Бир суннатнинг минг фойдаси

Рукн: Ибрат Чоп этилган: 10.12.2014

Швециянинг The Local.se нашри хабарига кўра, мамлакатда эркаклар учун жамоат жойлари ва ҳожатхоналарида туриб сийишни тақиқлайдиган қонун лойиҳаси ишлаб чиқилмоқда. Қонун лойиҳаси муаллифларига кўра, улар гигиена нуқтаи назаридан шундай хулосага келишган. Умумий ҳожатхоналарда туриб сийиш оқибатида ҳожатхона ҳудуди сийдик билан тўлиб, турли нохушликларни келтириб чиқаради. Ўтириб ҳожат чиқарилганда эса, бундай ҳолат келиб чиқмайди.

Ушбу қонун лойиҳасини қўллаб-қувватлаётган Швеция парламентидаги Сўллар партияси фракциясининг маълум қилишича, махсус ўтказилган тадқиқот тиббий хулосаларига кўра, ўтириб сийганда простатит, сийдик йўллари касалликларининг олди олинади, эркакнинг жинсий фаоллиги мустаҳкамланади. Тик туриб сийиш эркакнинг жинсий соғлигига ёмон таъсир кўрсатади. «Шунингдек, биз одамларга покиза ҳожатхоналардан фойдаланишга имконият яратамиз», — дейди партия вакили.    

Бундан 14 аср илгари пайғамбаримиз Муҳаммад соллалоҳу алайҳи васаллам ҳам эркакларга ўтириб сийишни таълим берган эдилар. Оиша розияллоҳу анҳо: «Сизларга ким: Расулуллоҳ соллаллоҳу алайҳи ва саллам тик туриб сийган эдилар, деса ишонманглар. Расулуллоҳ соллаллоҳу алайҳи ва саллам ўтирибгина сийган эдилар» деб айтган эдилар (Имом Аҳмад 1/192, Термизий 1/27, ибн Можа 307). Ушбу ҳадис ровийси Термизий раҳимаҳуллоҳ: «Бу бобда ривоят қилинган ҳадисларнинг энг саҳиҳи шу ҳадисдир. Чунки бундай қилиш авратни тўсувчироқ ва пешобнинг сачрашидан ҳимоя қилувчироқдир» – деганлар.

* * *

Shvetsiyaning The Local.se nashri xabariga ko‘ra, mamlakatda erkaklar uchun jamoat joylari va hojatxonalarida turib siyishni taqiqlaydigan qonun loyihasi ishlab chiqilmoqda. Qonun loyihasi mualliflariga ko‘ra, ular gigiena nuqtai nazaridan shunday xulosaga kelishgan. Umumiy hojatxonalarda turib siyish oqibatida hojatxona hududi siydik bilan to‘lib, turli noxushliklarni keltirib chiqaradi. O‘tirib hojat chiqarilganda esa, bunday holat kelib chiqmaydi.

Ushbu qonun loyihasini qo‘llab-quvvatlayotgan Shvetsiya parlamentidagi So‘llar partiyasi fraktsiyasining ma’lum qilishicha, maxsus o‘tkazilgan tadqiqot tibbiy xulosalariga ko‘ra, o‘tirib siyganda prostatit, siydik yo‘llari kasalliklarining oldi olinadi, erkakning jinsiy faolligi mustahkamlanadi. Tik turib siyish erkakning jinsiy sog‘ligiga yomon ta’sir ko‘rsatadi. «Shuningdek, biz odamlarga pokiza hojatxonalardan foydalanishga imkoniyat yaratamiz», — deydi partiya vakili.    

Bundan 14 asr ilgari payg‘ambarimiz Muhammad sollalohu alayhi vasallam ham erkaklarga o‘tirib siyishni ta’lim bergan edilar. Oisha roziyallohu anho: «Sizlarga kim: Rasululloh sollallohu alayhi va sallam tik turib siygan edilar, desa ishonmanglar. Rasululloh sollallohu alayhi va sallam o‘tiribgina siygan edilar» deb aytgan edilar (Imom Ahmad 1/192, Termiziy 1/27, ibn Moja 307). Ushbu hadis roviysi Termiziy rahimahulloh: «Bu bobda rivoyat qilingan hadislarning eng sahihi shu hadisdir. Chunki bunday qilish avratni to‘suvchiroq va peshobning sachrashidan himoya qiluvchiroqdir» – deganlar.