Қалб ойнаси

Бир оила истиқомат учун янги уйга кўчиб келди. Эрталаб уйқудан турганларида хотин ойнадан атрофга қарай бошлади. Шунда усти боши кир қўшни аёлни кўриб қолди-да, эрига:

— Буни қаранг, қўшнимизнинг усти боши кир бўлиб кетибди. Қандай қилиб бунақа кир кийимларни кийиб юрибди экан. Балки кир ювиш воситалари яхши эмасдир, балки тоза қилиб ювишни билмас. Унга ўргатиб қўйсам бўлар экан, — деди.

Эри эса газета ўқиб ўтирар, хотинининг гапига эътибор бермас эди.

Хотин ҳар сафар ойнадан қўшни аёлни кўрганида ўша гапларини қайтарар, ўзича бирнималар деб ишини давом эттираверарди.

Эртасига эрталаб аёл яна ойнадан қўшнисини кўриб қолиб, бирдан  хурсанд бўлиб кетди:

— Буни қаранг, қўшнимизнинг кийимлари бугун топ-тоза бўлиб қолибди.  Шундай юрса ҳам бўлар экану! Балки кир ювиш воситасини ўзгартиргандир ёки кирни қандай ювишни энди ўргангандир, сиз нима дейсиз?

— Йўқ... шунчаки, — жавоб берди эри, — бугун эртароқ туриб ойнани тозалаб ювиб, артиб қўйгандим...

Хаётимиз ҳам шу каби. Ҳамма нарса биз унинг воситасида қараётган “ойна”мизга боғлиқ. “Ойна”миз тоза бўлса, атроф-олам ҳам биз учун тоза, гўзал. Аксинча бўлса-чи...  Ўзгаларни танқид қилишдан олдин қалбимизга ва ниятимизга эътиборли бўлайлик.

Рус тилидан Акбаржон Абдулмажид таржимаси

* * *

Bir oila istiqomat uchun yangi uyga ko‘chib keldi. Ertalab uyqudan turganlarida xotin oynadan atrofga qaray boshladi. Shunda usti boshi kir qo‘shni ayolni ko‘rib qoldi-da, eriga:

— Buni qarang, qo‘shnimizning usti boshi kir bo‘lib ketibdi. Qanday qilib bunaqa kir kiyimlarni kiyib yuribdi ekan. Balki kir yuvish vositalari yaxshi emasdir, balki toza qilib yuvishni bilmas. Unga o‘rgatib qo‘ysam bo‘lar ekan, — dedi.

Eri esa gazeta o‘qib o‘tirar, xotinining gapiga e’tibor bermas edi.

Xotin har safar oynadan qo‘shni ayolni ko‘rganida o‘sha gaplarini qaytarar, o‘zicha birnimalar deb ishini davom ettiraverardi.

Ertasiga ertalab ayol yana oynadan qo‘shnisini ko‘rib qolib, birdan  xursand bo‘lib ketdi:

— Buni qarang, qo‘shnimizning kiyimlari bugun top-toza bo‘lib qolibdi.  Shunday yursa ham bo‘lar ekanu! Balki kir yuvish vositasini o‘zgartirgandir yoki kirni qanday yuvishni endi o‘rgangandir, siz nima deysiz?

— Yo‘q... shunchaki, — javob berdi eri, — bugun ertaroq turib oynani tozalab yuvib, artib qo‘ygandim...

Xayotimiz ham shu kabi. Hamma narsa biz uning vositasida qarayotgan “oyna”mizga bog‘liq. “Oyna”miz toza bo‘lsa, atrof-olam ham biz uchun toza, go‘zal. Aksincha bo‘lsa-chi...  O‘zgalarni tanqid qilishdan oldin qalbimizga va niyatimizga e’tiborli bo‘laylik.

Rus tilidan Akbarjon Abdulmajid tarjimasi

• Олдинги
• Кейинги