Мевани билмаган қизалоқ

Рукн: Ибрат Чоп этилган: 16.05.2018

Юляни мактабга беришмоқчи бўлишди. Қизалоқ ўқишни бошлаши мумкинлигини текшириш учун у тест топшириши керак эди.

— Оддий нарсалардан бошлаймиз, — деди руҳшунос ва вазадаги мумдан ясалган меваларни олиб стол устига қўйди, — Олма, нок, апельсин, шафтоли. Бир сўз билан улар нима деб аталади?

Юля гапирмай кўзларини ерга тикди.

— Давом этамиз. Мана бодринг, помидор, редиска, картошка ва пиёз. Улар бир сўз билан нима дейилади?

Юля лабларини тишлади.

— Қулупнай, малина, гилос... Улар қандай номланади?

— Ёдимдан чиқди, — пичирлади қизалоқ, кўз ёшларини зўрға тийиб,

— Ҳали мактабга боришга эрта, — деди руҳшунос Юлянинг онасига, — Бир йилча кутинг, шуғулланинг. У оддий нарсаларни ҳам билмайди.

Она қизига ажабланиб қаради:

— Юлинка, шуларни бир сўз билан айтилишини наҳотки билмасанг?

— Эсладим, ойижон! — чеҳраси очилди қизалоқнинг. — Нусха. Мева ва сабзавотларнинг мумдан ясалган нусхалари.

Рус тилидан Хуршид Нуруллаев таржимаси

Yulyani maktabga berishmoqchi bo‘lishdi. Qizaloq o‘qishni boshlashi mumkinligini tekshirish uchun u test topshirishi kerak edi.

— Oddiy narsalardan boshlaymiz, — dedi ruhshunos va vazadagi mumdan yasalgan mevalarni olib stol ustiga qo‘ydi, — Olma, nok, apelsin, shaftoli. Bir so‘z bilan ular nima deb ataladi?

Yulya gapirmay ko‘zlarini yerga tikdi.

— Davom etamiz. Mana bodring, pomidor, rediska, kartoshka va piyoz. Ular bir so‘z bilan nima deyiladi?

Yulya lablarini tishladi.

— Qulupnay, malina, gilos... Ular qanday nomlanadi?

— Yodimdan chiqdi, — pichirladi qizaloq, ko‘z yoshlarini zo‘rg‘a tiyib,

— Hali maktabga borishga erta, — dedi ruhshunos Yulyaning onasiga, — Bir yilcha kuting, shug‘ullaning. U oddiy narsalarni ham bilmaydi.

Ona qiziga ajablanib qaradi:

— Yulinka, shularni bir so‘z bilan aytilishini nahotki bilmasang?

— Esladim, oyijon! — chehrasi ochildi qizaloqning. — Nusxa. Meva va sabzavotlarning mumdan yasalgan nusxalari.

Rus tilidan Xurshid Nurullaev tarjimasi