Мажусийлар кимлар?

Рукн: Савол беринг Чоп этилган: 19.11.2015

Савол: Кимларни мажусийлар деб аталади? Улар ҳам аҳли китобми? (Комила)

Жавоб: Аввало, аҳли китоблар кимлар эканини билиш зарур. Шариатимизда Аллоҳ таоло нозил этган китобларга амал қилганлар "аҳли китоблар" деб айтилади. Бинобарин, яҳудийлар ва насронийлар аҳли китобдир. Яҳудийлар "Таврот"га, насоролар эса "Инжил"га амал қиладилар. Қуръони карим оятларида яҳудийлар ва насронийлар аҳли китоб деб зикр этилган. Қуръони каримдан олдин "Инжил", "Таврот" ва "Забур" нозил қилингандир. "Инжил" Исо алайҳиссаломга, "Таврот" Мусо алайҳиссаломга ва "Забур" Довуд алайҳиссаломга нозил қилингандир.

Мажусийларга келсак, улар оташпараст, бутпараст, санампараст ва жуссапараст кишилардир. Мажусийларнинг самовий китоблари ҳам йўқ. Шунинг учун улар олов, қуёш, ой баъзи бир ҳайвонлар ва юлдузларни илоҳ дейишиб, уларга сиғинишади. Демак, мажусийлар илоҳий китобларга эргашмайдиган қавмлардандир. Жаъфар ибн Муҳаммад ривоят қиладилар: Умар ибн Хаттоб розийаллоҳу анҳу саҳобаларнинг олдиларидан ўтаётганларида уларнинг ичидан Абдураҳмон ибн Авф розийаллоҳу анҳу шундай деди: "Мана бу қавмлар билан (яъни, мажусийлар билан) нима қилишни билмай турибман, булар араблардан ҳам, аҳли китоблардан ҳам эмас". (Муфтий Усмонхон Алимов, “Сўраган эдингиз”)

* * *

Savol: Kimlarni majusiylar deb ataladi? Ular ham ahli kitobmi? (Komila)

Javob: Avvalo, ahli kitoblar kimlar ekanini bilish zarur. Shariatimizda Alloh taolo nozil etgan kitoblarga amal qilganlar "ahli kitoblar" deb aytiladi. Binobarin, yahudiylar va nasroniylar ahli kitobdir. Yahudiylar "Tavrot"ga, nasorolar esa "Injil"ga amal qiladilar. Qur’oni karim oyatlarida yahudiylar va nasroniylar ahli kitob deb zikr etilgan. Qur’oni karimdan oldin "Injil", "Tavrot" va "Zabur" nozil qilingandir. "Injil" Iso alayhissalomga, "Tavrot" Muso alayhissalomga va "Zabur" Dovud alayhissalomga nozil qilingandir.

Majusiylarga kelsak, ular otashparast, butparast, sanamparast va jussaparast kishilardir. Majusiylarning samoviy kitoblari ham yo‘q. Shuning uchun ular olov, quyosh, oy ba’zi bir hayvonlar va yulduzlarni iloh deyishib, ularga sig‘inishadi. Demak, majusiylar ilohiy kitoblarga ergashmaydigan qavmlardandir. Ja’far ibn Muhammad rivoyat qiladilar: Umar ibn Xattob roziyallohu anhu sahobalarning oldilaridan o‘tayotganlarida ularning ichidan Abdurahmon ibn Avf roziyallohu anhu shunday dedi: "Mana bu qavmlar bilan (ya’ni, majusiylar bilan) nima qilishni bilmay turibman, bular arablardan ham, ahli kitoblardan ham emas". (Muftiy Usmonxon Alimov, “So‘ragan edingiz”)