Баъзилар 25 ёшда ўлиб, 75 ёшда дафн қилинадилар

Уйингдаги онангнинг овози сен Роббингга ҳамд айтишингга лойиқ бўлган энг катта неъматлардан биридир.

* * *

Ажойиб замонда яшаяпмиз. Агар тўғрилик билан тасарруф қилсак, узоқлашишади. Агар ниқобни кийиб олсак, яқинлашишади.

* * *

Яхшиликни инкор қилиш – кўр одам кўзи очилиб, кўра бошлагандан кейин ҳассасини синдиришидир.

* * *

Баъзиларнинг кетиши дори кабидир. Таъми аччиқ, лекин кўп касалликларга даво бўлади.

* * *

Бир ўзинг ёлғиз ҳолда бахтиёр бўлишинг атрофингда мингта мунофиқ бўлишидан яхшироқдир.

* * *

Баъзиларнинг ташқи кўриниши инсон, лекин ичига кирсангиз ҳайвонот боғига дуч келасиз.

* * *

Бир донишманддан сўрадилар: “Сиз кўрган энг чиройли нарса нима?” Донишманд деди: “Барча айбларимни кўришига қарамасдан ҳалиям мени яхши кўрадиган шахсдан кўра чиройлироқ нарсани кўрмадим”.

* * *

Агар атрофингдаги одамларнинг ҳаётини ёритувчи шам бўлмасанг, улар кетишини орзу қиладиган зулмат ҳам бўлма!

* * *

Ҳаёт ҳар қанча қийин ва оғир бўлмасин, яхши кўрган кишимиз билан ёнма-ён яшасак, у ширин туюлиб қолади.

* * *

Ким сени хатокор ҳолда кўришни истаса, кўзи кўрмайдиган ожиз киши бўлса ҳам, сени хатокор кўраверади. Шундай экан, одамларнинг ҳаммасини рози қилиш билан машғул бўлма!

* * *

Баъзи кимсалар поклик, ахлоқ, яхшилик ҳақида ишонч билан гапиришади. Аммо ўзлари нифоққа қўл уришади, жирканчликнинг юқори чўққисини қилишади.

* * *

Фақир киши чин ошиқ бўлади. Чунки, унинг қалбидан бошқа берадиган нарсаси бўлмайди.

* * *

Кўпчилик қурбонлик деган нарсани билади. Лекин шундай шахслар борки, сен учун ўзини қурбон қилади. Яна шундай шахслар борки, бирор манфаати учун сени қурбон қилади.

* * *

Баъзилар ўзининг заковати билан муваффақиятга эришади. Баъзилар эса, бошқаларнинг аҳмоқлиги эвазига муваффақиятга эришади.

* * *

Икки хил алам (оғриқ, изтироб) бор: 1. Сенга озор берадиган алам. 2. Сени ўзгартирадиган алам.

* * *

Қалблар кўп. Атрофимизда қалблар ҳар қанча кўпаймасин, онанинг қалбидек қалб йўқ!

* * *

Қуйидаги уч нарсага қатъий ишончда бўл: Роббингдан кўра сенга раҳмлироқ ҳеч ким йўқ! Роббингдан кўра сенинг ғамларингни кўпроқ биладиган ҳеч ким йўқ! Роббингдан бошқа ҳеч ким сендан зазарни даф қила олмайди!

* * *

Намозингга эътиборли бўл! Чунки, намоз ўқиётганингда сен турган жойнамоз дунёнинг ҳаммасидан кўра ёқимлироқ, чиройлироқ жойдир.

* * *

Файласуфлардан бири шундай деди: “Биродарлар уч хил бўлади: Овқатга ўхшаган биродар, унга ҳар вақт муҳтож бўласан; дорига ўхшаган биродар, унга гоҳида муҳтож бўласан; касалликка ўхшаган биродар, унга ҳеч қачон муҳтож бўлмайсан”.

