Ҳазрат Али ибн Абу Толиб ўгитлари
* Аллоҳнинг Китобини ўрганинг, чунки Аллоҳнинг Китоби сўзларнинг энг устунидир. Қуръонга доир билимларни эгалланг, чунки Қуръон қалбларнинг баҳоридир. Қуръон нуридан шифо тиланг, чунки Каломуллоҳ кўксингиздаги касалликларга шифодир.
* Пайғамбаримизнинг (соллаллоҳу алайҳи ва саллам) йўлидан боринглар, чунки йўлларнинг энг устуни шу йўлдир.
* Аллоҳ таолодан доимо қувватли бир имон ва вужуд соғлиғи сўранг.
* Эй инсонлар! Нотўғри эътиқодларга қалбингиздан жой берманг, шунда шубҳага тушмайсиз ва инкор этишга юз тутмайсиз.
* Аллоҳ таоло доим тўғри бўлганлар билан биргадир. Тўғрилик инсон учун шарафдир, нажот ва устунликдир. Ёлғончилик эса шарафсизлик, пасткашлик ва ҳалокатдир.
* Қариндошлик ҳақларига риоя қилинг, чунки қариндошлик ҳақларига риоя қилиш умрни узайтиради ва ўзаро севгини орттиради.
* Яширинча садақа беринг, чунки садақа гуноҳларга каффорат бўлади ва Аллоҳнинг ғазабини сўндиради.
* Яхшилик қилинг, чунки яхшилик қилиш ёмон ўлим топишнинг олдини олади ва ёмон йиқилишлардан сақлайди.
* Муттақийларга ваъда қилинган яхшиликларни истанг, чунки Аллоҳ таолонинг ваъдаси ваъдаларнинг энг тўғрисидир.
* Қалбларга жойлашадиган нарсаларнинг энг хайрлиси имондир.
* Кейинчалик (динга) қўшилган (асли йўқ) ҳар бир нарса бидъатдир. У нарсани динига қўшган кимса бидъатчидир. Ким бидъатларга берилса, динини йўқотган бўлади.
* Чинакамига зарар кўрган одам динида зарар ва талофат кўрган кимсадир.
* Риё ва дабдаба ширкдандир, ихлос ва самимият имондандир.
* Қариндошлик ҳақига, гарчи улар риоя қилмасалар ҳам, риоя этинг. Сизга ёрдам бермаганларга сиз ёрдам беринг.
* Кимга нима ваъда қилсангиз, ваъдангизни бажаринг.
* Икки киши орасида ҳукм чиқараётганингизда адолатли бўлинг.
* Аждодларингиз билан ҳуда-беҳуда ғурурланиб, мақтанманг.
* Бир-бирингизга ёмон от қўйманг.
* Ўзингизни ерга урадиган ҳазил-ҳузулдан йироқ бўлинг.
* Бир-бирингизга жаҳл қилманг.
* Кучсизга, мазлумга, қарздорларга, Аллоҳ йўлидагиларга, йўлда қолганларга, сиздан ёрдам сўраганларга ёрдам кўрсатинг.
* Бева аёлларга, етимларга раҳм қилинг.
* Ҳаммага салом беринг, сизга берилган саломга муносиб ёки ундан ҳам гўзал алик олинг.
* Яхшилик ва тақво йўлида бир-бирингизга ёрдам беринг. Ёмонлик ва ҳақсизлик йўлида эса бир-бирингизга ёрдам берманг ва Аллоҳдан қўрқинг. Зеро, Аллоҳнинг азоби чидаб бўлмайдиган даражада оғир ва шиддатлидир.
* Меҳмонни сийланг.
* Қўшнига яхши муомалада бўлинг.
* Касалларни зиёрат қилинг.
* Ўликларни чиройли (сабр билан) кузатинг.
* Доим умид ва қўрқув ичида бўлинг.
* Узун орзулар охиратни унуттиради. Нафснинг ҳой-ҳавасларига берилиб ухлаш эса кишини ҳақдан узоқлаштиради.
“Ҳаётус-саҳоба” китобидан Сумайро Абдумурод қизи тайёрлади.
