Саҳройининг самимияти

Рукн: Ибрат Чоп этилган: 10.12.2014
Бобурий шоҳлардан Акбар катта мушоира ташкил этибди. Шу мушоирага бир саҳройи одам ҳам шеър ёзиб борсам Акбаршоҳ менга ҳам катта инъомлар беради деган умидда қоғоз қоралаб борибди. 
Мушоирага кираётган шоирларнинг шеърларини Бош вазир кўриб, сўнг киритаркан. Саҳройининг шеърини ҳам кўрибди. Шеърнинг вазн, қофияси бор-у, мазмунига умуман эътибор берилмаган экан. Яна Акбаршоҳ мадҳида «Эшакнинг боласи» деган таъриф ҳам бор экан. Шунда Вазир:
— Сен телбамисан? Шоҳга ҳам шундай дейдими? – деса, саҳройи дермиш:
— Лекин қофияси зўр келганди-да!
Шунда Вазир «Акбар – эшакнинг боласи» деган жойини «Акбар – қуруқлик ва сувликнинг подшоси» дея ўзгартириб, мушоирага киритибди.
Акбарнинг шеъриятдан хабари бор, шеърни эшитиб бўлиб сўрабди:
— Тўғрисини айт, олдинги бир мисра кимники-ю, кейинги бир мисра кимники?
— Ана у ерда бир ярамас вазирингиз бор экан. Шеъримни ўзгартирибди. Аслида мен «Акбар – эшакнинг боласи» деб ёзган эдим.
Акбар саҳройининг самимийлигини кўриб, унга инъом-эҳсон қилган экан.
 
* * *
 
Boburiy shohlardan Akbar katta mushoira tashkil etibdi. Shu mushoiraga bir sahroyi odam ham she’r yozib borsam Akbarshoh menga ham katta in’omlar beradi degan umidda qog‘oz qoralab boribdi. 
Mushoiraga kirayotgan shoirlarning she’rlarini Bosh vazir ko‘rib, so‘ng kiritarkan. Sahroyining she’rini ham ko‘ribdi. She’rning vazn, qofiyasi bor-u, mazmuniga umuman e’tibor berilmagan ekan. Yana Akbarshoh madhida «Eshakning bolasi» degan ta’rif ham bor ekan. Shunda Vazir:
— Sen telbamisan? Shohga ham shunday deydimi? – desa, sahroyi dermish:
— Lekin qofiyasi zo‘r kelgandi-da!
Shunda Vazir «Akbar – eshakning bolasi» degan joyini «Akbar – quruqlik va suvlikning podshosi» deya o‘zgartirib, mushoiraga kiritibdi.
Akbarning she’riyatdan xabari bor, she’rni eshitib bo‘lib so‘rabdi:
— To‘g‘risini ayt, oldingi bir misra kimniki-yu, keyingi bir misra kimniki?
— Ana u yerda bir yaramas vaziringiz bor ekan. She’rimni o‘zgartiribdi. Aslida men «Akbar – eshakning bolasi» deb yozgan edim.
Akbar sahroyining samimiyligini ko‘rib, unga in’om-ehson qilgan ekan.