Урва ибн Зубайр

Рукн: Ибрат Чоп этилган: 15.02.2012

Тўрт болакай дуоси

Маккаи мукаррамада 4 нафар ёш болакайлар — Ҳазрат Абу Бакр Сиддиқнинг неваралари Абдуллоҳ ибн Зубайр, Урва ибн Зубайр, Мусъаб ибн Зубайр ҳамда уммавийлардан Абдулмалик ибн Марвон Байтуллоҳда ўтириб, «келинглар, шу ерда бир дуо қилишайлик, зеро Каъбатуллоҳдаги дуоларни Аллоҳ қабул қилар экан» деб мақсадларини баён қилишибди.
Мусъаб ибн Зубайр айтибди: «Аллоҳ менга имконият берса-ю, Ироққа ҳоким бўлсам...»
Абдуллоҳ ибн Зубайр айтибди: «Аллоҳ менга имконият берса-ю, Маккага ҳоким бўлсам...»
Абдулмалик ибн Марвон айтибди: «Сизларнинг ҳимматингиз паст экан. Мен бутун дунёга халифа бўлишни сўрайман».
Урва ибн Зубайр айтибди: «Аллоҳ менга шундай илм берсаки, одамлар келиб Каломуллоҳни мендан ўргансинлар».
Аллоҳ таоло уларнинг дуоларини қабул қилди.
Ҳақиқатан ҳам Абдулмалик дунёга халифа бўлди. Абдуллоҳ ибн Зубайр Маккада ҳоким бўлди. Урва ибн Зубайр эса, Мадинанинг энг катта етти фақиҳидан бири бўлди.

Маъсум оёқ

Урва ибн Зубайр Мадинада фақиҳлик қилган вақтларида халифа Валид ибн Абдулмалик у кишини Сурияга зиёратга чақиртирибди. Урва у ерга кичик ўғиллари билан бирга борибдилар. Фақиҳ халифа билан суҳбат қураётган пайтда, у кишининг отларга қизиқувчан ўғилларини отхонада от тепиб ўлдириб қўйибди. Урва ўғилларини кўмиб бўлмаёқ, қорасон касаллигига дучор бўлибдилар. Қорасон тобора кенгайиб борар, табиблар оёқни кесиб ташлаш кераклигини айтишибди. Урва розилик бергач, табиблар:
— Озроқ ароқ ичказсак-да, унинг таъсирида оғриқни сезмай турасиз, тезда кесиб оламиз.
— Аллоҳ таоло менга ато этган саломатлик неъматини сақлаб қолиш учун у ҳаром қилган ароқни ичмайман.
Табиб аввал катта пичоқ, сўнг суякни кесадиган аррани у зотнинг олдига қўйиб, сўнг 3-4 кишини чақирибди. Шунда Урва сўраган эканлар:
— Бу одамларни нима қиласиз?
— Улар сизнинг оёқ-қўлларингизни босиб туришади.
— Уларнинг ўрнига мен хизмат қиламан. Аллоҳни зикр қилиб тураман. Сиз эса кесаверинг.
Ҳазрат «Ла илаҳа иллаллоҳ» деб зикрга тушиши билан жарроҳлар ишга киришишибди. Кесиб бўлингач қонни тўхтатиш учун оёқларини қайнаб турган ёққа солишибди. Шунда у зот хушларини йўқотибдилар.
Урва ибн Зубайр кундуз куни 8 пора, кечаси 2 ракаат нафлда яна 8 пора Қуръон ўқишни одат қилиб, умр бўйи тарк қилмаган эканлар. У кишинг одатлари фақатгина шу куни тарк бўлган экан.
Хушларига келиб сўраганлари: «Оёғим қани?» – бўлган экан. Кесилган оёқларини олиб келиб кўрсатишибди. У зот уни ўпиб шундай дер эканлар:
«Эй оёғим, кечалари сенинг устингда мени масжидга юргизган Аллоҳга қасамки, мен сени ҳаргиз ҳаромга босмаганман. Мендан рози бўлгин».

Мусибат устига мусибат

Ҳузурига ташриф буюрган пайтдаги Урванинг мусибатларидан кўзлари ёшланган халифа бир кўр кишини меҳмон қабул қилибди. Ундан мусибати сабабини сўраганда, кўр киши шундай ҳикоя қилибди:
«Мен шаҳримдаги энг бой одам эдим. Энг бола-чақаси кўпи ҳам мен эдим. Аллоҳ ҳар жиҳатдан менга неъматни комил ато этган эди. Бир шаҳардан иккинчисига кўчиш мақсадида молларни туяларга юклаб кета бошладик. Бир жойда бола-чақаларим дам олиш учун тўхташимни илтимос қилишди. Ўша ерга чодир тикиб, молларни тушириб дам олдик. Билмаган эканман, у ер селнинг йўли бўлиб, кечқурун сел келиб ҳамма нарсамни ювиб кетди. Тепароққа илинган бешикдаги болам ва бир туядан бошқа ҳеч нима қолмади. Туядан ҳам ажраб қолмай деб уни қувсам, қочиб кетди. Шунда болам чинқираб қолди. Туядан кечдим деб боламнинг олдига борсам, уни бўри ғажиб қўйибди. Боладан ажраб, энди туяни тутиб олай деб югурсам, туя орқа оёғи билан тепиб кўзимни кўр қилди. Бир соатнинг ичида бола-чақа, мол-дунё ва соғлигимдан ажраганман.»
Шунда халифа: «Бу кишини Урва ибн Зубайрнинг олдига олиб боринглар. Зеро, Урванинг мусибати олдида бу кишиники ҳеч нарсамас» – дебди.

