Яширин савдо

Рукн: Ибрат Чоп этилган: 10.12.2014

Аббосийлар ҳалифаларидан Ҳорун ар-Рашид аёли Зубайда билан тунги сайрга дарё қирғоғига чиқишибди. Дарё бўйида Баҳлул деган авлиёуллоҳ қумдан уй ясаётганини кўрган ҳалифа ундан сўрабди:
— Аё, Баҳлул нима қиляпсиз?
— Қумдан уй қуряпман.
— Уни нима қиласиз?
— Ким сотиб олса, уни дуо қиламан, Аллоҳ таоло унга жаннатдан бир қаср беради.
Ҳорун ар-Рашид Баҳлул Дононинг гапига кулимсираб, ўтиб кетаверибди. Ҳалифанинг орқасидан етиб келган хотини Зубайда ҳам Баҳлулдан нима қилаётганини сўрабди.
— Уй қуряпман, бегим. Ким сотиб олса, уни дуо қиламан, Аллоҳ таоло унга жаннатдан бир қаср беради.
— Қурган уйингизнинг нарҳи неча пул?
— 1 динор.
Зубайда 1 динорни унга бериб, дуо олибди.
Кечқурун ҳалифа тушида жаннатда юрганмиш. Қараса, қизил ёқутдан қилинган қаср тепасига Зубайда деб ёзиб қўйилибди. Хотинимнинг қасри экан, кириб кўрай-чи, деб борса, посбон киритмабди ва:
— Бу ерга кимнинг исми ёзилса, ўша киради, — деб, кўкрагидан итариб юборган жойида халифа уйғонибди.
«Кеча хотиним ҳақида Баҳлулнинг дуоси қабул бўлибди. Мен ҳам дуо олиб келай», — деб яна кечқурун дарё бўйига келибди. Баҳлул ҳамон уй қураётган экан, ундан сўрабди:
— Уйингизни қанчага сотасиз?
— Уйимнинг нарҳи бутун ер юзининг подшолиги.
— Бутун дунёнинг подшолигига ҳатто мен ҳам эгамасман, нега бугун қиммат қилиб юбордингиз?
— Кеча кўрмаган савдо эди, бугун кўрган савдо.

* * *

Abbosiylar xalifalaridan Horun ar-Rashid ayoli Zubayda bilan tungi sayrga daryo qirg‘og‘iga chiqishibdi. Daryo bo‘yida Bahlul degan avliyoulloh qumdan uy yasayotganini ko‘rgan xalifa undan so‘rabdi:
— Ayo, Bahlul nima qilyapsiz?
— Qumdan uy quryapman.
— Uni nima qilasiz?
— Kim sotib olsa, uni duo qilaman, Alloh taolo unga jannatdan bir qasr beradi.
Horun ar-Rashid Bahlul Dononing gapiga kulimsirab, o‘tib ketaveribdi. Halifaning orqasidan yetib kelgan xotini Zubayda ham Bahluldan nima qilayotganini so‘rabdi.
— Uy quryapman, bekam. Kim sotib olsa, uni duo qilaman, Alloh taolo unga jannatdan bir qasr beradi.
— Qurgan uyingizning narxi necha pul?
— 1 dinor.
Zubayda 1 dinorni unga berib, duo olibdi.
Kechqurun xalifa tushida jannatda yurganmish. Qarasa, qizil yoqutdan qilingan qasr tepasiga Zubayda deb yozib qo‘yilibdi. Xotinimning qasri ekan, kirib ko‘ray-chi, deb borsa, posbon kiritmabdi va:
— Bu yerga kimning ismi yozilsa, o‘sha kiradi, — deb, ko‘kragidan itarib yuborgan joyida xalifa uyg‘onibdi.
“Kecha xotinim haqida Bahlulning duosi qabul bo‘libdi. Men ham duo olib kelay”, deb yana kechqurun xalifa daryo bo‘yiga kelibdi. Bahlul hamon uy qurayotgan ekan, undan so‘rabdi:
— Uyingizni qanchaga sotasiz?
— Uyimning narxi butun yer yuzining podsholigi.
— Butun dunyoning podsholigiga hatto men ham egamasman, nega bugun qimmat qilib yubordingiz?
— Kecha ko‘rmagan savdo edi, bugun ko‘rgan savdo.

Yorqinjon qori ma’ruzalari asosida tayyorlandi.