«Кўкалдош» — қадим илм бешиги

Рукн: Долзарб мавзу Чоп этилган: 29.04.2013
Юртимизда дунёвий билимлар билан бир қаторда Ислом асослари, Қуръони карим, ҳадиси шариф, тафсир, фиқҳ, ақоид каби ухровий илмларни ўргатишга мўлжалланган диний билим юртлари ҳам талайгина. Ўзбекистон мусулмонлари идораси тизимида битта олий (Тошкент Ислом институти), 9 та ўрта махсус таълим муассасалари (Тошкентда «Кўкалдош», Бухорода «Мирараб», Андижонда «Саййид Муҳйиддин Махдум», Наманганда «Мулла Қирғиз», Китобда «Хожа Бухорий», Урганчда «Фахриддин ар-Розий», Нукусда «Муҳаммад ал-Беруний», шунингдек Тошкентда «Хадичаи Кубро», Бухорода «Жўйбори калон» аёл-қизлар билим юрти) ҳамда имомларни қайта тайёрлайдиган Имом ал-Бухорий халқаро маркази мавжуд.
1999 йилдан фаолиятини бошлаган «Кўкалдош» Тошкент ислом ўрта махсус билим юрти тизимдаги энг фаол ўқув муассасаларидан бири бўлиб, унда айни пайтда 97 нафар талаба таълим олмоқда. 4 йиллик муддатда, шартнома асосида (2012-2013 ўқув йили учун 2 200 000 сўм) таълимни муваффақиятли битирган толибларга имом-хатиб, диншунослик, бошланғич араб тили ва одобнома мураббийси мутахассисликлари дипломи берилади.

Пойтахтнинг юраги

Мазкур билим юрти Тошкент шаҳрининг Чорсу майдонидаги Шаҳристон тепалигида Хўжа Аҳрор Валий жомеъ масжидининг ёнида анъанавий шарқона услуб асосида бунёд этилган тарихий «Кўкалдош» мадрасаси биносида жойлашган. Мадраса 1551-1575 йиллар орасида қуриб ишга туширилган. Дастлаб қурилганда мадраса уч қаватдан иборат бўлган. XVIII асрга келиб қаровсиз қолган мадраса карвонсарой сифатида фойдаланилган. 1866-1886 йилларда рўй берган зилзила натижасида мадраса пештоқининг юқори қисми қулаб тушган ва мадраса вайронага айланган. 1902-1903 йилларда Тошкент шаҳри аҳолисининг хайрия маблағлари ҳисобидан таъмирлаш ишлари олиб борилади. Маблағ етишмаслиги сабабли таъмирлаш ишлари тўхтаб қолиб, ёдгорлик ўзининг аввалги ҳолатига қайтарилмайди. Кўкалдош мадрасаси ва унинг ёнидаги Хўжа Аҳрор Валий жомеъ масжиди 1865 йилда Генерал Черняев бошчилигидаги Тошкентни забт этишда қаттиқ шикастланган. 1886 йили рус муҳандислари томонидан хонақолар ва жомеъ масжид қайта таъмирланиш натижасида ўзининг дастлабки меъморий кўринишини тамоман йўқотган. Коммунистик мафкуранинг ҳукмронлиги даврида мадраса биноси умуман қаровсиз қолиб кетган: хоналар омборхона, ётоқхона, ҳар хил устахоналар сифатида фойдаланилган.

Кўҳна билим даргоҳи

Мазкур илм масканида кўплаб олиму фузалолар дарс берганлар, таҳсил олганлар. XVI асрда Тошкентда ишлаб турган Хожа Аҳрор жомеъи, Бароқхон ва Кўкалдош мадрасаларида ўз замонасининг машҳур олимларидан Шамсиддин Муҳаммад Куртий, Хожа Юсуф Қошғарийлар дарс берганлар. Ўзбек мумтоз шеъриятининг вакилларидан Муқимий, Фурқат, Ҳамза Ҳакимзода Ниёзий ушбу мадрасада истиқомат қилиб, ижод билан шуғулланган. Хазиний ҳам Тошкентга келган пайтларида албатта Кўкалдош мадрасасида тўхтаб, мударрис ва талабалар билан кўплаб ажойиб суҳбатлар қурган. XIX аср охири XX аср бошларидаги ўзбек шеъриятининг таниқли вакиллари Мулло Қўшоқ Мисний, Хислат, Сидқий Хондайлиқийлар ҳам Кўкалдош мадрасасида таҳсил олганлар. Машҳур уламоларимиздан Сайид Маҳмуд Тарозий, Олтинхон Тўра, Юнус Мақсудий ва Зиёвуддин ибн Эшон Бобохон ҳазратлари ҳам бу ерда XX аср бошларида таҳсил олиб, илм пиллапояларида юксалиб боришган.
Мадрасада Ислом дини қонун-қоидалари, араб ва форс тили грамматикаси, адабиёт, одоб-ахлоқ, математика, геометрия, астрономия каби фанлар ўқитилган. Дарслар араб ва форс тилларидаги китоблар бўйича ўтилган. Мадрасани битириб чиққан илм аҳллари араб, форс ва туркий тилларни мукаммал ўрганганлар, минглаб ҳадисларни ёддан билганлар, мадраса ҳужраларида яшаб, Қуръони каримни ёд олганлар.

