerning o‘zida o‘qish uchun sharoitlar yaratilgan), muzey (eksponatlardan Shayx Muhammad Sodiq Muhammad Yusufning chop etilgan deyarli barcha kitoblari, qo‘lyozmalari o‘rin olgan), kitob taqdimoti va ma’rifiy tadbirlar uchun majlislar zalidan iborat.
“Hilol-nashr” nashriyotining bosh muharriri Erkin Malik majmua faoliyati bilan tanishtirar ekan, Shayx Muhammad Sodiq Muhammad Yusuf rahimahulloh tashabbusi bilan tashkil etilgan ushbu ziyo maskani hamon xalqimizga ilm ulashayotganidan mamnunligini ta’kidladi.
Nashriyot rahbari Ismoilhoji Muhammad Yusuf nashriyotning yutuqlari va kelgusidagi rejalari haqida so‘zladi.
“Oltin silsila” to‘plami muharrirlaridan Hasanxon Yahyo Abdulmajid kitobning nashr etilishi jarayoni haqida ma’lumot berdi. Muharrirning aytishicha, Islom olamidagi eng mashhur 9 hadis kitoblari tarjimasini o‘z ichiga olgan, 60 jilddan iborat ushbu akademik nashr Shayx Muhammad Sodiq Muhammad Yusuf rahimahulloh rahbarligida tarjima qilib bo‘lingan. Ayni paytda 5 ta jildi chop etildi. Boshqa jildlarini ham tahrir va nashrga tayyorlash ishlari olib borilmoqda.
O‘zbekiston Musulmonlari idorasi fatvo bo‘limi boshlig‘i Abdulhamid Tursunov, Abdulloh hoji Ismoilov, yuridik fanlar doktori, professor Halim Boboev, iqtisod fanlari nomzodi, “Farzandnoma” kitobi muallifi Obiddin Mahmudov ham fikr-mulohazalari va takliflari bilan o‘rtoqlashishdi.
“Hilol-nashr” nashriyoti matbaa majmuasi 2010 yildan matbaa faoliyatini boshlagan. 2011 yilda nashriyot uchun litsenziya olingan, 2012 yildan diniy-ma’rifiy va ilmiy kitoblar nashr etila boshlangan.
Hozirda nashriyot kitoblari Qozog‘iston, Qirg‘iziston, Rossiya va Janubiy Koreyaga eksport qilinmoqda. Toshkentda 2 ta (Chorsu va Ko‘kcha filiallari), Andijon, Namangan, Marg‘ilon, Asaka, Samarqand, Denov, Urganch filiallari mavjud. Markaziy majmua Toshkent shahri, So‘galli ota ko‘chasi, 5-uyda joylashgan.
“Hilol-nashr” nashriyoti bosma va elektron kitoblarini kitoblardunyosi.uz va e-hilolnashr.uz saytlari orqali onlayn sotib olish ham yo‘lga qo‘yilgan.
