“Йилига 250 нафардан ортиқ диний кадрлар тайёрланмоқда”

— Ҳозирги кунда Ўзбекистон Мусулмонлари идораси тасарруфида нечта диний таълим муассасалари фаолият юритмоқда?
— Ўзбекистон мусулмонлари идораси тизимида битта олий (Тошкент Ислом институти), 9 та ўрта махсус таълим муассасалари (Тошкентда «Кўкалдош», Бухорода «Мирараб», Андижонда «Саййид Муҳйиддин Махдум», Наманганда «Мулла Қирғиз», Китобда «Хожа Бухорий», Урганчда «Фахриддин ар-Розий», Нукусда «Муҳаммад ал-Беруний» ўрта махсус Ислом билим юртлари, шунингдек Тошкентда «Хадичаи Кубро», Бухорода «Жўйбори калон» аёл-қизлар ўрта махсус Ислом билим юртлари) ҳамда имомларни қайта тайёрлайдиган Имом ал-Бухорий халқаро маркази мавжуд. 2003 йил 22 августдаги Ўзбекистон Республикаси Вазирлар Маҳкамасининг "Дин соҳасидаги маънавий, маърифий, таълим шароитларини ва фаолиятини янада такомиллаштиришда ижтимоий кўмак ва имтиёзлар бериш тўғрисида"ги қарорига асосан Тошкент Ислом институти ва ўрта махсус ислом билим юртларида жорий этилган таълим стандартлари, ўқув режалари ҳамда талабаларнинг қабул қилинган давлат меъёрларига мувофиқ диний ва дунёвий билимлар олаётганини инобатга олиниб, мазкур ўқув юртларининг битирувчиларига бериладиган дипломлар давлат таълим ҳужжати сифатида эътироф этилди ва ана шу ҳужжат (диплом)ларга эга бўлган шахсларга давлат олий таълим тизимида ўқишни давом эттириш ҳуқуқи берилди.
 
— Ушбу таълим муассасалари томонидан йилига қанча диний кадрлар тайёрланмоқда?
— Ўзбекистон Мусулмонлари идораси тасарруфидаги диний таълим муассасаларда йилига 200 нафардан ортиқ ўрта махсус маълумотга эга кадрлар ҳамда 50 нафар олий маълумотли диний мутахассислар тайёрланмоқда. Идорамиз томонидан битирувчиларга тақсимот асосида иш жойи тайин қилинади. Жорий ўқув йилида 20 нафардан ортиқ ўрта махсус таълим муассасаси битирувчилари олий таълим муассасаларига кирдилар.

— Тизимдаги таълим муассасаларига кириш учун қандай хужжатлар керак бўлади?
— Тошкент ислом институтига абитуриентлар 20 июндан 20 июлгача қуйидаги ҳужжатларни тақдим этишлари керак:
- Ректор номига ариза.
- Маълумоти ҳақида ҳужжат: аттестат ёки ўрта махсус ислом билим юртини битирганлиги ҳақида диплом (асли).
- Яшаш жойидаги масжид имомидан йўлланма.
- Соғлиғи ҳақида тиббий маълумотнома (У-086-шаклида).
- 6 дона 3x4 ҳажмда фотосурат.
- Паспорт нусхаси (асли кўрсатилади).
- Яшаш жойидан маълумотнома.
- Ҳарбий хизматга алоқадорлиги ҳақида ҳужжат (асли).
Ўрта махсус ислом билим юртларига абитуриентлар 20 июндан 10 июлгача қуйидаги ҳужжатларни тақдим этишлари керак:
- Билим юрти мудири номига ариза.
- Маълумоти ҳақида ҳужжат (асли).
- Яшаш жойидаги масжид имомидан йўлланма.
- Соғлиғи ҳақида тиббий маълумотнома (У-086-шаклида).
- 6 дона 3x4 ҳажмда фотосурат.
- Туғилганлик ҳақида гувоҳнома ёки паспорт нусхаси (асли кўрсатилади).
- Яшаш жойидан маълумотнома.
- 16 ёшдан катталар учун ҳарбий хизматга алоқадорлиги ҳақида ҳужжат (асли).

