Жалолиддин Нуриддинов: “Бу йил 1000 га яқин масжидларимизда хатми Қуръон ўтказилади”

Рукн: Суҳбатлар Чоп этилган: 25.05.2017

Ўзбекистон мусулмонлари идораси матбуот котиби Жалолиддин Нуриддинов билан суҳбат

Жалолиддин Нуриддинов 1952 йили Тошкент шаҳрида туғилган. Тошкент Давлат университети шарқ факультети араб бўлимини тугатган. Араб мамлакатларида таржимон, халқ таълими муассасаларида ўқитувчи, мактаб директори (1986-95), Дин ишлари бўйича қўмита ходими, бўлим бошлиғи (1995-1998), Тошкент давлат Шарқшунослик институти тарих ва шарқ тиллари лицейи директори (1998-2000), Тошкент ислом университетида илмий ходим, Ўзбекистон мусулмонлари идораси Таълим ва кадрлар тайёрлаш бўлими мудири (2001-2013) бўлиб ишлаган. 2013 йил ноябридан Ўзбекистон мусулмонлари идораси матбуот котиби. Ўзбекистон мусулмонлари идораси таълим муассасалари талабалари учун ёзилган қатор дарслик ва қўлланмаларга ҳаммуаллифлик қилган. “Ҳидоят” журнали, “Ислом нури” газетаси ва “Муслим.уз” сайтида долзарб мавзуларда қатор илмий-оммабоп  мақолалари эълон қилинган.

— Ассалому алайкум. Устоз, ҳадемай муборак Рамазон ойи бошланади. Ўзбекистон мусулмонлари идораси аввалги йиллардан фарқли ўлароқ ушбу мавсумга қандай туҳфалар ҳозирлади?

— Бисмиллаҳир роҳманир роҳим. Аллоҳ таолога ҳамду санолар, Пайғам­баримизга саловоту саломлар бўлсин. Ҳар бир мўмин муборак Рамазон бошланишини соғиниб, катта тайёргарлик билан кутиб олишади. Диний идорамиз томонидан Рамазонга тайёргарлик ҳам ана шундай шукуҳ билан адо этилди.

Бу борада Ўзбекистон мусулмонлари идораси томонидан “2017 йилги Рамазон ойи ва ҳайити муносабати билан амалга ошириладиган чора-тадбирлар режаси” тасдиқланди. 2017 йил 18 май куни “Ўзбекистон мусулмонлари идораси тизимидаги масжидларда муборак Рамазон ойини муносиб кутиб олиш, кўтаринки руҳда ўтказиш, ибодат қилувчилар учун зарур шарт-шароитлар яратиш ва имом-хатибларда масъулият ҳиссини янада ошириш мақсадида” махсус буйруқ ишлаб чиқилди. Унда мусулмонларга ҳар томонлама қулай шароитлар яратиш, жойларда ифторлик ва саҳарликларни ихчам, дабдабасиз шаклда ўтказилишини эътиборга олиш, саховатпеша кишиларни хайрия тадбирларига жалб қилишга қаратилган тушунтириш ишларини олиб бориш каби масалалар белгилаб берилди. Масжидларда тозалик, ободонлаштириш ишлари амалга оширилиб, унда масжидлар хонақо, айвон, таҳоратхоналарига эътибор берилиб, намозхонлар учун етарли шароитлар яратилди.

Шунингдек, Ўзбекистон мусулмонлари идорасининг буйруғига асосан диний идора тасарруфидаги билим юртлари ва Имом Бухорий халқаро марказида Рамазон ойини муносиб кутиб олиш учун тайёргарлик ишларига жиддий эътибор қаратилди. Рамазон ойи давомида педагог-ўқитувчилар, ишчи-ходимлар, талабалар ва марказ тингловчиларига қулай шарт-шароитлар яратиш, саҳарлик ва ифторлик дастурхонларини сифатли ҳамда ўз вақтида тайёрлаш бўйича кўрсатмалар берилди.  

— Юртимиздаги нечта масжидларда хатми Қуръон ўқилиши кутилмоқда?

— Маълумки, Мустақиллигимизнинг дастлабки йиллари малакали диний кадрлар, имомлар, хусусан ҳофизи Каломиллоҳ бўлган қорилар етишмаслиги сабабли, қатор қийинчиликларга дуч келинар эди. Рамазон кунлари таровеҳ намозида хатм 5-6 кунда ўқилиб, намозхонларга муайян қийинчиликлар туғилар эди. Бугунги кунда, алҳамдулиллаҳ, қориларимиз етарли.

