Ўзбекистон халқ ёзувчиси Тоҳир Маликнинг китоблари тақдимоти бўлиб ўтди

“Китоб олами” марказида Ўзбекистон халқ ёзувчиси Тоҳир Маликнинг “Ҳилол-нашр” нашриётида чоп этилган “Меҳмон туйғулар”, “Фалак”, “Зулмат салтанати” китобларининг тақдимоти бўлиб ўтди. Ёзувчи ва китобхонлар иштирок этган учрашув мазмунли ўтди. Тоҳир Малик мухлисларнинг саволларига атрофлича жавоб бердилар. Учрашув сўнггида энг яхши савол эгаларига муаллифнинг совғалари тақдим этилди.

Ўзбекистон халқ ёзувчиси Тоҳир Маликнинг “Меҳмон туйғулар” китобига жамланган фалсафий фикрларнинг айримлари билан азиз мухлислар «Иймонлашиш умиди», «Тош қалбларга назар солинмас» каби тўпламлари орқали танишган бўлишлари мумкин. Мазкур китобни нашрга тайёрлашда адиб кўп янгиликлар киритди. Дунёни тушунишга хизмат қилувчи янги ҳикматлар билан бойитди. Ёзувчи ҳаёт фалсафасига доир кузатишлари, фикрларини тўлдирган бу тўплам ҳам китобхонларни бефарқ қолдирмайди.

“Фалак” асарлар тўпламига адибнинг фантастика тарзида ва тарихий йўналишда яратган асарлари киритилди. Бу асарлар турли йилларда ёзилган бўлса-да, бу тўпламга тартиб бериш жараёнида таҳрирлар, тузатишлар ва кўшимчалар киритилди.

“Зулмат салтанати” китобида адиб бизларни энг ёмон иллат ҳақидаги суҳбатга чорлайди. Ҳеч биримизга сир эмаски, майхўрликка, гиёҳвандликка берилганлар, адашган бандалар орасида ўзимиз учун энг ардоқли бўлмиш инсонлар – бировимизнинг ота-онамиз, бировимизнинг оға-иниларимиз, яна бировимизнинг фарзандимиз, яқин ёки узоқроқ қариндошимиз, қўшнимиз, ҳамкасбимиз... ҳам бор. Эҳтимол улар ҳидоятдан адашганларини биларлар, эҳтимолки, билмаслар. Билмаганларга билдириб қўйиш вазифамиз эмасми? Эҳтимол улар жаҳолат ва гуноҳлар жаридан қутулмоқчилару аммо тўғри йўлга чиқишга кучлари етмаётгандир. Уларга ёрдам қўлини узатиб, иймонсизликдан қутулишга кўмаклашиш бурчимиз эмасми? Мазкур китоб ана шу хайрли ишимизда кўмак берар, иншааллоҳ!

Мазкур китобларни юртимиз китоб дўконларидан, шунингдек http://hilolnashr.uz/ сайти орқали электрон тарзда сотиб олишингиз мумкин.

* * *

“Kitob olami” markazida O‘zbekiston xalq yozuvchisi Tohir Malikning “Hilol-nashr” nashriyotida chop etilgan “Mehmon tuyg‘ular”, “Falak”, “Zulmat saltanati” kitoblarining taqdimoti bo‘lib o‘tdi. Yozuvchi va kitobxonlar ishtirok etgan uchrashuv mazmunli o‘tdi. Tohir Malik muxlislarning savollariga atroflicha javob berdilar. Uchrashuv so‘nggida eng yaxshi savol egalariga muallifning sovg‘alari taqdim etildi.

O‘zbekiston xalq yozuvchisi Tohir Malikning “Mehmon tuyg‘ular” kitobiga jamlangan falsafiy fikrlarning ayrimlari bilan aziz muxlislar «Iymonlashish umidi», «Tosh qalblarga nazar solinmas» kabi to‘plamlari orqali tanishgan bo‘lishlari mumkin. Mazkur kitobni nashrga tayyorlashda adib ko‘p yangiliklar kiritdi. Dunyoni tushunishga xizmat qiluvchi yangi hikmatlar bilan boyitdi. Yozuvchi hayot falsafasiga doir kuzatishlari, fikrlarini to‘ldirgan bu to‘plam ham kitobxonlarni befarq qoldirmaydi.

“Falak” asarlar to‘plamiga adibning fantastika tarzida va tarixiy yo‘nalishda yaratgan asarlari kiritildi. Bu asarlar turli yillarda yozilgan bo‘lsa-da, bu to‘plamga tartib berish jarayonida tahrirlar, tuzatishlar va ko‘shimchalar kiritildi.

“Zulmat saltanati” kitobida adib bizlarni eng yomon illat haqidagi suhbatga chorlaydi. Hech birimizga sir emaski, mayxo‘rlikka, giyohvandlikka berilganlar, adashgan bandalar orasida o‘zimiz uchun eng ardoqli bo‘lmish insonlar – birovimizning ota-onamiz, birovimizning og‘a-inilarimiz, yana birovimizning farzandimiz, yaqin yoki uzoqroq qarindoshimiz, qo‘shnimiz, hamkasbimiz... ham bor. Ehtimol ular hidoyatdan adashganlarini bilarlar, ehtimolki, bilmaslar. Bilmaganlarga bildirib qo‘yish vazifamiz emasmi? Ehtimol ular jaholat va gunohlar jaridan qutulmoqchilaru ammo to‘g‘ri yo‘lga chiqishga kuchlari yetmayotgandir. Ularga yordam qo‘lini uzatib, iymonsizlikdan qutulishga ko‘maklashish burchimiz emasmi? Mazkur kitob ana shu xayrli ishimizda ko‘mak berar, inshaalloh!

Mazkur kitoblarni yurtimiz kitob do‘konlaridan, shuningdek http://hilolnashr.uz/ sayti orqali elektron tarzda sotib olishingiz mumkin.

• Олдинги
• Кейинги