— Имтиҳонлар қайси фанлардан ва қачон ўтказилади? Синов натижалари қачон эълон қилинади?
— Тошкент Ислом институтида 2014 йил 23-24 июль кунлари чет тили ҳамда маънавият ва маърифатдан оғзаки ижодий имтиҳон, 1 август куни она тили ва адабиёти ҳамда Ўзбекистон тарихидан тест синови бўлиб ўтади. 3 август куни имтиҳон натижалари эълон қилинади. Диний ўрта-махсус таълим муассасалари орасида ўтказиладиган ягона олимпиада ғолиби институтга имтиҳонсиз кириш ҳуқуқига ҳамда Ўзбекистон мусулмонлари идораси гранти асосида бепул ўқиш имконига эга бўлади. Бошқа талабалар контракт асосида ўқийдилар.
Ўрта махсус ислом билим юртларига ҳужжат қабул қилишдан аввал абитуриент билан маънавий-маърифий суҳбат ўтказилади. 2014 йил 16 июль куни она тилидан диктант, тарих, чет тили ҳамда Маънавият ва маърифатдан тест синови бўлиб ўтади. 17 июль имтиҳон натижалари эълон қилинади. Қабул имтиҳонлари материаллари тўкқиз йиллик мактаб дастури асосида тузилади. Таълим 4 йиллик муддатда, шартнома асосида амалга оширилади.

— Имтиҳонларнинг холис ва шаффоф ўтишини таъминлаш учун қандай ишлар амалга оширилади?
— Имтиҳон саволлари Ўзбекистон мусулмонлари диний идорасининг таълим ва кадрлаш тайёрлаш бўлимида тузилиб, муфтий ҳазратлари томонидан тайинланган махсус кузатувчилар томонидан синовлар ўтказиладиган жойга олиб борилади. Имтиҳон куни абитуриентлар ва уларнинг ота-оналари ҳузурида муҳрланган синов варақалари очилади ҳамда гувоҳлар асосида далолатномалар тўлдирилади. Шунингдек, кузатувчилар имтиҳонларнинг адолатли ўтишини таъминлайдилар.

— Hozirgi kunda O‘zbekiston Musulmonlari idorasi tasarrufida nechta diniy ta’lim muassasalari faoliyat yuritmoqda?
— O‘zbekiston musulmonlari idorasi tizimida bitta oliy (Toshkent Islom instituti), 9 ta o‘rta maxsus ta’lim muassasalari (Toshkentda «Ko‘kaldosh», Buxoroda «Mirarab», Andijonda «Sayyid Muhyiddin Maxdum», Namanganda «Mulla Qirg‘iz», Kitobda «Xoja Buxoriy», Urganchda «Faxriddin ar-Roziy», Nukusda «Muhammad al-Beruniy» o‘rta maxsus Islom bilim yurtlari, shuningdek Toshkentda «Xadichai Kubro», Buxoroda «Jo‘ybori kalon» ayol-qizlar o‘rta maxsus Islom bilim yurtlari) hamda imomlarni qayta tayyorlaydigan Imom al-Buxoriy xalqaro markazi mavjud. 2003 yil 22 avgustdagi O‘zbekiston Respublikasi Vazirlar Mahkamasining "Din sohasidagi ma’naviy, ma’rifiy, ta’lim sharoitlarini va faoliyatini yanada takomillashtirishda ijtimoiy ko‘mak va imtiyozlar berish to‘g‘risida"gi qaroriga asosan Toshkent Islom instituti va o‘rta maxsus islom bilim yurtlarida joriy etilgan ta’lim standartlari, o‘quv rejalari hamda talabalarning qabul qilingan davlat me’yorlariga muvofiq diniy va dunyoviy bilimlar olayotganini inobatga olinib, mazkur o‘quv yurtlarining bitiruvchilariga beriladigan diplomlar davlat ta’lim hujjati sifatida e’tirof etildi va ana shu hujjat (diplom)larga ega bo‘lgan shaxslarga davlat oliy ta’lim tizimida o‘qishni davom ettirish huquqi berildi.
 