Ўтган йили Рамазонда 900 га яқин масжидларда хатм қилинган бўлса, бу йил 1000 га яқин масжидларда хатми Қуръон тадбирлари ўтказилиши режалаштирилган. Ушбу тадбирларга юртимиздан етишиб чиққан қорилар жалб қилинади.

— Ўтган йиллари ўзбекистонлик қориларнинг бошқа давлатларда ҳам Қуръони карим хатмида қатнашганди. Бу йил ҳам ўзбекистонлик қорилар чет-элга юбориладими?

— Албатта, бу анъана жорий йилда ҳам давом эттирилади. Бу йилги Рамазон ойида Россия Федерацияси ва Украина мусулмонлари ва диний идораларнинг расмий илтимосларига кўра, хатми-Қуръон ва диний маросимларни ўтказиш учун юртимиз қорилари ушбу мамлакатларга сафарбар этиладилар.

— Юртимиз уламоларининг муборак Рамазон ойларида масжидларни зиёрат қилиб, мавъиза билан иштирок этишлари бу ой тароватига ўзгача файз бахш этади. Бу йил ҳам масжидларни зиёрат қилиш режалаштирилганми?

— Бу йилги Рамазонда муфтий Усмонхон Алимов ҳазратлари, Шайх Абдулазиз Мансур ҳазратлари, Абдулҳамид Турсунов, масжидлар бўлими мудири Муҳаммадназар Қаюмов ва идорамизнинг бошқа ходимлари Тошкент шаҳри ва вилоятлардаги масжидларга бориб, мусулмонларни табриклаб, 10-15 дақиқалик мавъизалар қилишлари режалаштирилган.  

Муборак Рамазон ойи барча Юртдош­ларимизга хайрли, баракотли келсин. Аллоҳ таоло бу ойнинг фазилатларидан тўлиқ баҳраманд этсин. 

Даврон Нурмуҳаммад (матн), Шаҳзод Шомансуров (сурат) | Muslim.uz

O‘zbekiston musulmonlari idorasi matbuot kotibi Jaloliddin Nuriddinov bilan suhbat

Jaloliddin Nuriddinov 1952 yili Toshkent shahrida tug‘ilgan. Toshkent Davlat universiteti sharq fakulteti arab bo‘limini tugatgan. Arab mamlakatlarida tarjimon, xalq ta’limi muassasalarida o‘qituvchi, maktab direktori (1986-95), Din ishlari bo‘yicha qo‘mita xodimi, bo‘lim boshlig‘i (1995-1998), Toshkent davlat Sharqshunoslik instituti tarix va sharq tillari litseyi direktori (1998-2000), Toshkent islom universitetida ilmiy xodim, O‘zbekiston musulmonlari idorasi Ta’lim va kadrlar tayyorlash bo‘limi mudiri (2001-2013) bo‘lib ishlagan. 2013 yil noyabridan O‘zbekiston musulmonlari idorasi matbuot kotibi. O‘zbekiston musulmonlari idorasi ta’lim muassasalari talabalari uchun yozilgan qator darslik va qo‘llanmalarga hammualliflik qilgan. “Hidoyat” jurnali, “Islom nuri” gazetasi va “Muslim.uz” saytida dolzarb mavzularda qator ilmiy-ommabop  maqolalari e’lon qilingan.

— Assalomu alaykum. Ustoz, hademay muborak Ramazon oyi boshlanadi. O‘zbekiston musulmonlari idorasi avvalgi yillardan farqli o‘laroq ushbu mavsumga qanday tuhfalar hozirladi?

— Bismillahir rohmanir rohim. Alloh taologa hamdu sanolar, Payg‘am­barimizga salovotu salomlar bo‘lsin. Har bir mo‘min muborak Ramazon boshlanishini sog‘inib, katta tayyorgarlik bilan kutib olishadi. Diniy idoramiz tomonidan Ramazonga tayyorgarlik ham ana shunday shukuh bilan ado etildi.

