Қирғизистонда Шайх Муҳаммад Содиқ раҳимаҳуллоҳга бағишланган хотира китоби чоп этилди

Рукн: Янгиликлар Чоп этилган: 18.06.2015

Қирғизистоннинг Ўш вилояти, Қорасув туманидаги “Абдураҳмон ибн Авф” номли мадраса томонидан Шайх Муҳаммад Содиқ Муҳаммад Юсуф раҳимаҳуллоҳга бағишланган “Ҳазрат” китоби чоп этилди. Китобга замондош олим ва мухлисларнинг Шайх ҳақидаги хотиралари жамланган.

Китоб Шайх ҳазратларининг ҳаёти, илмий фаолияти, устозлари, шогирдлари, шамойиллари ҳақида бошланиб, у кишининг вафоти муносабати билан бир қанча давлатларнинг ҳамда машҳур уламоларнинг таъзиялари ҳам киритилган. Қирғизистонда ва Ўрта Осиёда машҳур бўлган олимлар Алоуддин Мансур, Чубак хожи Жалилов, Қодир Маликовларнинг ҳам самимий ўй-фикрлари ўрин эгаллаган. Китобда ўзбек тилидан ташқари қирғизча ва русча мақолалар ҳам жой олган.

Қирғизистонлик уламо, шайх Алоуддин Мансур ҳазратлари марҳум шайх Муҳаммад Содиқ Муҳаммад Юсуф роҳимаҳуллоҳни хотирлаб шундай ёзган:

"Шайх Муҳаммад Содиқ Муҳаммад Юсуфни илм аҳлигина яхши танийди. У киши илм толиблари ва барча халқ учун юқори ҳаракат билан шунча илмий мерос қолдирган бўлса-да, ўзидаги илмнинг ҳали учдан бирини ҳам тақдим қилиб бўлмаган эди. Мен мулоҳаза қилиб кўрсам, бундан тўрт аср муқаддам ўтган Мулла Алий Қорий 109 та асар қолдирган экан. Шайх Муҳаммад Содиқ эса 120 жилддан ортиқ асар ёзиб қолдирибди. У кишининг нақадар улкан дарахт бўлиб кетгани, йиқилганда яна-да сезилди".

1500 нусхада чоп этилган 312 саҳифалик китоб толиби илмлар ҳамда ҳазратнинг мухлислари томонидан ҳали сотувга чиқмасиданоқ сотиб олинди. Яқин кунларда бу китоб кўпроқ нусхада чоп этилиб, ҳалқимизга тақдим этилиши режалаштирилмоқда.

* * *

Qirg‘izistonning O‘sh viloyati, Qorasuv tumanidagi “Abdurahmon ibn Avf” nomli madrasa tomonidan Shayx Muhammad Sodiq Muhammad Yusuf rahimahullohga bag‘ishlangan “Hazrat” kitobi chop etildi. Kitobga zamondosh olim va muxlislarning Shayx haqidagi xotiralari jamlangan.

Kitob Shayx hazratlarining hayoti, ilmiy faoliyati, ustozlari, shogirdlari, shamoyillari haqida boshlanib, u kishining vafoti munosabati bilan bir qancha davlatlarning hamda mashhur ulamolarning ta’ziyalari ham kiritilgan. Qirg‘izistonda va O‘rta Osiyoda mashhur bo‘lgan olimlar Alouddin Mansur, Chubak xoji Jalilov, Qodir Malikovlarning ham samimiy o‘y-fikrlari o‘rin egallagan. Kitobda o‘zbek tilidan tashqari qirg‘izcha va ruscha maqolalar ham joy olgan.

Qirg‘izistonlik ulamo, shayx Alouddin Mansur hazratlari marhum shayx Muhammad Sodiq Muhammad Yusuf rohimahullohni xotirlab shunday yozgan:

"Shayx Muhammad Sodiq Muhammad Yusufni ilm ahligina yaxshi taniydi. U kishi ilm toliblari va barcha xalq uchun yuqori harakat bilan shuncha ilmiy meros qoldirgan bo‘lsa-da, o‘zidagi ilmning hali uchdan birini ham taqdim qilib bo‘lmagan edi. Men mulohaza qilib ko‘rsam, bundan to‘rt asr muqaddam o‘tgan Mulla Aliy Qoriy 109 ta asar qoldirgan ekan. Shayx Muhammad Sodiq esa 120 jilddan ortiq asar yozib qoldiribdi. U kishining naqadar ulkan daraxt bo‘lib ketgani, yiqilganda yana-da sezildi".

1500 nusxada chop etilgan 312 sahifalik kitob tolibi ilmlar hamda hazratning muxlislari tomonidan hali sotuvga chiqmasidanoq sotib olindi. Yaqin kunlarda bu kitob ko‘proq nusxada chop etilib, halqimizga taqdim etilishi rejalashtirilmoqda.