Бир-биримизни қўлласак...

 

Mustabid tuzum qulagach, turfa ajnabiy mollar bozorlarni zabt etganidek, sovetcha nog‘orani eshitaverib charchagan insonning qulog‘i, miyasi, ko‘nglini egallash uchun ham turli qarash va fikrlar xuruji boshlandi. Jumladan, yurtimizda boshqa dinlarni targ‘ib qiluvchi missionerlar ko‘payib qoldi.

Men o‘zim guvoh bo‘lgan voqealar haqida gapirmoqchiman. Bir kuni Yunusobod bozoridan uyimga yetib kelgunimcha «Iyehova shohidlari» guruhi a’zolarining uchragan odamga tekin kitob tarqatib, guruhlariga taklif qilishayotganini ko‘rdim. Menga ham taklif etishdi. Muloyimlik bilan ikki qo‘lim band, kitobingizni ololmayman, dedim. Ellik odim yurib-yurmasimdan yana shunday manzara... Xullas, uyga yetgunimcha uch marta o‘sha guruh vakillariga duch keldim. Ishdan qaytgan xotinim ham trolleybusda uch-to‘rt kampir unga kitob tiqishtirmoqchi bo‘lishganini aytdi.

Ertasiga eshik taqilladi. Malla sochli bir qiz o‘zbekchada tutilib-tutilib:

—Siz qaysi dindasiz? — deb so‘radi.

—Alhamdulilloh, musulmonman, deb javob qildim.

—Axir, Iso sizning barcha qilgan va qilajak gunohparingizni Xudodan so‘rab olgan-ku. Ishonmasangiz, mana, ko‘ring,— deb u chiroyli nashr qilingan o‘zbekcha “Injil”ni ko‘rsatdi.

—Hozir sizni bekordan-bekor xafa qilsam, haqoratlasam, hech qanday gunoh bo‘lmaydimi?

—Bilmasam...

—Axir, siz aytishingizcha, gunohimni Iso (alayhissalom) so‘rab olganlar-ku.

Qiz indamay ortiga qaytdi va ko‘zdan g‘oyib bo‘ldi.

Bir necha kundan so‘ng yana eshik taqilladi. Ochsam, chiroyli bir o‘zbek qizi turibdi. Qo‘lida bir dasta o‘rischa va o‘zbekcha kitoblar.

—«Iyehova shohidlari»danmisiz?

—Qaydan bildingiz?

Javob o‘rniga yana savol berdim:

—Injilni o‘qiganmisiz?

—Ha, bir necha marta o‘rischasini ham, o‘zbekchasini ham o‘qiganman.

—Qur’oni karimni-chi?

—Yo‘q.

—Ota-onangiz musulmonmilar?

— Ha.

Unday bo‘lsa, Qur’oni karimni hech bo‘lmasa bir marta o‘qib, keyin keling.

—Men siz bilan Yer yuzidagi jannat haqida gaplashmoqchiman, — dedi qiz.

—Hozir ikkovimiz teng emasmiz. Men har ikki kitobni o‘qiganman, siz eng so‘nggi Kitobni o‘qimabsiz. Qur’oni karim faqat o‘zbek yoki arablar uchun emas, butun jahon xalqlari uchun tushirilgan. Ustozlaringizga ham shu gapimni ayting, — dedim.

Oradan ikki yil o‘tdi, ammo u qiz qayta ko‘rinmadi.

Taassuf, mo‘may pul evaziga boshqa dinga kirib ketayotgan ayrim yurtdoshlarimiz uchrab turishibdi.

Mutasaddi shaxslarda ham, oddiy odamlarda ham mas’uliyat hissi kuchaysa, chetdan xurujlarnint ildizi kesiladi.

MDHning ayrim davlatlarida paydo bo‘lgan ba’zi sekta a’zolari o‘zlarini qurbonlik qilayotganlari yoki 30-40 kishi tiriklay ochiq go‘rga kirishib, o‘limlarini ko‘tib yotishgani ham ana shu xorijiy qora “pablik rileyshnz” — “jamoatchilik bilan aloqalar”ning ta’siri. Chetdan suqilib kirib, omma fikrini o‘zgartirmoqchi bo‘layotganlar tiniq suvni loyqalatyaptilar, xolos.

Omma bilan aloqa o‘rnatish, xalq fikrini to‘g‘ri ma’noda o‘rganish fani o‘zimizda ham yaxshi o‘qitilishi kerak.

Bugungi kunda “jamoatchilik bilan aloqalar” (pablik rileyshnz) Mirzo Ulug‘bek nomidagi O‘zbekiston Milliy univsrsiteti jurnalistika fakulteti va Jahon tillari universiteti xalqaro jurnalistika fakultetida majburiy fan sifatida hamda O‘zbekiston Respublikasi Prezidenti huzuridagi Davlat va jamiyat qurilipsh akademiyasida qisman o‘qitilyapti. G‘arb mamlakatlarida u hatto iqtisodchilarga ham bir necha o‘n yillardan buyon alohida fan sifatida o‘qitiladi.

Payg‘ambarimiz (alayhissalom) hadislarini o‘rgangan kishi oq-qorani tanib, to‘g‘ri yo‘lni topishi aniq. U hamjihatlik tufayli chetning zararidan himoyalanadi, jipslikning yaxshi qirralarini ko‘ra oladi. Bu hol G‘arbda endi an’ana tusiga kirayotgan “jamoatchilik bilan aloqalar”ning ildizlari Islom dinida azaldan bor ekanini ko‘rsatadi.

Hazrati Alisher Navoiy “Agar sen shohsen, ogohsen sen, agar ogohsen, shohsen sen” deganlar. Dinimizning afzalliklarini xalqimizga yetkazishda, yoshlarimizni qora niyatli kuchlarning axborot xurujidan himoya qilishda doim hushyor va ogoh bo‘lishimiz zarur.

Dinimizga xos kenglik, xalqchillik va yuksak axloqni targ‘ib etishda bir-birimizni qo‘llasak, xolislik ko‘rsatsak, chetning g‘arazli niyatda oramizga suqilishlari barham topadi.