Асир сичқонча ва банданинг ризқи

Рукн: Ибрат Чоп этилган: 20.04.2012

Домла Ҳиндистоний ҳикоя қиладилар:
«Хаттотлик билан шуғулланиб турардим. Устозимга «Саҳиҳи Бухорий»ни кўчириб турсам, хонадондагилар бугун ейишга ҳам ҳеч нарса қолмаганини айтишди. Менинг ҳам қўлимда ҳеч нима йўқ. Бугун энди сабр қиласизлар, эртага Аллоҳ бир йўлга бошлар, деб маъюсланиб, ёза бошладим. Бир маҳал ковакдан кичкина сичқон чиқиб, китобимнинг устида уёқдан буёққа ўтаверди. Менинг кўнглимни ҳадеб паришон қилавергач, косани олиб, сичқончанинг устига тўнкариб қўйдим. Бир пайт боласини қидиргандай она сичқон чиқиб, коса атрофини искай бошлади. Коса остидан «чи-чи»лаган овоз эшитилди, гўёки она-бола тиллашишди. Она сичқон ковакка кириб кетиб, кейин бир мисқоллик олтинни тишлаб чиқди-да, косанинг олдига қўйди. Косанинг олдида айланиб, «чи-чи»лаб турди-да, яна ковакка кириб кетди. Кейин иккинчи олтинни олиб чиқди. Мен қараб турибман. Сичқон ташиган олтинлар 14 тага етди. Сўнг «энди олтин тамом бўлди, мана ҳамёни» дегандай чарм катмонни судраб чиқди. Билдимки, унинг бисотида ҳеч нарса қолмабди. Косани кўтардим, она-бола сичқонлар инига кириб кетди.
Мана шу сичқонлар билан-да, менинг ризқимни Аллоҳ етказган эди…»

* * *

Domla Hindistoniy hikoya qiladilar:
“Xattotlik bilan shug‘ullanib turardim. Ustozimga “Sahihi Buxoriy”ni ko‘chirib tursam,  xonadondagilar bugun yeyishga ham hech narsa qolmaganini aytishdi. Mening ham qo‘limda hech nima yo‘q. Bugun endi sabr qilasizlar, ertaga Alloh bir yo‘lga boshlar, deb ma’yuslanib, yoza boshladim. Bir mahal kovakdan kichkina sichqon chiqib, kitobimning ustida uyoqdan buyoqqa o‘taverdi. Mening ko‘nglimni hadeb parishon qilavergach, kosani olib, sichqonchaning ustiga to‘nkarib qo‘ydim. Bir payt bolasini qidirganday ona sichqon chiqib, kosa atrofini iskay boshladi. Kosa ostidan “chi-chi”lagan ovoz eshitildi, go‘yoki ona-bola tillashishdi. Ona sichqon kovakka kirib ketib, keyin bir misqollik oltinni tishlab chiqdi-da, kosaning oldiga qo‘ydi. Kosaning oldida aylanib, “chi-chi”lab turdi-da, yana kovakka kirib ketdi. Keyin ikkinchi oltinni olib chiqdi. Men qarab turibman. Sichqon tashigan oltinlar 14 taga yetdi. So‘ng “endi oltin tamom bo‘ldi, mana hamyoni” deganday charm katmonni sudrab chiqdi. Bildimki, uning bisotida hech narsa qolmabdi. Kosani ko‘tardim, ona-bola sichqonlar iniga kirib ketdi.
Mana shu sichqonlar bilan-da, mening rizqimni Alloh yetkazgan edi…”

Hoji Domla Hindistoniy rahmatullohi alayh ma’ruzalari asosida tayyorlandi.