Жаннатдаги ифторлик

Халифа Урва ибн Зубайрни Мадинага кузатибди. Урва уйлари эшигини тақиллатар экан, шундай дебдилар:
— Аёлим, эшикни очма, токи сенга бир гапни айтиб олай. Очганингдан сўнг кўрганинг сени қўрқитмасин. Менга тўртта ўғил бериб, биттасини олган Аллоҳимга ҳамд бўлсин! Менга 4 тараф (икки қўл, икки оёқ) бериб, энди биттасини олган Аллоҳимга мақтовлар бўлсин!  
Бутун Мадина халқи у кишига таъзия билдириб, айтган гаплари қулоқларига кирмас экан-у, илло Муҳаммад деган бир зотнинг фикрлари у кишига таскин берган экан:
«Эй, Урва! Башорат, хурсандликлар сизга бўлсинки, сиз шундайин бахтли инсонсизки, сизнинг бир ўғлингиз билан, бир аъзоингиз сизни жаннатда кутиб ўтирса... Умидим борки, кесилган бир оёғингиз, жаннатда иккинчиси билан бирлашади».
Касалликлари авжига чиққан маҳалда ҳам у зот рўзадор эканлар. Шунда қизлари шундай деган экан:
— Аллоҳ таоло банданинг тоқати етмайдиган нарсага даъват қилмайди. Нега рўза тутяпсиз?
— Эй қизим, умидим борки, ифторликни ҳавзи кавсарнинг бўйида ҳурлар билан қилсам...
Ўғиллари бизга сўнгги бор насиҳат қилинг, деб сўраганда, у зот шундай деган эканлар:
— Эй ўғлим, дунёдаги ҳеч бир ифлослик беилм қариб қолишга тенг келмайди.
Шу куни асрдан сўнг Урва ибн Зубайр вафот этган эканлар. Аллоҳ у кишидан рози бўлсин!

* * *

TO’RT BOLAKAY DUOSI

Makkai mukarramada 4 nafar yosh bolakaylar - Hazrat Abu Bakr Siddiqning nevaralari Abdulloh ibn Zubayr, Urva ibn Zubayr, Mus’ab ibn Zubayr hamda ummaviylardan Abdulmalik ibn Marvon Baytullohda o’tirib, “kelinglar, shu yerda bir duo qilishaylik, zero Ka’batullohdagi duolarni Alloh qabul qilar ekan” deb maqsadlarini bayon qilishibdi.
Mus’ab ibn Zubayr aytibdi: “Alloh menga imkoniyat bersa-yu, Iroqqa hokim bo’lsam...”
Abdulloh ibn Zubayr aytibdi: “Alloh menga imkoniyat bersa-yu, Makkaga hokim bo’lsam...”
Abdulmalik ibn Marvon aytibdi: “Sizlarning himmatingiz past ekan. Men butun dunyoga xalifa bo’lishni so’rayman”.
Urva ibn Zubayr aytibdi: “Alloh menga shunday ilm bersaki, odamlar kelib Kalomullohni mendan o’rgansinlar”.
Alloh taolo ularning duolarini qabul qildi.
Haqiqatan ham Abdulmalik dunyoga xalifa bo’ldi. Abdulloh ibn Zubayr Makkada hokim bo’ldi. Urva ibn Zubayr esa, Madinaning eng katta yetti faqihidan biri bo’ldi.