Оққан дарё оқаверади

Ушбу мадраса фаолият бошланганидан буён 1999 йилга қадар «Кўкалдош мадраса масжиди» деб номланган. 1999 йилда Ўзбекистон мусулмонлари идораси томонидан янги Низом тасдиқланиб, 1999 йил 18 августда Ўзбекистон Республикаси Адлия Вазирлигида расмий рўйхатдан ўтгандан сўнг «Кўкалдош Тошкент ислом ўрта махсус билим юрти» деб номланди. Билим юрти 1999 йил 10 октябрда махсус рухсатнома олиб, 1 ноябрдан расмий фаолият кўрсата бошлади.
Ҳозирги кунда билим юртида Қуръони карим, тафсир, ҳадис, фиқҳ, сарф, наҳв, ақоид, мутолаа, хатоба, ислом тарихи каби диний илмлар билан бир қаторда бошқа ўрта махсус таълим муассаларида ўқитиладиган ўзбек тили ва адабиёти, тарих, жуғрофия, инглиз тили, физика, математика, астрономия, информатика каби дунёвий фанлар ҳам ўқитилади. Тафсир фанидан «Тафсири Жалолайн», ҳадис фанидан «Мушкотул масобиҳ», фиқҳ фанидан «Мухтасар ул-виқоя» ва унинг шарҳи, ақоид фанидан «Фиқҳул акбар», «Бадъул омолий», «Ақидатут Таҳовий», араб тили фанидан «Дурусун наҳв», сийрат фанидан «Нурул яқин» китоблари ўқитилади. Ўзлаштириши юқори бўлган талабалар учун чуқурлаштирилган алоҳида ўқув режаси ишлаб чиқилган.
Таълимга малакали, олий маълумотли мударрислар жалб этилган. Ўқитувчилардан Жалолиддин Аҳмедов, Абдувосеъ Ғаниев, Эркин Миркомилов илмий иш билан шуғулланмоқдалар. 3 нафар мударрислар Мисрнинг «Ал-Азҳар» ва Мадина Ислом университетида таълим олганлар. Ҳозирда илм масканига Мадина Ислом университети ва Тошкент Ислом институтини тамомлаган Хомиджон Эшматбеков мудирлик қилмоқда.

Ўқишга кирмоқчимисиз?

«Билим юртимизга ўрта таълимни битирган, 15 ёшдан 35 ёшгача абитуриентлар ҳужжат топширишлари мумкин. Бу йил ўқишга кирганлар орасида икки нафар олий маълумотли талаба ҳам мавжуд. Ўтган йили 24 ўринга 86 киши ҳужжат топширди. Авваллари билим юртига республикамизнинг барча ҳудудларидан абитуриентлар келиб, ҳужжат топширишарди. 2008 йили 445 та, кейинги йили 275 нафар абитуриент ҳужжат топширган. «Кўкалдош» мадрасасининг тарихийлиги, билим масканининг обрўси ҳамда пойтахтда жойлашганлиги сабаб кўплаб илм толиблари шу ерга интилишарди. Республикамизнинг турли ҳудудларидаги бошқа исломий ўрта махсус таълим муассасаларига ҳам иқтидорли талабаларни жалб этиш ҳамда ўша ҳудудлар учун малакали диний кадрларни тайёрлаш мақсадида кейинги йиллардан абитуриентларнинг ўзларига яқин ҳудуддаги билим юртларига ҳужжат топширишлари тавсия этилди. Шу сабаб бизга ҳужжат топширадиган абитуриентлар сони қисқарди. «Кўкалдош» Тошкент ислом ўрта махсус билим юртига Тошкент шаҳри ва вилояти, ўзларида диний билим юрти мавжуд бўлмаган Сирдарё, Жиззах ва Самарқанд вилоятидан келган абитуриентлар ҳужжат топширишлари мумкин. Имтиҳонлар 4 фандан — она тилидан диктант, чет тили, маънавият ва тарих фанларидан тест усулида олинади. Имтиҳон саволлари Ўзбекистон мусулмонлари диний идорасида тузилиб, синовлар ўтказиладиган куни абитуриентлар ва уларнинг ота-оналари ҳузурида очилади. Муқаддас динимизга қизиқадиган, халқимизга исломий маърифатни тарқатишга иштиёқманд барча ёшлар учун эшикларимиз очиқ», — дейди билим юрти мудири Хомиджон Эшматбеков.
Икки дунёда саодатли бўлмоқчимисиз? Илм талаб қилинг!

