Зинодан қочиш мақсадида хуфёна никоҳ ўқитиш мумкинми?

Савол: Зинодан қочиб, ҳалоллик учун, Аллоҳ розилиги учун никоҳ ўқитишни икки инсон хоҳлаб домладан илтимос қилса-ю, у никоҳ ўқишни рад қилса, унинг бу иши уларни зинога йўллаш бўлмайдими?

Жавоб: Сиз бу ўринда домлани айбламанг. Сиз зино қилмайин деб никоҳланмоқчи экансиз, никоҳнинг шартларини бажариб қўйинг, ана шунда домла сизнинг никоҳингизни ўқиб қўяди.

Савол: Агарда бир аёл киши зино қилмаслик мақсадида хуфёна эрга теккан бўлсаю, ота-онаси уни бошқа кишига мажбуран узатиб юборса. Шу ҳолатда аввалги эри билан никоҳи бор, лекин ота-онаси узатган кишига ҳам никоҳ ўқитилса, бу қанақа бўлади? Аёл киши аввалги эридан жавобини олиши керакми? Ёки бу ҳолатда янги никоҳ ўқилганда аввалги никоҳи бекор бўлиб кетадими? Илтимос, ушбу масалага ойдинлик киритиб беринглар!

Жавоб: Бир эрнинг никоҳида бўла туриб, бошқа эрга никоҳ ўқитиш асло мумкин эмасдир. Бундай никоҳ боғланмайди. Бу иш ҳаром ишдир. Агар у аёл бир эрнинг никоҳи бўла туриб, “кейинги эри” билан жинсий алоқада бўлса, зинокор бўлади. Шунинг учун турмушга чиққанини ота-онасига билдириши лозимдир. Борди-ю, аввалги эридан талоқ олса ёки аввалги эри вафот эса, у аёл иддаси чиққанидан сўнг бошқа эрга турмушга чиқишга ҳақли бўлади. Валлоҳу аълам.

Савол: Кўп марта зино ҳолатлари рўй берган хонадон (квартира)да яшаш ҳукми қандай?

Жавоб: Фосиқлар ёки мусулмон бўлмаган кишилар яшаб, кўп гуноҳларни амалга оширган уйни ижарага олиб яшашнинг зарари йўқдир. Чунки мазкур уйга улардан сўнг мусулмон киши келиб, у уйни поклайди, у ерда намоз ўқийди, Аллоҳни зикр қилади, Қуръон тиловати қилади ва натижада шайтонлар маконига айланган уйни фариштали уйга айлантиради. Чунки мусулмон киши Аллоҳ таолога тоат қилиши билан ундай уйларни обод қилиб юборади. Валлоҳу аълам.

Ўзбекистон Мусулмонлари идораси Фатво ҳайъати

Savol: Zinodan qochib, halollik uchun, Alloh roziligi uchun nikoh o‘qitishni ikki inson xohlab domladan iltimos qilsa-yu, u nikoh o‘qishni rad qilsa, uning bu ishi ularni zinoga yo‘llash bo‘lmaydimi?

Javob: Siz bu o‘rinda domlani ayblamang. Siz zino qilmayin deb nikohlanmoqchi ekansiz, nikohning shartlarini bajarib qo‘ying, ana shunda domla sizning nikohingizni o‘qib qo‘yadi.

Savol: Agarda bir ayol kishi zino qilmaslik maqsadida xufyona erga tekkan bo‘lsayu, ota-onasi uni boshqa kishiga majburan uzatib yuborsa. Shu holatda avvalgi eri bilan nikohi bor, lekin ota-onasi uzatgan kishiga ham nikoh o‘qitilsa, bu qanaqa bo‘ladi? Ayol kishi avvalgi eridan javobini olishi kerakmi? Yoki bu holatda yangi nikoh o‘qilganda avvalgi nikohi bekor bo‘lib ketadimi? Iltimos, ushbu masalaga oydinlik kiritib beringlar!

Javob: Bir erning nikohida bo‘la turib, boshqa erga nikoh o‘qitish aslo mumkin emasdir. Bunday nikoh bog‘lanmaydi. Bu ish harom ishdir. Agar u ayol bir erning nikohi bo‘la turib, “keyingi eri” bilan jinsiy aloqada bo‘lsa, zinokor bo‘ladi. Shuning uchun turmushga chiqqanini ota-onasiga bildirishi lozimdir. Bordi-yu, avvalgi eridan taloq olsa yoki avvalgi eri vafot esa, u ayol iddasi chiqqanidan so‘ng boshqa erga turmushga chiqishga haqli bo‘ladi. Vallohu a’lam.

Savol: Ko‘p marta zino holatlari ro‘y bergan xonadon (kvartira)da yashash hukmi qanday?

Javob: Fosiqlar yoki musulmon bo‘lmagan kishilar yashab, ko‘p gunohlarni amalga oshirgan uyni ijaraga olib yashashning zarari yo‘qdir. Chunki mazkur uyga ulardan so‘ng musulmon kishi kelib, u uyni poklaydi, u yerda namoz o‘qiydi, Allohni zikr qiladi, Qur’on tilovati qiladi va natijada shaytonlar makoniga aylangan uyni farishtali uyga aylantiradi. Chunki musulmon kishi Alloh taologa toat qilishi bilan unday uylarni obod qilib yuboradi. Vallohu a’lam.

O‘zbekiston Musulmonlari idorasi Fatvo hay’ati

• Олдинги
• Кейинги