Рамазонда маст одамга ёрдам берса бўладими?

Рукн: Савол беринг Чоп этилган: 21.06.2016

Савол: Кўчада машинада кетаётган эдим. Қўлтиқтоёқ билан йўл бўйида ўтирган бир одам қўл кўтарди. Рўза пайти бир савоб қилай деб шу одамни машинамга олдим, лекин у одам маст ва қўлида бир шиша ароқи ҳам бор эди. У одамни манзилига етказдим ва ўйлаб ўйимга етолмаяпман. Мен савоб иш қилдимми ёки гуноҳ?

Жавоб: Абдуллоҳ ибн Умар розияллоҳу анҳудан ривоят қилинади: «Расулуллоҳ соллаллоҳу алайҳи васаллам:  «Бир аёл ўзи ушлаб туриб, очдан ўлишига сабаб бўлган бир мушукни деб азобланди. Унинг учун дўзахга тушди. Аллоҳ билгувчидир, бироқ дўзахда унга:
«Сен уни ушлаб турганингда овқат ҳам бермадинг, сув ҳам тутмадинг, ушлаб турдинг ёки ердаги нарсалардан емоғи учун қўйвормадинг ҳам, дейилади», дедилар».

Бир мушук учун қилинаётган муомалага эътибор беринг. Бир аёл бир мушук учун дўзахга тушган экан. У мушукни ноҳақ, зулм қилиб ўлдирган.

Абу Ҳурайра розияллоҳу анҳудан ривоят қилинади: «Расулуллоҳ соллаллоҳу алайҳи васаллам:
«Бир киши йўлда кетаётиб жуда қаттиқ чанқади. Кейин бир қудуққа тушиб, сув ичиб, чиқди. Қараса, бир ит ниҳоятда қаттиқ чанқаганидан тупроқларни ялаб юрибди. Ҳалиги киши «Бу ит менга ўхшаб роса чанқабди. Менга етган чанқоқ бунга ҳам етибди» деб, қайтиб қудуққа тушиб, махсисини сувга тўлдирди. Сўнг уни тишига тишлаб чиқиб, сувни итга тутди. Аллоҳ унинг гуноҳини мағфират қилди», дедилар.
«Эй Аллоҳнинг Расули! Бизга ҳайвонларда ҳам ажр борми?» дейишди.
«Ҳар бир жигарда савоб бор», дедилар».

Ҳа! Ҳар бир жонли нарсада савоб бор, яъни унга яхшилик қилган одам савоб олади. Одам боласи ким бўлишидан қатъий назар жонлиларнинг афзали. Унинг ҳаётини қутқариш яхшилик иш. Эҳтимол, сизнинг қилган яхшилигингиз, мазкур нобакор банданинг ҳидоятга тушишига сабаб бўлар (Шайх Муҳаммад Содиқ Муҳаммад Юсуф).

* * *

Savol: Ko‘chada mashinada ketayotgan edim. Qo‘ltiqtoyoq bilan yo‘l bo‘yida o‘tirgan bir odam qo‘l ko‘tardi. Ro‘za payti bir savob qilay deb shu odamni mashinamga oldim, lekin u odam mast va qo‘lida bir shisha aroqi ham bor edi. U odamni manziliga yetkazdim va o‘ylab o‘yimga yetolmayapman. Men savob ish qildimmi yoki gunoh?

Javob: Abdulloh ibn Umar roziyallohu anhudan rivoyat qilinadi: «Rasululloh sollallohu alayhi vasallam:  «Bir ayol o‘zi ushlab turib, ochdan o‘lishiga sabab bo‘lgan bir mushukni deb azoblandi. Uning uchun do‘zaxga tushdi. Alloh bilguvchidir, biroq do‘zaxda unga:
«Sen uni ushlab turganingda ovqat ham bermading, suv ham tutmading, ushlab turding yoki yerdagi narsalardan yemog‘i uchun qo‘yvormading ham, deyiladi», dedilar».

Bir mushuk uchun qilinayotgan muomalaga e’tibor bering. Bir ayol bir mushuk uchun do‘zaxga tushgan ekan. U mushukni nohaq, zulm qilib o‘ldirgan.

Abu Hurayra roziyallohu anhudan rivoyat qilinadi: «Rasululloh sollallohu alayhi vasallam:
«Bir kishi yo‘lda ketayotib juda qattiq chanqadi. Keyin bir quduqqa tushib, suv ichib, chiqdi. Qarasa, bir it nihoyatda qattiq chanqaganidan tuproqlarni yalab yuribdi. Haligi kishi «Bu it menga o‘xshab rosa chanqabdi. Menga yetgan chanqoq bunga ham yetibdi» deb, qaytib quduqqa tushib, maxsisini suvga to‘ldirdi. So‘ng uni tishiga tishlab chiqib, suvni itga tutdi. Alloh uning gunohini mag‘firat qildi», dedilar.
«Ey Allohning Rasuli! Bizga hayvonlarda ham ajr bormi?» deyishdi.
«Har bir jigarda savob bor», dedilar».

Ha! Har bir jonli narsada savob bor, ya’ni unga yaxshilik qilgan odam savob oladi. Odam bolasi kim bo‘lishidan qat’iy nazar jonlilarning afzali. Uning hayotini qutqarish yaxshilik ish. Ehtimol, sizning qilgan yaxshiligingiz, mazkur nobakor bandaning hidoyatga tushishiga sabab bo‘lar (Shayx Muhammad Sodiq Muhammad Yusuf).