Таомланишда ҳам фарз борми?

Савол: Ассалому алайкум, сайт ходимлари. Таомланишнинг ҳам фарзлари бор экан деб эшитиб қолдим. Шуларни баён қилиб берсангизлар. (Абдулмавлон)

Жавоб: Таом ейишда ҳам фарз бор. Уларни билиш ва амал қилиш дунё ҳамда дин саодатининг муҳим омили ҳисобланади. “Фарзи айн” китобида таом ейишда тўрт фарз борлиги қайд қилинган. Улардан биринчиси халқум поклигидир. Яъни, тановул қилинаётган таом динимиз нуқтаи назаридан ҳалол бўлиши ва ҳалол йўллар билан топилиши лозим. Халқум поклигининг бу икки қанотини асраш имон тақозосидир.

Ризқнинг Аллоҳ таолодан эканига иқрор бўлиш таом ейишнинг иккинчи фарзидир. Ҳар бир мўминнинг эътиқоди шундай бўлиши керак. Зотан, Аллоҳ таолодан ўзга ризқ бергувчи йўқдир.

Учинчи фарзи – насибага рози бўлиш таом ейиш. Ризқни Аллоҳ таоло берар экан, кимга қанча беришни ҳам Ўзи билади. Аллоҳ таолонинг берганига рози бўлиб, уни зиёда этишни сўраш мўминнинг хислатидир.

Таом ейишнинг сўнгги фарзи – таом қувватини гуноҳга сарфламаслик. Ейилган нарсанинг танага қувват бўлиши Аллоҳ марҳаматидир. Бу қувватни гуноҳга эмас, тоатга сарфлаш эса айни убудийат бўлиши билан бирга, насибанинг фаровон бўлиши гарови. Зеро, шукр этиш неъматнинг зиёда бўлишига боисдир.

“Ирфон” тақвимининг 2010 йил, 1-сонидан олинди.

* * *

Savol: Assalomu alaykum, sayt xodimlari. Taomlanishning ham farzlari bor ekan deb eshitib qoldim. Shularni bayon qilib bersangizlar. (Abdulmavlon)

Javob: Taom yeyishda ham farz bor. Ularni bilish va amal qilish dunyo hamda din saodatining muhim omili hisoblanadi. “Farzi ayn” kitobida taom yeyishda to‘rt farz borligi qayd qilingan. Ulardan birinchisi xalqum pokligidir. Ya’ni, tanovul qilinayotgan taom dinimiz nuqtai nazaridan halol bo‘lishi va halol yo‘llar bilan topilishi lozim. Xalqum pokligining bu ikki qanotini asrash imon taqozosidir.

Rizqning Alloh taolodan ekaniga iqror bo‘lish taom yeyishning ikkinchi farzidir. Har bir mo‘minning e’tiqodi shunday bo‘lishi kerak. Zotan, Alloh taolodan o‘zga rizq berguvchi yo‘qdir.

Uchinchi farzi – nasibaga rozi bo‘lish taom yeyish. Rizqni Alloh taolo berar ekan, kimga qancha berishni ham O‘zi biladi. Alloh taoloning berganiga rozi bo‘lib, uni ziyoda etishni so‘rash mo‘minning xislatidir.

Taom yeyishning so‘nggi farzi – taom quvvatini gunohga sarflamaslik. Yeyilgan narsaning tanaga quvvat bo‘lishi Alloh marhamatidir. Bu quvvatni gunohga emas, toatga sarflash esa ayni ubudiyat bo‘lishi bilan birga, nasibaning farovon bo‘lishi garovi. Zero, shukr etish ne’matning ziyoda bo‘lishiga boisdir.

“Irfon” taqvimining 2010 yil, 1-sonidan olindi.

• Олдинги
• Кейинги