Билим юрти ахборот ресурс марказида 6000 дан ортиқ адабиёт мавжуд. Таҳфизул-Қуръон, хаттотлик, фиқҳ, ҳадис, араб тили тўгараклари ишлаб турибди. Уларда талабалар асосий дарслардан сўнг қўшимча илм ўрганмоқдалар.
 «Кўкалдош» битирувчилари икки йилдан бери Ўзбекистон мусулмонлари идораси тизимидаги ўрта махсус таълим муассасалари орасида ўтказиладиган ягона олимпиада ғолиблари бўлиб, Тошкент Ислом институтига беимтиҳон кириш имтиёзига эга бўлмоқдалар.
Диний ва миллий байрамларимиз, алломаларимиз таваллудлари муносабати билан мунатазам тадбирлар, танловлар ўтказилиб, талабалар муносиб тақдирланади. «Баркамол авлод» спорт ўйинларида билим юрти талабалари шахмат, теннис, тош кўтариш, кураш турларидан қатнашишди.
Сўнгги ўтказилган XXIII республика қорилар мусобақасида мураттаб қорилар баҳсида «Кўкалдош» талабаси Мурод Умархўжаев 2-ўринни, мужаввид қорилар баҳсида Икром Каримов 1-ўринни эгаллади. Бу икки талабанинг Ливанда ўтказиладиган халқаро қорилар муносабақасига номзоди кўрсатилган. Ўтган йилларда билим юртининг қори талабалари Кувайт, Индонезиядаги танловларда қатнашишган. Ҳозирда бу даргоҳда 8 нафар мураттаб қори таълим олмоқда. Улар Рамазон ойида Тошкент шаҳридаги жомеъ масжидларда Қуръони каримни хатм қилмоқдалар.
Ўтган йилги битирувчиларнинг 6 нафари олий ўқув юртларига кириб, таълимни давом эттирмоқда. Ўзбекистон мусулмонлари идорасининг таълим бўлими тақсимотига кўра, билим юрти битирувчилари ўзлари яшаб турган ҳудуддаги масжидларга имом-хатиблик, ноибликка юборилади.
Билим юртида талабалар костюм-шим, оч рангли кўйлак, имкон қадар миллий дўппида бўлишлари талаб қилинади. Мадраса ҳудудида уяли алоқа телефонларидан фойдаланиш тақиқланади. Талабаларга 2 маҳал бепул иссиқ овқат, стипендия берилади. 45 ўринли ётоқхона, таҳоратхона, масжид илм толиблари ихтиёрида. Тарихий мадраса биносининг масжидида талабалар 5 вақт намозни адо этадилар. Жумъа кунлари, ётоқхонада турадиган талабалар ҳар куни навбат билан имомлик қиладилар.
Муқаддас динимиз таълимотларини мукаммал эгаллаган, иймон-эътиқоди бутун, иродаси бақувват, аждодларимизнинг нодир маънавий меросларини чуқур ўрганган ва замонавий тафаккурга эга комил инсонлар тарбиялаш, ҳамюртларимизнинг диний саводхонлигини ошириш ва шу йўлда хизмат қилувчи замонавий, етук уламоларни тайёрлаш «Кўкалдош» Тошкент ислом ўрта махсус билим юртининг бош мақсадидир.

Давронбек Тожиалиев тайёрлади.

