Чўпоннинг дуоси

Рукн: Ибрат Чоп этилган: 14.02.2017

Дунёда ҳеч яхшилик қилмаган, доимо инсонларга озор берадиган киши вафот этибди. Унинг хотини жаноза учун қишлоқ аҳлини чақирса, марҳумнинг ёди учун ҳеч ким келмабди. Шунда аёл эрини ўзи кафанлаб, бир аравага солиб, кўмиш учун қишлоқ яқинидаги тоққа олиб кетибди.

Тоғда қўйларни боқиб юрувчи бир чўпон бўлиб, аёлнинг паришон ҳолини кўриб, ундан ҳол сўрабди. Аёл бўлган воқеаларни айтгач, йигит қабр қазиб, жаноза, дуо ўқиб, марҳумни дафн этибди. Аёл қишлоққа қайтибди.

Шу кечаси қишлоқ аҳлидан бир неча кишининг тушида аён бўлибдики, кечаги марҳум жаннатий бўлибди. Эртаси куни қишлоқ фаоллари бунинг сабабини билиш мақсадида марҳумнинг уйида боришибди. Унинг аёлидан:

— Биламизки, эринг умри давомида бизга зулм қилиб келди, озор берди. Бирон яхши ишини эслолмаймиз. Унинг қандай фазилати бор эдики, Аллоҳ унга жаннатни насиб этибди? – деб сўрашибди.

Аёл ўйлаб-ўйлаб, эрининг ҳаётидан бирон фазилат тополмабди. Аёлдан кеча нима бўлганлигини сўрашибди. Аёл борини сўзлаб берибди. Шунда улар демак, гап чўпонда, у валий зотлардан бўлиши мумкин, деб ўйлашибди-да тоққа йўл олишибди. Қарашса, йигит оддий чўпон, валийлик асоратлари кўринмайди. Ундан сўрашибди:

— Эй йигит, сен Аллоҳнинг дўстлариданмисан? Сен кеча кўмган киши жаннатий бўлганини бизлар тушимизда кўрдик. Кеча ўзи нима бўлган эди?

— Мен валий эмасман. Кеча мен гўр қаздим, марҳумни дафн этдим. Жанозасини ўқидим. Сўнггида дуо қилдим.

— Ҳа, нима деб дуо қилгандинг?

— Дедимки, Аллоҳим, мен умрим бўйи шу тоғларда чўпонлик қилдим. Бу тоғларга Сенинг саломингни айтиб келган ҳар бир мусофирни меҳмонинг билиб, унга сут соғиб бердим, гўшт қовурдим. Энди, менам сенга бир меҳмон жўнатяпман. Уни ўзинг яхши кутиб олгин!

Dunyoda hech yaxshilik qilmagan, doimo insonlarga ozor beradigan kishi vafot etibdi. Uning xotini janoza uchun qishloq ahlini chaqirsa, marhumning yodi uchun hech kim kelmabdi. Shunda ayol erini o‘zi kafanlab, bir aravaga solib, ko‘mish uchun qishloq yaqinidagi toqqa olib ketibdi.

Tog‘da qo‘ylarni boqib yuruvchi bir cho‘pon bo‘lib, ayolning parishon holini ko‘rib, undan hol so‘rabdi. Ayol bo‘lgan voqealarni aytgach, yigit qabr qazib, janoza, duo o‘qib, marhumni dafn etibdi. Ayol qishloqqa qaytibdi.

Shu kechasi qishloq ahlidan bir necha kishining tushida ayon bo‘libdiki, kechagi marhum jannatiy bo‘libdi. Ertasi kuni qishloq faollari buning sababini bilish maqsadida marhumning uyida borishibdi. Uning ayolidan:

— Bilamizki, ering umri davomida bizga zulm qilib keldi, ozor berdi. Biron yaxshi ishini eslolmaymiz. Uning qanday fazilati bor ediki, Alloh unga jannatni nasib etibdi? – deb so‘rashibdi.

Ayol o‘ylab-o‘ylab, erining hayotidan biron fazilat topolmabdi. Ayoldan kecha nima bo‘lganligini so‘rashibdi. Ayol borini so‘zlab beribdi. Shunda ular demak, gap cho‘ponda, u valiy zotlardan bo‘lishi mumkin, deb o‘ylashibdi-da toqqa yo‘l olishibdi. Qarashsa, yigit oddiy cho‘pon, valiylik asoratlari ko‘rinmaydi. Undan so‘rashibdi:

— Ey yigit, sen Allohning do‘stlaridanmisan? Sen kecha ko‘mgan kishi jannatiy bo‘lganini bizlar tushimizda ko‘rdik. Kecha o‘zi nima bo‘lgan edi?

— Men valiy emasman. Kecha men go‘r qazdim, marhumni dafn etdim. Janozasini o‘qidim. So‘nggida duo qildim.

— Ha, nima deb duo qilganding?

— Dedimki, Allohim, men umrim bo‘yi shu tog‘larda cho‘ponlik qildim. Bu tog‘larga Sening salomingni aytib kelgan har bir musofirni mehmoning bilib, unga sut sog‘ib berdim, go‘sht qovurdim. Endi, menam senga bir mehmon jo‘natyapman. Uni o‘zing yaxshi kutib olgin!