“Ҳидоят” журналининг 2011 йил, 12-сонидан олинди.
* * *
* Allohning Kitobini o‘rganing, chunki Allohning Kitobi so‘zlarning eng ustunidir. Qur’onga doir bilimlarni egallang, chunki Qur’on qalblarning bahoridir. Qur’on nuridan shifo tilang, chunki Kalomulloh ko‘ksingizdagi kasalliklarga shifodir.
* Payg‘ambarimizning (sollallohu alayhi va sallam) yo‘lidan boringlar, chunki yo‘llarning eng ustuni shu yo‘ldir.
* Alloh taolodan doimo quvvatli bir imon va vujud sog‘lig‘i so‘rang.
* Ey insonlar! Noto‘g‘ri e’tiqodlarga qalbingizdan joy bermang, shunda shubhaga tushmaysiz va inkor etishga yuz tutmaysiz.
* Alloh taolo doim to‘g‘ri bo‘lganlar bilan birgadir. To‘g‘rilik inson uchun sharafdir, najot va ustunlikdir. Yolg‘onchilik esa sharafsizlik, pastkashlik va halokatdir.
* Qarindoshlik haqlariga rioya qiling, chunki qarindoshlik haqlariga rioya qilish umrni uzaytiradi va o‘zaro sevgini orttiradi.
* Yashirincha sadaqa bering, chunki sadaqa gunohlarga kafforat bo‘ladi va Allohning g‘azabini so‘ndiradi.
* Yaxshilik qiling, chunki yaxshilik qilish yomon o‘lim topishning oldini oladi va yomon yiqilishlardan saqlaydi.
* Muttaqiylarga va’da qilingan yaxshiliklarni istang, chunki Alloh taoloning va’dasi va’dalarning eng to‘g‘risidir.
* Qalblarga joylashadigan narsalarning eng xayrlisi imondir.
* Keyinchalik (dinga) qo‘shilgan (asli yo‘q) har bir narsa bid’atdir. U narsani diniga qo‘shgan kimsa bid’atchidir. Kim bid’atlarga berilsa, dinini yo‘qotgan bo‘ladi.
* Chinakamiga zarar ko‘rgan odam dinida zarar va talofat ko‘rgan kimsadir.
* Riyo va dabdaba shirkdandir, ixlos va samimiyat imondandir.
* Qarindoshlik haqiga, garchi ular rioya qilmasalar ham, rioya eting. Sizga yordam bermaganlarga siz yordam bering.
* Kimga nima va’da qilsangiz, va’dangizni bajaring.
* Ikki kishi orasida hukm chiqarayotganingizda adolatli bo‘ling.
* Ajdodlaringiz bilan huda-behuda g‘ururlanib, maqtanmang.
* Bir-biringizga yomon ot qo‘ymang.
* O‘zingizni yerga uradigan hazil-huzuldan yiroq bo‘ling.
* Bir-biringizga jahl qilmang.
* Kuchsizga, mazlumga, qarzdorlarga, Alloh yo‘lidagilarga, yo‘lda qolganlarga, sizdan yordam so‘raganlarga yordam ko‘rsating.
* Beva ayollarga, yetimlarga rahm qiling.
* Hammaga salom bering, sizga berilgan salomga munosib yoki undan ham go‘zal alik oling.
* Yaxshilik va taqvo yo‘lida bir-biringizga yordam bering. Yomonlik va haqsizlik yo‘lida esa bir-biringizga yordam bermang va Allohdan qo‘rqing. Zero, Allohning azobi chidab bo‘lmaydigan darajada og‘ir va shiddatlidir.
* Mehmonni siylang.
* Qo‘shniga yaxshi muomalada bo‘ling.
* Kasallarni ziyorat qiling.
* O‘liklarni chiroyli (sabr bilan) kuzating.
* Doim umid va qo‘rquv ichida bo‘ling.
* Uzun orzular oxiratni unuttiradi. Nafsning hoy-havaslariga berilib uxlash esa kishini haqdan uzoqlashtiradi.
“Hayotus-sahoba” kitobidan Sumayro Abdumurod qizi tayyorladi.
“Hidoyat” jurnalining 2011 yil, 12-sonidan olindi.