Хотиржамлик манбаи

Бир куни мушкул бир муаммо қаршимда кўндаланг бўлди. Ундан халос бўлиш йўлларини қидира бошладим. Туни билан кўзимга уйқу келмади. Эртага бўладиган ишдан хаёлим паришон эди. Шу он яна ичимда имон сас берди:

“Сен ўз ишингнинг бошқарувчисимисан? Эртанги кун ташвишларини ҳам елкангга ортмоқлаб олибсан, худди сендан бошқа сенинг ишингни бошқарувчи йўқдай. У ҳолда онангнинг қорнидан ер юзига бир парча гўшт ҳолатида тушганингда, онгсиз, шуурсиз, нутқсиз, кичкина ўрмаловчидан ҳам ўзини ҳимоя қила олмайдиган пайтингда ким сенинг ишингни бошқарган! Ундан ҳам олдинроқ — ҳали ҳомила пайтингда сени тарбия қилган, кейинчалик гўдаклик лаҳзаларингда ҳар бир ҳолингга мувофиқ ва муносиб эҳтиёжларингни таъминлаб турган ким эди? Сени шу қадар асраб-авайлаб парваришлаган, кейин ҳам ҳар бир ҳолингга мувофиқ ва муносиб ишингнинг тадбирини кўрган зот — Аллоҳ наҳот энди ҳимоясиз, ўз ҳолингга ташлаб қўйса?! Зеро, ушбу ваҳима ва тахликаларинг жоҳилликдан бошқа нарса эмас”.

Шу сасни туйганимдан кейин гўё елкамдаги оғир юк қулаб тушгандек бўлди ва хотиржам уйқуга кетдим. Билдимки, хотиржамликнинг танҳо манбаи имондир.

Али Тантовий

* * *

Bir kuni mushkul bir muammo qarshimda ko‘ndalang bo‘ldi. Undan xalos bo‘lish yo‘llarini qidira boshladim. Tuni bilan ko‘zimga uyqu kelmadi. Ertaga bo‘ladigan ishdan xayolim parishon edi. Shu on yana ichimda imon sas berdi:

“Sen o‘z ishingning boshqaruvchisimisan? Ertangi kun tashvishlarini ham yelkangga ortmoqlab olibsan, xuddi sendan boshqa sening ishingni boshqaruvchi yo‘qday. U holda onangning qornidan yer yuziga bir parcha go‘sht holatida tushganingda, ongsiz, shuursiz, nutqsiz, kichkina o‘rmalovchidan ham o‘zini himoya qila olmaydigan paytingda kim sening ishingni boshqargan! Undan ham oldinroq — hali homila paytingda seni tarbiya qilgan, keyinchalik go‘daklik lahzalaringda har bir holingga muvofiq va munosib ehtiyojlaringni ta’minlab turgan kim edi? Seni shu qadar asrab-avaylab parvarishlagan, keyin ham har bir holingga muvofiq va munosib ishingning tadbirini ko‘rgan zot — Alloh nahot endi himoyasiz, o‘z holingga tashlab qo‘ysa?! Zero, ushbu vahima va taxlikalaring johillikdan boshqa narsa emas”.

Shu sasni tuyganimdan keyin go‘yo yelkamdagi og‘ir yuk qulab tushgandek bo‘ldi va xotirjam uyquga ketdim. Bildimki, xotirjamlikning tanho manbai imondir.

Ali Tantoviy

• Олдинги
• Кейинги