* * *

«Ko‘kaldosh» — qadim ilm beshigi


Yurtimizda dunyoviy bilimlar bilan bir qatorda Islom asoslari, Qur’oni karim, hadisi sharif, tafsir, fiqh, aqoid kabi uxroviy ilmlarni o‘rgatishga mo‘ljallangan diniy bilim yurtlari ham talaygina. O‘zbekiston musulmonlari idorasi tizimida bitta oliy (Toshkent Islom instituti), 9 ta o‘rta maxsus ta’lim muassasalari (Toshkentda «Ko‘kaldosh», Buxoroda «Mirarab», Andijonda «Sayyid Muhyiddin Maxdum», Namanganda «Mulla Qirg‘iz», Kitobda «Xoja Buxoriy», Urganchda «Faxriddin ar-Roziy», Nukusda «Muhammad al-Beruniy», shuningdek Toshkentda «Xadichai Kubro», Buxoroda «Jo‘ybori kalon» ayol-qizlar bilim yurti) hamda imomlarni qayta tayyorlaydigan Imom al-Buxoriy xalqaro markazi mavjud.
1999 yildan faoliyatini boshlagan «Ko‘kaldosh» Toshkent islom o‘rta maxsus bilim yurti tizimdagi eng faol o‘quv muassasalaridan biri bo‘lib, unda ayni paytda 97 nafar talaba ta’lim olmoqda. 4 yillik muddatda, shartnoma asosida (2012-2013 o‘quv yili uchun 2 200 000 so‘m) ta’limni muvaffaqiyatli bitirgan toliblarga imom-xatib, dinshunoslik, boshlang‘ich arab tili va odobnoma murabbiysi mutaxassisliklari diplomi beriladi.

Poytaxtning yuragi


Mazkur bilim yurti Toshkent shahrining Chorsu maydonidagi Shahriston tepaligida Xo‘ja Ahror Valiy jome’ masjidining yonida an’anaviy sharqona uslub asosida bunyod etilgan tarixiy «Ko‘kaldosh» madrasasi binosida joylashgan. Madrasa 1551-1575 yillar orasida qurib ishga tushirilgan. Dastlab qurilganda madrasa uch qavatdan iborat bo‘lgan. XVIII asrga kelib qarovsiz qolgan madrasa karvonsaroy sifatida foydalanilgan. 1866-1886 yillarda ro‘y bergan zilzila natijasida madrasa peshtoqining yuqori qismi qulab tushgan va madrasa vayronaga aylangan. 1902-1903 yillarda Toshkent shahri aholisining xayriya mablag‘lari hisobidan ta’mirlash ishlari olib boriladi. Mablag‘ yetishmasligi sababli ta’mirlash ishlari to‘xtab qolib, yodgorlik o‘zining avvalgi holatiga qaytarilmaydi. Ko‘kaldosh madrasasi va uning yonidagi Xo‘ja Ahror Valiy jome’ masjidi 1865 yilda General Chernyaev boshchiligidagi Toshkentni zabt etishda qattiq shikastlangan. 1886 yili rus muhandislari tomonidan xonaqolar va jome’ masjid qayta ta’mirlanish natijasida o‘zining dastlabki me’moriy ko‘rinishini tamoman yo‘qotgan. Kommunistik mafkuraning hukmronligi davrida madrasa binosi umuman qarovsiz qolib ketgan: xonalar omborxona, yotoqxona, har xil ustaxonalar sifatida foydalanilgan.

Ko‘hna bilim dargohi


Mazkur ilm maskanida ko‘plab olimu fuzalolar dars berganlar, tahsil olganlar. XVI asrda Toshkentda ishlab turgan Xoja Ahror jome’i, Baroqxon va Ko‘kaldosh madrasalarida o‘z zamonasining mashhur olimlaridan Shamsiddin Muhammad Kurtiy, Xoja Yusuf Qoshg‘ariylar dars berganlar. O‘zbek mumtoz she’riyatining vakillaridan Muqimiy, Furqat, Hamza Hakimzoda Niyoziy ushbu madrasada istiqomat qilib, ijod bilan shug‘ullangan. Xaziniy ham Toshkentga kelgan paytlarida albatta Ko‘kaldosh madrasasida to‘xtab, mudarris va talabalar bilan ko‘plab ajoyib suhbatlar qurgan. XIX asr oxiri XX asr boshlaridagi o‘zbek she’riyatining taniqli vakillari Mullo Qo‘shoq Misniy, Xislat, Sidqiy Xondayliqiylar ham Ko‘kaldosh madrasasida tahsil olganlar. Mashhur ulamolarimizdan Sayid Mahmud Taroziy, Oltinxon To‘ra, Yunus Maqsudiy va Ziyovuddin ibn Eshon Boboxon hazratlari ham bu yerda XX asr boshlarida tahsil olib, ilm pillapoyalarida yuksalib borishgan.
Madrasada Islom dini qonun-qoidalari, arab va fors tili grammatikasi, adabiyot, odob-axloq, matematika, geometriya, astronomiya kabi fanlar o‘qitilgan. Darslar arab va fors tillaridagi kitoblar bo‘yicha o‘tilgan. Madrasani bitirib chiqqan ilm ahllari arab, fors va turkiy tillarni mukammal o‘rganganlar, minglab hadislarni yoddan bilganlar, madrasa hujralarida yashab, Qur’oni karimni yod olganlar.

