Муҳаммад - Британиядаги энг машҳур исм

Буюк Британия Миллий Статистика хизмати Англия ва Уелсда 2014 йили чақалоқларга энг кўп берилган исмлар рўйхатини эълон қилди. Бу ҳақдаги хабарда айтилишича, ўғил болалар орасида Оливер, қизлар орасида Амелия исми иккинчи йилдирки, Англия ва Уелсдаги энг машҳур номлар бўлган. Статистика хизмати маълумотлари бўйича ўтган йили 6649 ўғил чақалоққа Оливер, 5327 қиз чақалоққа Амелия деб от қўйишган. Бу ҳақда BBC ўзбек хизмати маълумот берди.

Исм-шарифни ҳисоблаб чиқиш пайтида бир ҳарфи ўзгарган бўлса ҳам бошқа ном деб ҳисоблангани айтилган. Агар мана шу фарқ инобатга олинмаса, Муҳаммад исми яна Британиядаги ўғил болаларнинг энг машҳур исми бўлган. Чунки қайсидир ота-она ўғлининг номини гувоҳномасига Муҳаммад, яна кимдир Мохаммед деб ёздиртирган.

2014 йили Муҳаммад исми 3588 чақалоққа, Моҳаммед 2536 чақалоққа, Моҳаммад номи эса 1116 чақалоққа қўйилган. Жами ўтган йили 7240 ўғил болага Муҳаммад исми берилган. Лондон шаҳрида ҳам 2014 йили ўғил болаларга берилган исмлар орасида ҳам энг кўпи Муҳаммад бўлган.

Миллий Статистика ташкилоти рўйхатида Жек, Ҳарри ва Жейкоб исмлари машҳурлиги қайд этилган. Қиз чақалоқлар орасида эса Оливия, Изла ва Эмили номлари кўп учраган.

* * *

Buyuk Britaniya Milliy Statistika xizmati Angliya va Uelsda 2014 yili chaqaloqlarga eng ko‘p berilgan ismlar ro‘yxatini e’lon qildi. Bu haqdagi xabarda aytilishicha, o‘g‘il bolalar orasida Oliver, qizlar orasida Ameliya ismi ikkinchi yildirki, Angliya va Uelsdagi eng mashhur nomlar bo‘lgan. Statistika xizmati ma’lumotlari bo‘yicha o‘tgan yili 6649 o‘g‘il chaqaloqqa Oliver, 5327 qiz chaqaloqqa Ameliya deb ot qo‘yishgan. Bu haqda BBC o‘zbek xizmati ma’lumot berdi.

Ism-sharifni hisoblab chiqish paytida bir harfi o‘zgargan bo‘lsa ham boshqa nom deb hisoblangani aytilgan. Agar mana shu farq inobatga olinmasa, Muhammad ismi yana Britaniyadagi o‘g‘il bolalarning eng mashhur ismi bo‘lgan. Chunki qaysidir ota-ona o‘g‘lining nomini guvohnomasiga Muhammad, yana kimdir Moxammed deb yozdirtirgan.

2014 yili Muhammad ismi 3588 chaqaloqqa, Mohammed 2536 chaqaloqqa, Mohammad nomi esa 1116 chaqaloqqa qo‘yilgan. Jami o‘tgan yili 7240 o‘g‘il bolaga Muhammad ismi berilgan. London shahrida ham 2014 yili o‘g‘il bolalarga berilgan ismlar orasida ham eng ko‘pi Muhammad bo‘lgan.

Milliy Statistika tashkiloti ro‘yxatida Jek, Harri va Jeykob ismlari mashhurligi qayd etilgan. Qiz chaqaloqlar orasida esa Oliviya, Izla va Emili nomlari ko‘p uchragan.

• Олдинги
• Кейинги