* * *

Бошқаларни кузатиш, уларнинг хатоларини овлаш билан мушғул бўладиган кимсаларда ўзларидаги касалликни кўргани, ўз нафсларини муолажа қилгани вақтлари бўлмайди.

* * *

Одамларнинг баъзилари йигирма беш ёшларида вафот этадилар ва етмиш беш ёшларида дафн қилинадилар.

* * *

Одамлар билан бўладиган муомалаларда бошдаги гап-сўзларга ишонма! Гапларнинг рости охирги лаҳзаларда айтилади.

* * *

Барча нарса кичик ҳолда бошланиб, кейин катталашади. Аммо маҳзунлик ундай эмас. У катта ҳолда бошланиб, кейин кичраяди. Кичрайиб-кичрайиб, охири унутилаёзади. Ушбу маълумотни эсга олиш мусибатни енгиллаштиради.

* * *

Донишмандлардан бири шундай деди: “Ким тилига эгалик қилолмаса, надомат чекади. Ким тортишувни кўпайтирса, сўкилади. Ким ёмон кимсага шерик бўлса, (унинг ёмонлигидан) саломат бўлмайди. Ким солиҳ кишига шерик бўлса, ўлжага, ғаниматга эришади”.

* * *

“Нега баъзи кимсалар бошида чиройли кўринади-да, вақт ўтгач, юзидаги ниқоби ечилади?” деб ҳалиям сўраб юрибман.

* * *

Бошқаларнинг бахти сенинг бахтингни камайтирмайди. Бошқаларнинг бойлиги сенинг ризқингни озайтирмайди. Бошқаларнинг саломатлиги сендан офиятни тортиб олмайди. Пок бўл! Ўзингга раво кўрган нарсангни бошқаларга ҳам раво кўр!

“Роваиъул фикр” саҳифасидан Нозимжон Ҳошимжон таржимаси

Uyingdagi onangning ovozi sen Robbingga hamd aytishingga loyiq bo‘lgan eng katta ne’matlardan biridir.

* * *

Ajoyib zamonda yashayapmiz. Agar to‘g‘rilik bilan tasarruf qilsak, uzoqlashishadi. Agar niqobni kiyib olsak, yaqinlashishadi.

* * *

Yaxshilikni inkor qilish – ko‘r odam ko‘zi ochilib, ko‘ra boshlagandan keyin hassasini sindirishidir.

* * *

Ba’zilarning ketishi dori kabidir. Ta’mi achchiq, lekin ko‘p kasalliklarga davo bo‘ladi.

* * *

Bir o‘zing yolg‘iz holda baxtiyor bo‘lishing atrofingda mingta munofiq bo‘lishidan yaxshiroqdir.

* * *

Ba’zilarning tashqi ko‘rinishi inson, lekin ichiga kirsangiz hayvonot bog‘iga duch kelasiz.

* * *

Bir donishmanddan so‘radilar: “Siz ko‘rgan eng chiroyli narsa nima?” Donishmand dedi: “Barcha ayblarimni ko‘rishiga qaramasdan haliyam meni yaxshi ko‘radigan shaxsdan ko‘ra chiroyliroq narsani ko‘rmadim”.

* * *

Agar atrofingdagi odamlarning hayotini yorituvchi sham bo‘lmasang, ular ketishini orzu qiladigan zulmat ham bo‘lma!

* * *

Hayot har qancha qiyin va og‘ir bo‘lmasin, yaxshi ko‘rgan kishimiz bilan yonma-yon yashasak, u shirin tuyulib qoladi.

* * *

Kim seni xatokor holda ko‘rishni istasa, ko‘zi ko‘rmaydigan ojiz kishi bo‘lsa ham, seni xatokor ko‘raveradi. Shunday ekan, odamlarning hammasini rozi qilish bilan mashg‘ul bo‘lma!

* * *

Ba’zi kimsalar poklik, axloq, yaxshilik haqida ishonch bilan gapirishadi. Ammo o‘zlari nifoqqa qo‘l urishadi, jirkanchlikning yuqori cho‘qqisini qilishadi.