— Ushbu ta’lim muassasalari tomonidan yiliga qancha diniy kadrlar tayyorlanmoqda?
— O‘zbekiston Musulmonlari idorasi tasarrufidagi diniy ta’lim muassasalarda yiliga 200 nafardan ortiq o‘rta maxsus ma’lumotga ega kadrlar hamda 50 nafar oliy ma’lumotli diniy mutaxassislar tayyorlanmoqda. Idoramiz tomonidan bitiruvchilarga taqsimot asosida ish joyi tayin qilinadi. Joriy o‘quv yilida 20 nafardan ortiq o‘rta maxsus ta’lim muassasasi bitiruvchilari oliy ta’lim muassasalariga kirdilar.

— Tizimdagi ta’lim muassasalariga kirish uchun qanday xujjatlar kerak bo‘ladi?
— Toshkent islom institutiga abiturientlar 20 iyundan 20 iyulgacha quyidagi hujjatlarni taqdim etishlari kerak:
- Rektor nomiga ariza.
- Ma’lumoti haqida hujjat: attestat yoki o‘rta maxsus islom bilim yurtini bitirganligi haqida diplom (asli).
- Yashash joyidagi masjid imomidan yo‘llanma.
- Sog‘lig‘i haqida tibbiy ma’lumotnoma (U-086-shaklida).
- 6 dona 3x4 hajmda fotosurat.
- Pasport nusxasi (asli ko‘rsatiladi).
- Yashash joyidan ma’lumotnoma.
- Harbiy xizmatga aloqadorligi haqida hujjat (asli).
O‘rta maxsus islom bilim yurtlariga abiturientlar 20 iyundan 10 iyulgacha quyidagi hujjatlarni taqdim etishlari kerak:
- Bilim yurti mudiri nomiga ariza.
- Ma’lumoti haqida hujjat (asli).
- Yashash joyidagi masjid imomidan yo‘llanma.
- Sog‘lig‘i haqida tibbiy ma’lumotnoma (U-086-shaklida).
- 6 dona 3x4 hajmda fotosurat.
- Tug‘ilganlik haqida guvohnoma yoki pasport nusxasi (asli ko‘rsatiladi).
- Yashash joyidan ma’lumotnoma.
- 16 yoshdan kattalar uchun harbiy xizmatga aloqadorligi haqida hujjat (asli).

— Imtihonlar qaysi fanlardan va qachon o‘tkaziladi? Sinov natijalari qachon e’lon qilinadi?
— Toshkent Islom institutida 2014 yil 23-24 iyul kunlari chet tili hamda ma’naviyat va ma’rifatdan og‘zaki ijodiy imtihon, 1 avgust kuni ona tili va adabiyoti hamda O‘zbekiston tarixidan test sinovi bo‘lib o‘tadi. 3 avgust kuni imtihon natijalari e’lon qilinadi. Diniy o‘rta-maxsus ta’lim muassasalari orasida o‘tkaziladigan yagona olimpiada g‘olibi institutga imtihonsiz kirish huquqiga hamda O‘zbekiston musulmonlari idorasi granti asosida bepul o‘qish imkoniga ega bo‘ladi. Boshqa talabalar kontrakt asosida o‘qiydilar.
O‘rta maxsus islom bilim yurtlariga hujjat qabul qilishdan avval abiturient bilan ma’naviy-ma’rifiy suhbat o‘tkaziladi. 2014 yil 16 iyul kuni ona tilidan diktant, tarix, chet tili hamda Ma’naviyat va ma’rifatdan test sinovi bo‘lib o‘tadi. 17 iyul imtihon natijalari e’lon qilinadi. Qabul imtihonlari materiallari to‘kqiz yillik maktab dasturi asosida tuziladi. Ta’lim 4 yillik muddatda, shartnoma asosida amalga oshiriladi.

— Imtihonlarning xolis va shaffof o‘tishini ta’minlash uchun qanday ishlar amalga oshiriladi?
— Imtihon savollari O‘zbekiston musulmonlari diniy idorasining ta’lim va kadrlash tayyorlash bo‘limida tuzilib, muftiy hazratlari tomonidan tayinlangan maxsus kuzatuvchilar tomonidan sinovlar o‘tkaziladigan joyga olib boriladi. Imtihon kuni abiturientlar va ularning ota-onalari huzurida muhrlangan sinov varaqalari ochiladi hamda guvohlar asosida dalolatnomalar to‘ldiriladi. Shuningdek, kuzatuvchilar imtihonlarning adolatli o‘tishini ta’minlaydilar.

• Олдинги
• Кейинги