MA’SUM OYOQ

Urva ibn Zubayr Madinada faqihlik qilgan vaqtlarida xalifa Valid ibn Abdulmalik Suriyaga ziyoratga chaqirtiribdi. Urva u yerga kichik o’g’illari bilan birga boribdilar. Faqih xalifa bilan suhbatda ekan, otlarga qiziquvchan o’g’illarini otxonada ot tepib o’ldirib qo’yibdi. Urva o’gillarini ko’mib bo’lmayoq, qorason kasalligiga duchor bo’libdilar. Qorason tobora kengayib borar, tabiblar oyoqni kesib tashlash kerakligini aytishibdi. Urva rozilik bergach, tabiblar:
- Ozroq aroq ichkazsak-da, uning ta’sirida og’riqni sezmay turasiz, tezda kesib olamiz.
- Alloh taolo menga ato etgan salomatlik ne’matini saqlab qolish uchun u harom qilgan aroqni ichmayman.
Tabib avval katta pichoq, so’ng suyakni kesdigan arrani u zotning oldiga qo’yib, so’ng 3-4 kishini chaqiribdi. Shunda Urva so’ragan ekanlar:
- Bu odamlarni nima qilasiz?
- Ular sizning oyoq-qo’llaringizni bosib turishadi.
- Ularning o’rniga men xizmat qilaman. Allohni zikr qilib turaman. Siz esa kesavering.
Hazrat “La ilaha illalloh” deb zikrga tushishi bilan ishga kirishishibdi. Kesib bo’lingach qonni to’xtatish uchun oyoqlarini qaynab turgan yoqqa solishibdi. Shunda u zot xushlarini yo’qotibdilar.
Urva ibn Zubayrning odatlari kunduz kuni 8 pora, kechasi 2 rakaat naflda yana 8 pora Qur’onni umr bo’yi tark qilmagan ekanlar. U kishing odatlari faqatgina shu kuni tark bo’lgan ekan.
Xushlariga kelib so’raganlari: “Oyog’im qani?” – bo’lgan ekan. Kesilgan oyoqlarini olib kelib berishsa, u zot uni o’pib shunday der ekanlar:
“Ey oyog’im, kechalari seni ustingda meni masjidga yurgizgan Allohga qasamki, men seni hargiz haromga bosmaganman. Mendan rozi bo’lgin”.

MUSIBAT USTIGA MUSIBAT

Huzuriga tashrif buyurgan paytdagi Urvaning musibatlaridan ko’zlari yoshlangan xalifa yana mehmon qabul qilibdi: bir ko’r kishi. Undan musibati sababini so’raganda, ko’r kishi shunday hikoya qilibdi:
“Men shahrimdagi eng boy odam edim. Eng bola-chaqasi ko’pi ham men edim. Alloh har jihatdan menga ne’matni komil ato etgan edi. Bir shahardan ikkinchisiga ko’chish maqsadida mollarni tuyalarga yuklab keta boshladik. Bir joyda bola-chaqalarim dam olish uchun to’xtashimni iltimos qilishdi. O’sha yerga chodir tikib, mollarni tushirib dam oldik. Bilmagan ekanman, u yer selning yo’li bo’lib, kechqurun sel kelib hamma narsamni yuvib ketdi. Teparoqqa beshikka ilingan bolam va bir tuyadan boshqa hech nima qolmabdi. Tuyadan ham ajrab qolmay deb uni quvsam, qochib ketdi. Shunda bolam chinqirab qoldi. Tuyadan kechdim deb bolamning oldiga borsam, uni bo’ri g’ajib qo’yibdi. Boladan ajrab, endi tuyani tutib olay deb yugursam, tuya orqa oyog’i bilan tepib ko’zimni ko’r qildi. Bir soatning ichida bola-chaqa, mol-dunyo va sog’ligimdan ajraganman.”
Shunda xalifa: “Bu kishini Urva ibn Zubayrning oldiga olib boringlar. Zero, Urvaning musibati oldida bu kishiniki hech narsamas” – debdi.

JANNATDAGI IFTORLIK

Xalifa Urva ibn Zubayrni uylari Madinaga kuzatibdi. Urva uylari eshigini taqillatar ekan, shunday debdilar:
- Ayolim, eshikni ochma, toki senga bir gapni aytib olay. Ochganingdan so’ng ko’rganing seni qo’rqitmasin. Menga to’rtta o’gil berib, bittasini olgan Allohimga hamd bo’lsin! Menga 4 taraf (ikki qo’l, ikki oyoq) berib, endi bittasini olgan Allohimga maqtovlar bo’lsin!
Butun Madina xalqi u kishiga ta’ziya bildirib, aytgan gaplari quloqlariga kirmas ekan-u, illo Muhammad degan bir zotning fikrlari u kishiga taskin bergan ekan:
“Ey, Urva! Bashorat, xursandliklar sizga bo’lsinki, siz shunaqangi baxtli insonsizki, sizning 1 o’g’lingiz bilan, bir a’zoingiz sizni jannatda kutib o’tirsa... Umidim borki, kesilgan bir oyog’ingiz, jannatda ikkinchisi bilan birlashadi”.
Kasalliklari avjiga chiqqan mahalda ham u zor ro’zador ekanlar. Shunda qizlari shunday degan ekan:
- Alloh taolo bandaning toqati yetmaydigan narsaga da’vat qilmaydi. Nega ro’za tutyapsiz?
- Ey qizim, umidim borki, iftorlikni havzi kavsarning bo’yida hurlar bilan qilsam...
O’g’illari bizga so’nggi bor nasihat qiling, deb so’raganda, u zot shunday degan ekanlar:
- Ey o’g’lim, dunyodagi hech bir ifloslik beilm qarib qolishga teng kelmaydi.
Shu kuni asrdan so’ng Urva ibn Zubayr vafot etgan ekanlar. Alloh u kishidan rozi bo’lsin!

Yorqinjon qori ma’ruzalari asosida tayyorlandi.