Муфтий Усмонхон Алимов дунёдаги энг обрўли мусулмонлар рўйхатидан ўрин олди

Рукн: Янгиликлар Чоп этилган: 07.10.2015

Иордания Қироллик стратегик ислом таълими маркази жаҳоннинг энг обрўли мусулмонларининг янги 500 талик рўйхати эълон қилинди. 2015 йилги рейтингдан Ўзбекистон Мусулмонлар идораси раҳбари, муфтий Усмонхон Алимов ҳам ўрин олган.

Рейтингда Иордания қироли Абдуллоҳ ибн ал-Ҳусайн етакчилик қилди. Иккинчи поғонани мисрлик шайх Муҳаммад ал Тоййиб банд этди. Учинчи ўрин Саудия Арабистони қироли Салмон бин Абдул-Азиз ал-Саудга насиб этди. Рўйхатга, шунингдек Туркия президенти Ражаб Тойиб Эрдўған, Туркманистон президенти Гурбангули Бердимуҳаммедов, Озарбайжон президенти Илҳом Алиев, Татаристон раҳбари Рустам Минниханов, чеченлар етакчиси Рамзан Қодиров ҳамда илк бор Тожикистон президенти Эмомали Раҳмон ҳам киритилди.

Жаҳоннинг энг эътиборли мусулмонларининг 500 талик рўйхати 2009 йилдан бери Иордания Қироллик стратегик ислом таълими маркази томонидан тузиб келинади. Муфтий Усмонхон Алимов 2009 йилдан бери рейтингдан мунтазам ўрин олиб келади.

Усмонхон Алимов 1950 йил 1 январда Самарқанд вилоятида туғилган бўлиб, 1982-83 йилларда Бухородаги «Мир Араб» мадрасасида, 1983-87 йилларда эса Тошкент ислом институтида, 1989-90 йилларда Марокашдаги «Каравайин» университетида таҳсил олган. 1987-2000 йиллар давомида Паяриқ туманидаги «Имом Бухорий» масжидида имом-хатиб, 2000 йилдан эса Ўзбекистон Мусулмонлар идорасининг Самарқанддаги бош вакили вазифасида фаолият олиб борган. 2006 йил 8 август куни эса Усмонхон Алимов Ўзбекистон мусулмонлари идораси раиси, муфтий лавозимига тайинланган.

Муфтий Усмонхон Алимовдан ташқари, жаҳоннинг энг эътиборли мусулмонларининг 500 талик рейтингидан Ўзбекистондан 2009 йилги илк рейтингда Шайх Муҳаммад Содиқ Муҳаммад Юсуф, 2013 йили эса Ўзбекистон Президенти Ислом Каримов жой олган.

* * *

Iordaniya Qirollik strategik islom ta’limi markazi jahonning eng obro‘li musulmonlarining yangi 500 talik ro‘yxati e’lon qilindi. 2015 yilgi reytingdan O‘zbekiston Musulmonlar idorasi rahbari, muftiy Usmonxon Alimov ham o‘rin olgan.

Reytingda Iordaniya qiroli Abdulloh ibn al-Husayn yetakchilik qildi. Ikkinchi pog‘onani misrlik shayx Muhammad al Toyyib band etdi. Uchinchi o‘rin Saudiya Arabistoni qiroli Salmon bin Abdul-Aziz al-Saudga nasib etdi. Ro‘yxatga, shuningdek Turkiya prezidenti Rajab Toyib Erdo‘g‘an, Turkmaniston prezidenti Gurbanguli Berdimuhammedov, Ozarbayjon prezidenti Ilhom Aliev, Tatariston rahbari Rustam Minnixanov, chechenlar yetakchisi Ramzan Qodirov hamda ilk bor Tojikiston prezidenti Emomali Rahmon ham kiritildi.

Jahonning eng e’tiborli musulmonlarining 500 talik ro‘yxati 2009 yildan beri Iordaniya Qirollik strategik islom ta’limi markazi tomonidan tuzib kelinadi. Muftiy Usmonxon Alimov 2009 yildan beri reytingdan muntazam o‘rin olib keladi.

Usmonxon Alimov 1950 yil 1 yanvarda Samarqand viloyatida tug‘ilgan bo‘lib, 1982-83 yillarda Buxorodagi «Mir Arab» madrasasida, 1983-87 yillarda esa Toshkent islom institutida, 1989-90 yillarda Marokashdagi «Karavayin» universitetida tahsil olgan. 1987-2000 yillar davomida Payariq tumanidagi «Imom Buxoriy» masjidida imom-xatib, 2000 yildan esa O‘zbekiston Musulmonlar idorasining Samarqanddagi bosh vakili vazifasida faoliyat olib borgan. 2006 yil 8 avgust kuni esa Usmonxon Alimov O‘zbekiston musulmonlari idorasi raisi, muftiy lavozimiga tayinlangan.

Muftiy Usmonxon Alimovdan tashqari, jahonning eng e’tiborli musulmonlarining 500 talik reytingidan O‘zbekistondan 2009 yilgi ilk reytingda Shayx Muhammad Sodiq Muhammad Yusuf, 2013 yili esa O‘zbekiston Prezidenti Islom Karimov joy olgan.