Шифобахш эчки сути

Эчки сути мизожда энг мўъ­тадил ҳисобланади. Ибн Сино таърифлашича, эчки сути ични суради, томоқдаги, қовуқдаги яраларни даволайди, йўтал, қон туфлаш, бош оғриғи, меъда хасталикларида фойда қилади. У қуруқ мизождан бўладиган хафақон, васваса ҳамда эсда сақлаёлмаслик касалига ҳам яхши даводир. У билан оғизни чай­қаш ва ғарғара қилишнинг томоқ оғриққа, тилча, бодомсимон безлар шишларига, силга ва ниҳоят даражада озиб кетишга фойдаси катта.

Олимлар таъкидлашича, эчки сути кимёвий таркибига кўра кўпроқ она сутига яқин туради. Витамину минерал моддаларга бой. Таркибида, айниқса, ёғ ва оқсиллар мўл бўлиб, уларни организм тез ва осон қабул қилади. Ёғ доначалари сигир сутиникидан икки баробар кичик, оқсиллари эса нозик бўлади. Шу боис эчки сутини гўдакларга ҳам берса бўлаверади. Рахит, жигар, ўпка сили, аллергия касалликларини даволашда эчки сутининг ўрни катта. У ишқорли бўлганидан ошқозони ошиқча кислота ажратадиган одамларга яхши даводир. Экзема, қичима, астма билан оғриган кишиларга ҳам эчки сути ичиш тавсия қилинади. Бўғинлар оғриғини қолдиришда, ўт халтадаги тошни туширишда ҳам қўлланилади.

Маслаҳатлар

1. Эчки сутини фақат пишириб ичиш тавсия этилади.

2. Эчки сутидан хуштаъм қатиқ, сузма, қурут тайёрлаш мумкин.

3. 110-220 гр. эчки сути 1,75-3,5 гр. бодом елими ёки ювилган исириқ уруғи билан қўшиб ичилса, қон қусиш, йўтал ва силга, шунингдек, ички аъзолардан қон кетишига даво бўлади.

4. Эчки сутига зарпечак аралаштириб ичилса, ичкетарнинг асорати барҳам топиб, ични боғлайди.

5. Райҳон уруғини туйиб, эчки сутида пишириб боғланса, шишлар, чипқон ва тошмаларни пиширади ва ёриб, малҳам бўлади.

6. Эчки сути сузмасининг зардоби ичилса, сафроли ичкетар, савдоли иллатлар ва сариқ касаллигининг олдини олади.

7. Эчки сути иссиқ ичилса, ични юмшатади, пешоб ҳайдайди, ичаклардаги дардларни бартараф қилади.

8. Совуқ ва ҳўл мизожли одамларга эчки сутининг зарари бор, ҳиқичоқ ва кекириш пайдо қилади.

9. Эчки сути шакар билан ичилса, юз рангини чиройли қилади.

Сафар Муҳаммад

“Ислом нури” газетасининг 2012 йил, 4-сонидан олинди.

* * *

Echki suti mizojda eng mo‘‘­tadil hisoblanadi. Ibn Sino ta’riflashicha, echki suti ichni suradi, tomoqdagi, qovuqdagi yaralarni davolaydi, yo‘tal, qon tuflash, bosh og‘rig‘i, me’da xastaliklarida foyda qiladi. U quruq mizojdan bo‘ladigan xafaqon, vasvasa hamda esda saqlayolmaslik kasaliga ham yaxshi davodir. U bilan og‘izni chay­qash va g‘arg‘ara qilishning tomoq og‘riqqa, tilcha, bodomsimon bezlar shishlariga, silga va nihoyat darajada ozib ketishga foydasi katta.

Olimlar ta’kidlashicha, echki suti kimyoviy tarkibiga ko‘ra ko‘proq ona sutiga yaqin turadi. Vitaminu mineral moddalarga boy. Tarkibida, ayniqsa, yog‘ va oqsillar mo‘l bo‘lib, ularni organizm tez va oson qabul qiladi. Yog‘ donachalari sigir sutinikidan ikki barobar kichik, oqsillari esa nozik bo‘ladi. Shu bois echki sutini go‘daklarga ham bersa bo‘laveradi. Raxit, jigar, o‘pka sili, allergiya kasalliklarini davolashda echki sutining o‘rni katta. U ishqorli bo‘lganidan oshqozoni oshiqcha kislota ajratadigan odamlarga yaxshi davodir. Ekzema, qichima, astma bilan og‘rigan kishilarga ham echki suti ichish tavsiya qilinadi. Bo‘g‘inlar og‘rig‘ini qoldirishda, o‘t xaltadagi toshni tushirishda ham qo‘llaniladi.

Maslahatlar

1. Echki sutini faqat pishirib ichish tavsiya etiladi.

2. Echki sutidan xushta’m qatiq, suzma, qurut tayyorlash mumkin.

3. 110-220 gr. echki suti 1,75-3,5 gr. bodom yelimi yoki yuvilgan isiriq urug‘i bilan qo‘shib ichilsa, qon qusish, yo‘tal va silga, shuningdek, ichki a’zolardan qon ketishiga davo bo‘ladi.

4. Echki sutiga zarpechak aralashtirib ichilsa, ichketarning asorati barham topib, ichni bog‘laydi.

5. Rayhon urug‘ini tuyib, echki sutida pishirib bog‘lansa, shishlar, chipqon va toshmalarni pishiradi va yorib, malham bo‘ladi.

6. Echki suti suzmasining zardobi ichilsa, safroli ichketar, savdoli illatlar va sariq kasalligining oldini oladi.

7. Echki suti issiq ichilsa, ichni yumshatadi, peshob haydaydi, ichaklardagi dardlarni bartaraf qiladi.

8. Sovuq va ho‘l mizojli odamlarga echki sutining zarari bor, hiqichoq va kekirish paydo qiladi.

9. Echki suti shakar bilan ichilsa, yuz rangini chiroyli qiladi.

Safar Muhammad

• Олдинги
• Кейинги