Bu borada O‘zbekiston musulmonlari idorasi tomonidan “2017 yilgi Ramazon oyi va hayiti munosabati bilan amalga oshiriladigan chora-tadbirlar rejasi” tasdiqlandi. 2017 yil 18 may kuni “O‘zbekiston musulmonlari idorasi tizimidagi masjidlarda muborak Ramazon oyini munosib kutib olish, ko‘tarinki ruhda o‘tkazish, ibodat qiluvchilar uchun zarur shart-sharoitlar yaratish va imom-xatiblarda mas’uliyat hissini yanada oshirish maqsadida” maxsus buyruq ishlab chiqildi. Unda musulmonlarga har tomonlama qulay sharoitlar yaratish, joylarda iftorlik va saharliklarni ixcham, dabdabasiz shaklda o‘tkazilishini e’tiborga olish, saxovatpesha kishilarni xayriya tadbirlariga jalb qilishga qaratilgan tushuntirish ishlarini olib borish kabi masalalar belgilab berildi. Masjidlarda tozalik, obodonlashtirish ishlari amalga oshirilib, unda masjidlar xonaqo, ayvon, tahoratxonalariga e’tibor berilib, namozxonlar uchun yetarli sharoitlar yaratildi.

Shuningdek, O‘zbekiston musulmonlari idorasining buyrug‘iga asosan diniy idora tasarrufidagi bilim yurtlari va Imom Buxoriy xalqaro markazida Ramazon oyini munosib kutib olish uchun tayyorgarlik ishlariga jiddiy e’tibor qaratildi. Ramazon oyi davomida pedagog-o‘qituvchilar, ishchi-xodimlar, talabalar va markaz tinglovchilariga qulay shart-sharoitlar yaratish, saharlik va iftorlik dasturxonlarini sifatli hamda o‘z vaqtida tayyorlash bo‘yicha ko‘rsatmalar berildi.  

— Yurtimizdagi nechta masjidlarda xatmi Qur’on o‘qilishi kutilmoqda?

— Ma’lumki, Mustaqilligimizning dastlabki yillari malakali diniy kadrlar, imomlar, xususan hofizi Kalomilloh bo‘lgan qorilar yetishmasligi sababli, qator qiyinchiliklarga duch kelinar edi. Ramazon kunlari taroveh namozida xatm 5-6 kunda o‘qilib, namozxonlarga muayyan qiyinchiliklar tug‘ilar edi. Bugungi kunda, alhamdulillah, qorilarimiz yetarli.

O‘tgan yili Ramazonda 900 ga yaqin masjidlarda xatm qilingan bo‘lsa, bu yil 1000 ga yaqin masjidlarda xatmi Qur’on tadbirlari o‘tkazilishi rejalashtirilgan. Ushbu tadbirlarga yurtimizdan yetishib chiqqan qorilar jalb qilinadi.

— O‘tgan yillari o‘zbekistonlik qorilarning boshqa davlatlarda ham Qur’oni karim xatmida qatnashgandi. Bu yil ham o‘zbekistonlik qorilar chet-elga yuboriladimi?

— Albatta, bu an’ana joriy yilda ham davom ettiriladi. Bu yilgi Ramazon oyida Rossiya Federatsiyasi va Ukraina musulmonlari va diniy idoralarning rasmiy iltimoslariga ko‘ra, xatmi-Qur’on va diniy marosimlarni o‘tkazish uchun yurtimiz qorilari ushbu mamlakatlarga safarbar etiladilar.

— Yurtimiz ulamolarining muborak Ramazon oylarida masjidlarni ziyorat qilib, mav’iza bilan ishtirok etishlari bu oy tarovatiga o‘zgacha fayz baxsh etadi. Bu yil ham masjidlarni ziyorat qilish rejalashtirilganmi?

— Bu yilgi Ramazonda muftiy Usmonxon Alimov hazratlari, Shayx Abdulaziz Mansur hazratlari, Abdulhamid Tursunov, masjidlar bo‘limi mudiri Muhammadnazar Qayumov va idoramizning boshqa xodimlari Toshkent shahri va viloyatlardagi masjidlarga borib, musulmonlarni tabriklab, 10-15 daqiqalik mav’izalar qilishlari rejalashtirilgan.  

Muborak Ramazon oyi barcha Yurtdosh­larimizga xayrli, barakotli kelsin. Alloh taolo bu oyning fazilatlaridan to‘liq bahramand etsin. 

Davron Nurmuhammad (matn), Shahzod Shomansurov (surat) | Muslim.uz