* * *

Faqir kishi chin oshiq bo‘ladi. Chunki, uning qalbidan boshqa beradigan narsasi bo‘lmaydi.

* * *

Ko‘pchilik qurbonlik degan narsani biladi. Lekin shunday shaxslar borki, sen uchun o‘zini qurbon qiladi. Yana shunday shaxslar borki, biror manfaati uchun seni qurbon qiladi.

* * *

Ba’zilar o‘zining zakovati bilan muvaffaqiyatga erishadi. Ba’zilar esa, boshqalarning ahmoqligi evaziga muvaffaqiyatga erishadi.

* * *

Ikki xil alam (og‘riq, iztirob) bor: 1. Senga ozor beradigan alam. 2. Seni o‘zgartiradigan alam.

* * *

Qalblar ko‘p. Atrofimizda qalblar har qancha ko‘paymasin, onaning qalbidek qalb yo‘q!

* * *

Quyidagi uch narsaga qat’iy ishonchda bo‘l: Robbingdan ko‘ra senga rahmliroq hech kim yo‘q! Robbingdan ko‘ra sening g‘amlaringni ko‘proq biladigan hech kim yo‘q! Robbingdan boshqa hech kim sendan zazarni daf qila olmaydi!

* * *

Namozingga e’tiborli bo‘l! Chunki, namoz o‘qiyotganingda sen turgan joynamoz dunyoning hammasidan ko‘ra yoqimliroq, chiroyliroq joydir.

* * *

Faylasuflardan biri shunday dedi: “Birodarlar uch xil bo‘ladi: Ovqatga o‘xshagan birodar, unga har vaqt muhtoj bo‘lasan; doriga o‘xshagan birodar, unga gohida muhtoj bo‘lasan; kasallikka o‘xshagan birodar, unga hech qachon muhtoj bo‘lmaysan”.

* * *

Boshqalarni kuzatish, ularning xatolarini ovlash bilan mushg‘ul bo‘ladigan kimsalarda o‘zlaridagi kasallikni ko‘rgani, o‘z nafslarini muolaja qilgani vaqtlari bo‘lmaydi.

* * *

Odamlarning ba’zilari yigirma besh yoshlarida vafot etadilar va yetmish besh yoshlarida dafn qilinadilar.

* * *

Odamlar bilan bo‘ladigan muomalalarda boshdagi gap-so‘zlarga ishonma! Gaplarning rosti oxirgi lahzalarda aytiladi.

* * *

Barcha narsa kichik holda boshlanib, keyin kattalashadi. Ammo mahzunlik unday emas. U katta holda boshlanib, keyin kichrayadi. Kichrayib-kichrayib, oxiri unutilayozadi. Ushbu ma’lumotni esga olish musibatni yengillashtiradi.

* * *

Donishmandlardan biri shunday dedi: “Kim tiliga egalik qilolmasa, nadomat chekadi. Kim tortishuvni ko‘paytirsa, so‘kiladi. Kim yomon kimsaga sherik bo‘lsa, (uning yomonligidan) salomat bo‘lmaydi. Kim solih kishiga sherik bo‘lsa, o‘ljaga, g‘animatga erishadi”.

* * *

“Nega ba’zi kimsalar boshida chiroyli ko‘rinadi-da, vaqt o‘tgach, yuzidagi niqobi yechiladi?” deb haliyam so‘rab yuribman.

* * *

Boshqalarning baxti sening baxtingni kamaytirmaydi. Boshqalarning boyligi sening rizqingni ozaytirmaydi. Boshqalarning salomatligi sendan ofiyatni tortib olmaydi. Pok bo‘l! O‘zingga ravo ko‘rgan narsangni boshqalarga ham ravo ko‘r!

“Rovai’ul fikr” sahifasidan Nozimjon Hoshimjon tarjimasi

• Олдинги
• Кейинги