Покистон Ислом Республикаси президенти Имом Бухорий ва Ҳазрати Имом мажмуаларини зиёрат қилди

Покистон Ислом Республикаси президенти Мамнун Ҳусейн Шанхай Ҳамкорлик Ташкилоти давлат раҳбарлари кенгашининг навбатдаги мажлисида иштирок этиш учун 2016 йил 22 июнь куни Ўзбекистонга ташриф буюрди. Кеча Покистон Ислом Республикаси Президенти Мамнун Ҳусейн бошчилигидаги тўққиз кишилик делегация Имом Бухорий мажмуасига ташриф буюрди. Олий тоифали меҳмон дастлаб, ҳадис илмининг султони, Бухорий ҳазратларининг қабрини зиёрат этиб, у кишига бўлган юксак эҳтиромини билдирди, дея хабар қилади Ўзбекистон мусулмонлар идораси сайти.

Мажмуа тарихи билан танишиб, дунё аҳли тан олган буюк имомга кўрсатилаётган давлат даражасидаги эътибордан беҳад шодланган Мамнун Ҳусейн Ўзбекистонда диний соҳада олиб борилаётган ислоҳотларга юксак баҳо берди. Кўплаб уламоларга бешик бўлган Ўзбекистон диёри бугун ҳам Ислом дини ривожига ҳисса қўшиб, дунё ҳамжамиятида муносиб ўрин топиб бораётганини таъкидлади.

Юқори мартабали меҳмон мажмуадаги тарихий чинорлар остида мажмуанинг ташриф китобига ўзининг эзгу тилакларини ёзиб қолдирди ва масжид имомига Қуръони карим китобини совға қилди.

Бугун олий мартабали меҳмон “Ҳазрати Имом” мажмуасини зиёрат қилди. Покистон президентига буюк аждодларимизнинг бой маънавий мероси, уни ўрганиш ва кенг тарғиб этиш борасида амалга оширилаётган ишлар, “Мўйи Муборак” ва “Бароқхон” мадрасалари тарихи, мустақиллик йилларида ушбу масканда амалга оширилган беқиёс бунёдкорлик ва ободонлаштириш ишлари ҳақида сўзлаб берилди.

Шунингдек, “Бароқхон” мадрасасида жойлашган миллий ҳунармандчилик буюмлари намойиши ҳам Покистон президентида катта таассурот қолдирди.

* * *

Pokiston Islom Respublikasi prezidenti Mamnun Huseyn Shanxay Hamkorlik Tashkiloti davlat rahbarlari kengashining navbatdagi majlisida ishtirok etish uchun 2016 yil 22 iyun kuni O‘zbekistonga tashrif buyurdi. Kecha Pokiston Islom Respublikasi Prezidenti Mamnun Huseyn boshchiligidagi to‘qqiz kishilik delegatsiya Imom Buxoriy majmuasiga tashrif buyurdi. Oliy toifali mehmon dastlab, hadis ilmining sultoni, Buxoriy hazratlarining qabrini ziyorat etib, u kishiga bo‘lgan yuksak ehtiromini bildirdi, deya xabar qiladi O‘zbekiston musulmonlar idorasi sayti.

Majmua tarixi bilan tanishib, dunyo ahli tan olgan buyuk imomga ko‘rsatilayotgan davlat darajasidagi e’tibordan behad shodlangan Mamnun Huseyn O‘zbekistonda diniy sohada olib borilayotgan islohotlarga yuksak baho berdi. Ko‘plab ulamolarga beshik bo‘lgan O‘zbekiston diyori bugun ham Islom dini rivojiga hissa qo‘shib, dunyo hamjamiyatida munosib o‘rin topib borayotganini ta’kidladi.

Yuqori martabali mehmon majmuadagi tarixiy chinorlar ostida majmuaning tashrif kitobiga o‘zining ezgu tilaklarini yozib qoldirdi va masjid imomiga Qur’oni karim kitobini sovg‘a qildi.

Bugun oliy martabali mehmon “Hazrati Imom” majmuasini ziyorat qildi. Pokiston prezidentiga buyuk ajdodlarimizning boy ma’naviy merosi, uni o‘rganish va keng targ‘ib etish borasida amalga oshirilayotgan ishlar, “Mo‘yi Muborak” va “Baroqxon” madrasalari tarixi, mustaqillik yillarida ushbu maskanda amalga oshirilgan beqiyos bunyodkorlik va obodonlashtirish ishlari haqida so‘zlab berildi.

Shuningdek, “Baroqxon” madrasasida joylashgan milliy hunarmandchilik buyumlari namoyishi ham Pokiston prezidentida katta taassurot qoldirdi.

• Олдинги
• Кейинги