Oqqan daryo oqaveradi


Ushbu madrasa faoliyat boshlanganidan buyon 1999 yilga qadar «Ko‘kaldosh madrasa masjidi» deb nomlangan. 1999 yilda O‘zbekiston musulmonlari idorasi tomonidan yangi Nizom tasdiqlanib, 1999 yil 18 avgustda O‘zbekiston Respublikasi Adliya Vazirligida rasmiy ro‘yxatdan o‘tgandan so‘ng «Ko‘kaldosh Toshkent islom o‘rta maxsus bilim yurti» deb nomlandi. Bilim yurti 1999 yil 10 oktyabrda maxsus ruxsatnoma olib, 1 noyabrdan rasmiy faoliyat ko‘rsata boshladi.
Hozirgi kunda bilim yurtida Qur’oni karim, tafsir, hadis, fiqh, sarf, nahv, aqoid, mutolaa, xatoba, islom tarixi kabi diniy ilmlar bilan bir qatorda boshqa o‘rta maxsus ta’lim muassalarida o‘qitiladigan o‘zbek tili va adabiyoti, tarix, jug‘rofiya, ingliz tili, fizika, matematika, astronomiya, informatika kabi dunyoviy fanlar ham o‘qitiladi. Tafsir fanidan «Tafsiri Jalolayn», hadis fanidan «Mushkotul masobih», fiqh fanidan «Muxtasar ul-viqoya» va uning sharhi, aqoid fanidan «Fiqhul akbar», «Bad’ul omoliy», «Aqidatut Tahoviy», arab tili fanidan «Durusun nahv», siyrat fanidan «Nurul yaqin» kitoblari o‘qitiladi. O‘zlashtirishi yuqori bo‘lgan talabalar uchun chuqurlashtirilgan alohida o‘quv rejasi ishlab chiqilgan.
Ta’limga malakali, oliy ma’lumotli mudarrislar jalb etilgan. O‘qituvchilardan Jaloliddin Ahmedov, Abduvose’ G‘aniyev, Erkin Mirkomilov ilmiy ish bilan shug‘ullanmoqdalar. 3 nafar mudarrislar Misrning «Al-Azhar» va Madina Islom universitetida ta’lim olganlar. Hozirda ilm maskaniga Madina Islom universiteti va Toshkent Islom institutini tamomlagan Xomidjon Eshmatbekov mudirlik qilmoqda.

O‘qishga kirmoqchimisiz?


«Bilim yurtimizga o‘rta ta’limni bitirgan, 15 yoshdan 35 yoshgacha abiturientlar hujjat topshirishlari mumkin. Bu yil o‘qishga kirganlar orasida ikki nafar oliy ma’lumotli talaba ham mavjud. O‘tgan yili 24 o‘ringa 86 kishi hujjat topshirdi. Avvallari bilim yurtiga respublikamizning barcha hududlaridan abiturientlar kelib, hujjat topshirishardi. 2008 yili 445 ta, keyingi yili 275 nafar abiturient hujjat topshirgan. «Ko‘kaldosh» madrasasining tarixiyligi, bilim maskanining obro‘si hamda poytaxtda joylashganligi sabab ko‘plab ilm toliblari shu yerga intilishardi. Respublikamizning turli hududlaridagi boshqa islomiy o‘rta maxsus ta’lim muassasalariga ham iqtidorli talabalarni jalb etish hamda o‘sha hududlar uchun malakali diniy kadrlarni tayyorlash maqsadida keyingi yillardan abiturientlarning o‘zlariga yaqin hududdagi bilim yurtlariga hujjat topshirishlari tavsiya etildi. Shu sabab bizga hujjat topshiradigan abiturientlar soni qisqardi. «Ko‘kaldosh» Toshkent islom o‘rta maxsus bilim yurtiga Toshkent shahri va viloyati, o‘zlarida diniy bilim yurti mavjud bo‘lmagan Sirdaryo, Jizzax va Samarqand viloyatidan kelgan abiturientlar hujjat topshirishlari mumkin. Imtihonlar 4 fandan — ona tilidan diktant, chet tili, ma’naviyat va tarix fanlaridan test usulida olinadi. Imtihon savollari O‘zbekiston musulmonlari diniy idorasida tuzilib, sinovlar o‘tkaziladigan kuni abiturientlar va ularning ota-onalari huzurida ochiladi. Muqaddas dinimizga qiziqadigan, xalqimizga islomiy ma’rifatni tarqatishga ishtiyoqmand barcha yoshlar uchun eshiklarimiz ochiq», — deydi bilim yurti mudiri Xomidjon Eshmatbekov.

