Одилхон қори Юнусхон ўғлининг “Жаннат калити” китоби чоп этилди

Шайхонтоҳур тумани бош имом-хатиби, "Шайх Зайниддин" жоме масжиди имом-хатиби Одилхон қори Юнусхон ўғлининг “Жаннат калити” номли навбатдаги китоби нашрдан чиқди. Мазкур китоб мўмин учун энг зарур ва гўзал фазилат саналмиш сабр ҳақида.

Бу фазилат тўғрисида Расуллуллоҳ саллоллоҳу алайҳи васаллам ўз муборак ҳадисларида “Сабр - жаннатнинг калитидир”, деб марҳамат қилганлар. Ҳазрат Навоий: "Иймоннинг ярми сабр, ярми шукр", дея таълиф этган сабр фазилати айниқса, бугун инсонларни чалғитувчи турли воситалар кўпайган бир пайтда, ғоят муҳим масалага айланди. Бесабрлик орқали содир бўлаётган турли кўнгилсизликлар, жиноятлар, жанжаллар, оилавий низоларни барчамиз кўриб, кузатиб турибмиз.

Муаллиф китобда ана шундай муҳим мавзуни қаламга олган. Асарда уламоларнинг сабр ҳақидаги қимматли фикрлари, сабрнинг фазилати, турлари, унинг ҳукмлари, сабрсизлик оқибати ва шу каби муҳим масалалар ҳақида сўз юритилган.

Одилхон қори Юнусхон ўғли 1977 йили Наманган шаҳрида туғилган. 1993-1994 йилларда Наманган Давлат Университети қошидаги араб тили таржимонлиги курсида таҳсил олган. 2002 йилда “Имом ал-Бухорий” номли Тошкент Ислом Институтини тамомлаган. Одилхон қори Юнусхон ҳожи ўғлининг «Кенг ризқ ва барака омиллари», (Зиёвуддин Раҳим билан ҳаммуаллифликда, 2011), “Тажвид қоидалари” (Зиёвуддин Раҳим билан ҳаммуаллифликда, 2011), «Қўшничилик ҳақлари ва одоблари» (2012), “Таҳорат китоби” (Зиёвуддин Раҳим билан ҳаммуаллифликда, 2014), “Соғлом эътиқод – мўминга нажот” (Сайфиддин Сайфуллоҳ билан ҳаммуаллифликда, 2014), “Энг буюк неъмат” (2014), “Ғазабнинг давоси” (2014) китоблари чоп этилган.

* * *

Shayxontohur tumani bosh imom-xatibi, "Shayx Zayniddin" jome masjidi imom-xatibi Odilxon qori Yunusxon o‘g‘lining “Jannat kaliti” nomli navbatdagi kitobi nashrdan chiqdi. Mazkur kitob mo‘min uchun eng zarur va go‘zal fazilat sanalmish sabr haqida.

Bu fazilat to‘g‘risida Rasullulloh sallollohu alayhi vasallam o‘z muborak hadislarida “Sabr - jannatning kalitidir”, deb marhamat qilganlar. Hazrat Navoiy: "Iymonning yarmi sabr, yarmi shukr", deya ta’lif etgan sabr fazilati ayniqsa, bugun insonlarni chalg‘ituvchi turli vositalar ko‘paygan bir paytda, g‘oyat muhim masalaga aylandi. Besabrlik orqali sodir bo‘layotgan turli ko‘ngilsizliklar, jinoyatlar, janjallar, oilaviy nizolarni barchamiz ko‘rib, kuzatib turibmiz.

Muallif kitobda ana shunday muhim mavzuni qalamga olgan. Asarda ulamolarning sabr haqidagi qimmatli fikrlari, sabrning fazilati, turlari, uning hukmlari, sabrsizlik oqibati va shu kabi muhim masalalar haqida so‘z yuritilgan.

Odilxon qori Yunusxon o‘g‘li 1977 yili Namangan shahrida tug‘ilgan. 1993-1994 yillarda Namangan Davlat Universiteti qoshidagi arab tili tarjimonligi kursida tahsil olgan. 2002 yilda “Imom al-Buxoriy” nomli Toshkent Islom Institutini tamomlagan. Odilxon qori Yunusxon hoji o‘g‘lining «Keng rizq va baraka omillari», (Ziyovuddin Rahim bilan hammualliflikda, 2011), “Tajvid qoidalari” (Ziyovuddin Rahim bilan hammualliflikda, 2011), «Qo‘shnichilik haqlari va odoblari» (2012), “Tahorat kitobi” (Ziyovuddin Rahim bilan hammualliflikda, 2014), “Sog‘lom e’tiqod – mo‘minga najot” (Sayfiddin Sayfulloh bilan hammualliflikda, 2014), “Eng buyuk ne’mat” (2014), “G‘azabning davosi” (2014) kitoblari chop etilgan.

• Олдинги
• Кейинги