TAS-IX тармоғида янги диний-маърифий медиа-сайт ишга туширилди

Рукн: Янгиликлар Чоп этилган: 29.04.2016

Ўзбекистон мусулмонлари идорасининг muslim.uz веб портали тизимида mp3muslim.uz номли диний-маърифий медиа-сайт ишга туширилди. Унда юртимиздаги таниқли уламоларнинг мавъизалари, дунёдаги машҳур қориларнинг Қуръони карим тиловатлари ва воизларнинг аудио ривоятлари, салавотлари жойлаштирилган.

Тошкент шаҳридаги “Ҳазрати Али” жомеъ масжиди имом хатиби устоз Салоҳиддин Абдуғаффор ўғли, Бухоро шаҳридаги “Хўжа Таббанд” жомеъ масжиди имом хатиби Азизхўжа Хайруллоҳ ўғли ва Тошкент шаҳридаги “Шайх Зайниддин” жомеъ масжиди имом хатиби Одилхон қори Юнусхон ўғлининг маърузалари киритилган.

Яқин кунларда Шайх Муҳаммад Содиқ Муҳаммад Юсуф раҳимаҳуллоҳ, Шайх Абдулазиз Мансур, муфтий Усмонхон Алимов, “Минор” жомеъ масжиди имом хатиби Анвар қори Турсунов, “Тўхтабой” жомеъ масжиди имом хатиби Исҳоқ Муҳаммад, “Мирза Юсуф” жомеъ масжиди имом хатиби Раҳматуллоҳ Сайфуддинов, “Хўжа Аламбардор” жомеъ масжиди имом хатиби Раҳимберди Раҳмонов маърузалари ҳам киритилиши режалаштирилган.

Сайтнинг Қуръони карим бўлимига жаҳонга машҳур қоридан Халил Ҳусорий, Тавфиқ ибн Саид, Абдураҳмон Судайс, Абу Бакр Шатрий, Моҳир ал-Муайқили қироатлари тўлиқ шаклда жойлаштирилган. Тингловчиларга қулайлик бўлиши учун сайтда бўлимлар, мавзулар, муаллифлар бўйича излаш тизими мавжуд.

* * *

O‘zbekiston musulmonlari idorasining muslim.uz veb portali tizimida mp3muslim.uz nomli diniy-ma’rifiy media-sayt ishga tushirildi. Unda yurtimizdagi taniqli ulamolarning mav’izalari, dunyodagi mashhur qorilarning Qur’oni karim tilovatlari va voizlarning audio rivoyatlari, salavotlari joylashtirilgan.

Toshkent shahridagi “Hazrati Ali” jome’ masjidi imom xatibi ustoz Salohiddin Abdug‘affor o‘g‘li, Buxoro shahridagi “Xo‘ja Tabband” jome’ masjidi imom xatibi Azizxo‘ja Xayrulloh o‘g‘li va Toshkent shahridagi “Shayx Zayniddin” jome’ masjidi imom xatibi Odilxon qori Yunusxon o‘g‘lining ma’ruzalari kiritilgan.

Yaqin kunlarda Shayx Muhammad Sodiq Muhammad Yusuf rahimahulloh, Shayx Abdulaziz Mansur, muftiy Usmonxon Alimov, “Minor” jome’ masjidi imom xatibi Anvar qori Tursunov, “To‘xtaboy” jome’ masjidi imom xatibi Ishoq Muhammad, “Mirza Yusuf” jome’ masjidi imom xatibi Rahmatulloh Sayfuddinov, “Xo‘ja Alambardor” jome’ masjidi imom xatibi Rahimberdi Rahmonov ma’ruzalari ham kiritilishi rejalashtirilgan.

Saytning Qur’oni karim bo‘limiga jahonga mashhur qoridan Xalil Husoriy, Tavfiq ibn Said, Abdurahmon Sudays, Abu Bakr Shatriy, Mohir al-Muayqili qiroatlari to‘liq shaklda joylashtirilgan. Tinglovchilarga qulaylik bo‘lishi uchun saytda bo‘limlar, mavzular, mualliflar bo‘yicha izlash tizimi mavjud.