Ikki dunyoda saodatli bo‘lmoqchimisiz? Ilm talab qiling!


Bilim yurti axborot resurs markazida 6000 dan ortiq adabiyot mavjud. Tahfizul-Qur’on, xattotlik, fiqh, hadis, arab tili to‘garaklari ishlab turibdi. Ularda talabalar asosiy darslardan so‘ng qo‘shimcha ilm o‘rganmoqdalar.
«Ko‘kaldosh» bitiruvchilari ikki yildan beri O‘zbekiston musulmonlari idorasi tizimidagi o‘rta maxsus ta’lim muassasalari orasida o‘tkaziladigan yagona olimpiada g‘oliblari bo‘lib, Toshkent Islom institutiga beimtihon kirish imtiyoziga ega bo‘lmoqdalar.
Diniy va milliy bayramlarimiz, allomalarimiz tavalludlari munosabati bilan munatazam tadbirlar, tanlovlar o‘tkazilib, talabalar munosib taqdirlanadi. «Barkamol avlod» sport o‘yinlarida bilim yurti talabalari shaxmat, tennis, tosh ko‘tarish, kurash turlaridan qatnashishdi.
So‘nggi o‘tkazilgan XXIII respublika qorilar musobaqasida murattab qorilar bahsida «Ko‘kaldosh» talabasi Murod Umarxo‘jayev 2-o‘rinni, mujavvid qorilar bahsida Ikrom Karimov 1-o‘rinni egalladi. Bu ikki talabaning Livanda o‘tkaziladigan xalqaro qorilar munosabaqasiga nomzodi ko‘rsatilgan. O‘tgan yillarda bilim yurtining qori talabalari Kuvayt, Indoneziyadagi tanlovlarda qatnashishgan. Hozirda bu dargohda 8 nafar murattab qori ta’lim olmoqda. Ular Ramazon oyida Toshkent shahridagi jome’ masjidlarda Qur’oni karimni xatm qilmoqdalar.
O‘tgan yilgi bitiruvchilarning 6 nafari oliy o‘quv yurtlariga kirib, ta’limni davom ettirmoqda. O‘zbekiston musulmonlari idorasining ta’lim bo‘limi taqsimotiga ko‘ra, bilim yurti bitiruvchilari o‘zlari yashab turgan hududdagi masjidlarga imom-xatiblik, noiblikka yuboriladi.
Bilim yurtida talabalar kostyum-shim, och rangli ko‘ylak, imkon qadar milliy do‘ppida bo‘lishlari talab qilinadi. Madrasa hududida uyali aloqa telefonlaridan foydalanish taqiqlanadi. Talabalarga 2 mahal bepul issiq ovqat, stipendiya beriladi. 45 o‘rinli yotoqxona, tahoratxona, masjid ilm toliblari ixtiyorida. Tarixiy madrasa binosining masjidida talabalar 5 vaqt namozni ado etadilar. Jum’a kunlari, yotoqxonada turadigan talabalar har kuni navbat bilan imomlik qiladilar.
Muqaddas dinimiz ta’limotlarini mukammal egallagan, iymon-e’tiqodi butun, irodasi baquvvat, ajdodlarimizning nodir ma’naviy meroslarini chuqur o‘rgangan va zamonaviy tafakkurga ega komil insonlar tarbiyalash, hamyurtlarimizning diniy savodxonligini oshirish va shu yo‘lda xizmat qiluvchi zamonaviy, yetuk ulamolarni tayyorlash «Ko‘kaldosh» Toshkent islom o‘rta maxsus bilim yurtining bosh maqsadidir.

Davronbek Tojialiyev tayyorladi.