Азроилдан қочган одам

Рукн: Ибрат Чоп этилган: 26.03.2016

Ҳазрати Сулаймон алайҳиссалом ҳукм сурган даврда бир одам қоча-қоча саройга келиб, пайғамбарнинг ҳузурларига келди. Ранги ўчиб, қўрқувдан дир-дир титраган ҳолда Сулаймон алайҳиссаломдан ўзига ёрдам этишни истади.
Ҳазрати Сулаймон алайҳиссалом у одамдан сўрадилар:
– Сенга нима бўлди ўзи? Сени бунчалар қўрқитган нарса нима?
Одам:
– Азроил менга шундай ғазаб билан боқдики, жонимни олмоғидан қўрқдим. Қочиб сизнинг ёнингизга келдим – деди. Ҳазрати Сулаймон алайҳиссалом:
– Майли, мендан нима истайсан? – дедилар. Одам:
– Эй жонларни қўриқловчи адолатли подшоҳ! Сенинг ҳукминг шамолга ўтадир, амр эт мени Ҳиндистонга элтсин. Балки шунда жонимни қутқарарман – деди.
Сулаймон алайҳиссалом шамолга бу одамни истаган ерига этмоқни амр этдилар. Шамол одамни Ҳиндистоннинг ички тарафидаги бир ерга учириб ташлади.
Эртаси кун мажлис қуриб, ҳамма Сулаймон алайҳиссаломнинг ҳузурларига тўпланди. Ҳазрати Сулаймон алайҳиссалом Азроилга:
– Кеча мени ёнимга бир одам келди. Унга ғазаб билан боққанингни сўйлади. Ўша мусулмонни уйидан, бола-чақасидан узоқлаштириш учун шундай боқдингми? Сабаби нима? – деди.
Азроил:
– Эй Сулаймон! Мен унга ғазабли эмас, ҳайронлик ила боқдим. Чунки Жаноби Ҳақ менга у бандасининг жонини бугун Ҳиндистонда ол дея амир этди. Мен ҳам у одамни бу ерда кўриб ўз-ўзимга ҳайрон бўлдим. Бу одамни бу ерда нима иши бор. Юзларча қаноти бўлса ҳам Ҳиндистонга бормоғи кўп мушкулдир, дедим. Шунинг учун бу одамга ажабланиш ва ҳайронлик ила боқдим.
Фақат Ҳиндистонга келганимда одамни у ерда топдим ва вазифамни адо этдим – дея Ҳазрати Сулаймон алайҳиссаломнинг саволларига жавоб берди.

«Маснавийдан сайланмалар» китобидан олинди.
Туркчадан Ғиёсиддин Муҳаммад Юсуф таржимаси.

* * *

Hazrati Sulaymon alayhissalom hukm surgan davrda bir odam qocha-qocha saroyga kelib, payg‘ambarning huzurlariga keldi. Rangi o‘chib, qo‘rquvdan dir-dir titragan holda Sulaymon alayhissalomdan o‘ziga yordam etishni istadi.
Hazrati Sulaymon alayhissalom u odamdan so‘radilar:
– Senga nima bo‘ldi o‘zi? Seni bunchalar qo‘rqitgan narsa nima?
Odam:
– Azroil menga shunday g‘azab bilan boqdiki, jonimni olmog‘idan qo‘rqdim. Qochib sizning yoningizga keldim – dedi. Hazrati Sulaymon alayhissalom:
– Mayli, mendan nima istaysan? – dedilar. Odam:
– Ey jonlarni qo‘riqlovchi adolatli podshoh! Sening hukming shamolga o‘tadir, amr et meni Hindistonga eltsin. Balki shunda jonimni qutqararman – dedi.
Sulaymon alayhissalom shamolga bu odamni istagan yeriga etmoqni amr etdilar. Shamol odamni Hindistonning ichki tarafidagi bir yerga uchirib tashladi.
Ertasi kun majlis qurib, hamma Sulaymon alayhissalomning huzurlariga to‘plandi. Hazrati Sulaymon alayhissalom Azroilga:
– Kecha meni yonimga bir odam keldi. Unga g‘azab bilan boqqaningni so‘yladi. O‘sha musulmonni uyidan, bola-chaqasidan uzoqlashtirish uchun shunday boqdingmi? Sababi nima? – dedi.
Azroil:
– Ey Sulaymon! Men unga g‘azabli emas, hayronlik ila boqdim. Chunki Janobi Haq menga u bandasining jonini bugun Hindistonda ol deya amir etdi. Men ham u odamni bu yerda ko‘rib o‘z-o‘zimga hayron bo‘ldim. Bu odamni bu yerda nima ishi bor. Yuzlarcha qanoti bo‘lsa ham Hindistonga bormog‘i ko‘p mushkuldir, dedim. Shuning uchun bu odamga ajablanish va hayronlik ila boqdim.
Faqat Hindistonga kelganimda odamni u yerda topdim va vazifamni ado etdim – deya Hazrati Sulaymon alayhissalomning savollariga javob berdi.

«Masnaviydan saylanmalar» kitobidan olindi.
Turkchadan G‘iyosiddin Muhammad Yusuf tarjimasi.