Шайх Муҳаммад Содиқ раҳимаҳуллоҳнинг янги “Зуҳд ва ҳаё” китоби чоп этилди

“Ҳилол-нашр” нашриётида Шайх Муҳаммад Содиқ Муҳаммад Юсуф раҳимаҳуллоҳ қаламига мансуб янги “Зуҳд ва ҳаё” китоби ҳамда "Қуръони карим ва ўзбек тилидаги маънолари таржимаси"нинг янги нашри тақдимот маросими бўлиб ўтди. Унда нашриёт ходимлари, уламолар ва толиби илмлар қатнашди.

Тақдимот маросими Қуръони карим тиловати билан бошланди. Тошкент шаҳар бош имом хатиби Анвар қори Турсунов, Тошкент вилояти бош имом хатиби Хайрулло Турматов, “Чимир ота” жомеъ масжиди ноиб имоми Абдулбосит қори ушбу китобларнинг аҳамияти, мазмун-мундарижаси ҳақида гапирдилар.

“Зуҳд ва ҳаё” китоби “Исломнинг мадори бўлган ҳадислар” туркуми остида чоп этилган иккинчи китобдир (бундан аввал ушбу туркумда “Амаллар ниятга боғлиқдир” китоби нашр этилган). Ушбу китоб зуҳд ва ҳаё ҳақидаги икки машҳур ҳадисга бағишланган бўлиб, унда ҳадисларнинг хусусиятлари, шарҳи, зуҳд ва ҳаёга оид ояти карима ва ҳадиси шарифлардан намуналар, зоҳидликнинг фойдалари, иффатнинг турлари, ҳаёнинг таърифи ва унинг фойдалари ҳақида муфассал маълумот берилган.

5000 ададда чоп этилган “Зуҳд ва ҳаё” китоби Тошкент шаҳри, Сўгалли ота кўчаси, 5-уйда жойлашган “Ҳилол-нашр” нашриёти дўконида душанба кунидан сотувга чиқарилади.

* * *

“Hilol-nashr” nashriyotida Shayx Muhammad Sodiq Muhammad Yusuf rahimahulloh qalamiga mansub yangi “Zuhd va hayo” kitobi hamda “Qur’oni karim va o‘zbek tilidagi ma’nolari tarjimasi”ning yangi nashri taqdimot marosimi bo‘lib o‘tdi. Unda nashriyot xodimlari, ulamolar va tolibi ilmlar qatnashdi.

Taqdimot marosimi Qur’oni karim tilovati bilan boshlandi. Toshkent shahar bosh imom xatibi Anvar qori Tursunov, Toshkent viloyati bosh imom xatibi Xayrullo Turmatov, “Chimir ota” jome’ masjidi noib imomi Abdulbosit qori ushbu kitoblarning ahamiyati, mazmun-mundarijasi haqida gapirdilar.

“Zuhd va hayo” kitobi “Islomning madori bo‘lgan hadislar” turkumi ostida chop etilgan ikkinchi kitobdir (bundan avval ushbu turkumda “Amallar niyatga bog‘liqdir” kitobi nashr etilgan). Ushbu kitob zuhd va hayo haqidagi ikki mashhur hadisga bag‘ishlangan bo‘lib, unda hadislarning xususiyatlari, sharhi, zuhd va hayoga oid oyati karima va hadisi shariflardan namunalar, zohidlikning foydalari, iffatning turlari, hayoning ta’rifi va uning foydalari haqida mufassal ma’lumot berilgan.

5000 adadda chop etilgan “Zuhd va hayo” kitobi Toshkent shahri, So‘galli ota ko‘chasi, 5-uyda joylashgan “Hilol-nashr” nashriyoti do‘konida dushanba kunidan sotuvga chiqariladi.

• Олдинги
• Кейинги