3-14 сентябрь кунлари 5200 нафар юртдошларимиз Ҳаж сафарига юборилади

“Ҳаж” ва “Умра” тадбирларини ташкил этиш ва ўтказиш масалалари бўйича Жамоатчилик кенгаши зиёратни юқори савияда ташкил этиш, зиёратчиларимизга мамлакатимизда ва Саудия Арабистонида қулай шарт-шароитлар яратиш йўлида фаолият олиб бормоқда. Кенгаш қарорлари асосида ҳаж ва умра тадбирлари ташкил этилмоқда, дея хабар беради дин ишлари бўйича қўмита матбуот хизмати.

Жорий йилнинг 3-14 сентябрь кунлари ўзбекистонлик 5200 нафар зиёратчи “Ўзбекистон ҳаво йўллари” Миллий авиакомпаниясининг Тошкент-Мадина, Бухоро-Мадина, Самарқанд-Мадина, Термиз-Мадина, Наманган-Мадина, ҳамда Урганч-Мадина йўналишларида ҳаж сафарига жўнатилиши режалаштирилган. 

Жорий йилнинг 28 август куни ҳожилар учун меҳмонхона, тиббий марказ, ошхона ва бошқа ташкилий масалаларни ҳал этиш мақсадида 10 нафар ишчи гуруҳи аъзолари Саудия Арабистонига жўнатилади. Кузатиш ва кутиб олиш тадбирлари Дин ишлари бўйича қўмита, Ўзбекистон мусулмонлари идораси, мутасадди вазирлик ва идоралар ҳамкорлигида амалга оширилади.

Зиёратчиларга сафар олдидан давлатимиз рамзлари акс эттирилган махсус кийим (камзул) ва сумкалар, “Ҳажнома” китобчаси ва видеотасмалар тақдим этилди. Барча зиёратчилар марказлашган тиббий пунктларида миненгит ва гриппга қарши зардоб билан эмландилар. Саудия Арабистонида ҳаво ҳароратининг юқори даражада бўлиши кузатилаётганлигини инобатга олиб, шифокорлар гуруҳи томонидан зиёратчиларнинг саломатлигини сақлаш мақсадида эслатма ва тавсиялар ишлаб чиқилиб, тегишли тушунтириш ишлари олиб борилмоқда.

Ўзбекистонлик зиёратчилар учун Мадина шаҳрида “Масжид ан-Набавий”дан 100 метр узоқликда жойлашган “Жавҳарат ул-Асима”, Макка шаҳрида эса Ҳарамдан 4500-5000 метр узоқликдаги тўрт буржли “Аброж ал-Муҳаммадия” меҳмонхонаси тайёрлаб қўйилган. Ҳар бир хона музлатгич, телевизор, кир ювиш машинаси ҳамда кондиционерлар билан жихозланган. 24 соат давомида замонавий автобусларда зиёратчиларни Макка шаҳридаги харам масжидига ташиш йўлга қўйилади.

Ўзбекистонлик ҳожилар Мадина шаҳрида 3 кеча - 4 кундуз бўлиб, бу ердаги муқаддас қадамжоларни зиёрат қилганларидан сўнг Макка шаҳрига йўл оладилар. Зиёратчиларга мавсум давомида ўзбекистонлик 25 нафардан иборат ишчи гуруҳи, 102 нафар гуруҳ раҳбари, 30 нафар шифокор ва 10 нафар ошпаз хизмат кўрсатади. Зиёратчилар учун Саудиядаги меҳмонхоналарда сунъий йўлдош орқали Ўзбекистон телевиденияси дастурларини томоша қилиш, Ватанимизда бўлаётган воқеалардан хабардор бўлиш имкониятлари яратилган.

27 сентябрь - 8 октябрь кунлари ўзбекистонлик ҳожиларни “Ўзбекистон ҳаво йўллари” Миллий авиакомпанияси самолётларида Жидда-Тошкент, Жидда-Бухоро, Жидда-Самарқанд, Жидда-Термиз Жидда-Наманган, ҳамда Жидда-Урганч йўналишлари бўйича Ватанимизга олиб келиш режалаштирилган.

2015 йилда муқаддас Макка шаҳри ва унинг атрофида тахминан 1,5 млн киши ҳаж ибодатини адо этади. Маккага хориждан 1,35 млн, мамлакатнинг ички ҳудудларидан 185 минг нафар ҳожиларнинг келиши кутилмоқда. Бугунга қадар эса тахминан 100 минг киши қиролликка келиб улгурди. Муқаддас Макка шаҳридаги 2015 йилги ҳаж мавсуми 20 сентябрда бошланади.

* * *

“Haj” va “Umra” tadbirlarini tashkil etish va o‘tkazish masalalari bo‘yicha Jamoatchilik kengashi ziyoratni yuqori saviyada tashkil etish, ziyoratchilarimizga mamlakatimizda va Saudiya Arabistonida qulay shart-sharoitlar yaratish yo‘lida faoliyat olib bormoqda. Kengash qarorlari asosida haj va umra tadbirlari tashkil etilmoqda, deya xabar beradi din ishlari bo‘yicha qo‘mita matbuot xizmati.

Joriy yilning 3-14 sentyabr kunlari o‘zbekistonlik 5200 nafar ziyoratchi “O‘zbekiston havo yo‘llari” Milliy aviakompaniyasining Toshkent-Madina, Buxoro-Madina, Samarqand-Madina, Termiz-Madina, Namangan-Madina, hamda Urganch-Madina yo‘nalishlarida haj safariga jo‘natilishi rejalashtirilgan. 

Joriy yilning 28 avgust kuni hojilar uchun mehmonxona, tibbiy markaz, oshxona va boshqa tashkiliy masalalarni hal etish maqsadida 10 nafar ishchi guruhi a’zolari Saudiya Arabistoniga jo‘natiladi. Kuzatish va kutib olish tadbirlari Din ishlari bo‘yicha qo‘mita, O‘zbekiston musulmonlari idorasi, mutasaddi vazirlik va idoralar hamkorligida amalga oshiriladi.

Ziyoratchilarga safar oldidan davlatimiz ramzlari aks ettirilgan maxsus kiyim (kamzul) va sumkalar, “Hajnoma” kitobchasi va videotasmalar taqdim etildi. Barcha ziyoratchilar markazlashgan tibbiy punktlarida minengit va grippga qarshi zardob bilan emlandilar. Saudiya Arabistonida havo haroratining yuqori darajada bo‘lishi kuzatilayotganligini inobatga olib, shifokorlar guruhi tomonidan ziyoratchilarning salomatligini saqlash maqsadida eslatma va tavsiyalar ishlab chiqilib, tegishli tushuntirish ishlari olib borilmoqda.

O‘zbekistonlik ziyoratchilar uchun Madina shahrida “Masjid an-Nabaviy”dan 100 metr uzoqlikda joylashgan “Javharat ul-Asima”, Makka shahrida esa Haramdan 4500-5000 metr uzoqlikdagi to‘rt burjli “Abroj al-Muhammadiya” mehmonxonasi tayyorlab qo‘yilgan. Har bir xona muzlatgich, televizor, kir yuvish mashinasi hamda konditsionerlar bilan jixozlangan. 24 soat davomida zamonaviy avtobuslarda ziyoratchilarni Makka shahridagi xaram masjidiga tashish yo‘lga qo‘yiladi.

O‘zbekistonlik hojilar Madina shahrida 3 kecha - 4 kunduz bo‘lib, bu yerdagi muqaddas qadamjolarni ziyorat qilganlaridan so‘ng Makka shahriga yo‘l oladilar. Ziyoratchilarga mavsum davomida o‘zbekistonlik 25 nafardan iborat ishchi guruhi, 102 nafar guruh rahbari, 30 nafar shifokor va 10 nafar oshpaz xizmat ko‘rsatadi. Ziyoratchilar uchun Saudiyadagi mehmonxonalarda sun’iy yo‘ldosh orqali O‘zbekiston televideniyasi dasturlarini tomosha qilish, Vatanimizda bo‘layotgan voqealardan xabardor bo‘lish imkoniyatlari yaratilgan.

27 sentyabr - 8 oktyabr kunlari o‘zbekistonlik hojilarni “O‘zbekiston havo yo‘llari” Milliy aviakompaniyasi samolyotlarida Jidda-Toshkent, Jidda-Buxoro, Jidda-Samarqand, Jidda-Termiz Jidda-Namangan, hamda Jidda-Urganch yo‘nalishlari bo‘yicha Vatanimizga olib kelish rejalashtirilgan.

2015 yilda muqaddas Makka shahri va uning atrofida taxminan 1,5 mln kishi haj ibodatini ado etadi. Makkaga xorijdan 1,35 mln, mamlakatning ichki hududlaridan 185 ming nafar hojilarning kelishi kutilmoqda. Bugunga qadar esa taxminan 100 ming kishi qirollikka kelib ulgurdi. Muqaddas Makka shahridagi 2015 yilgi haj mavsumi 20 sentyabrda boshlanadi.

• Олдинги
• Кейинги