Рамазон мавсумида 1200 га яқин юртдошларимиз Умра зиёратида бўладилар

Рукн: Янгиликлар Чоп этилган: 06.07.2013

Дин ишлари бўйича қўмита Ахборот хизматининг маълум қилишича, жорий йилнинг 18 июль кунидан 10 август кунига қадар Умра сафарининг иккинчи босқичи ташкил этилади. Унда 1183 нафар юртдошларимизни Рамазон ойида (Тошкент-Жидда-Тошкент йўналиши бўйича 7 та рейс) зиёратларини ташкил этиш режалаштирилмоқда.

Дин ишлари бўйича қўмита, Ўзбекистон мусулмонлари идораси, мутасадди вазирлик ва идораларнинг ходимлари билан биргаликда кузатиш ва кутиб олиш тадбирларини уюшган ҳолда амалга оширилади.

Ўзбекистонлик зиёратчилар Мадина шаҳрида “Мавадда Нур” ва Макка шаҳрида “Бишора Мавадда” меҳмонхоналарига жойлашадилар.

Зиёратчилар Мадина шаҳрида 3 кечаю 4 кундуз бўлиб, бу ердаги муқаддас қадамжоларни зиёрат қилганларидан сўнг, Макка шаҳрида ўз ибодатларини давом эттирадилар. Зиёратчиларимизга Рамазон умра мавсумида ўзбекистонлик 2 та ишчи гуруҳ, 6 нафар шифокор ва 2 нафар ошпаз хизмат кўрсатади.

Ишчи гуруҳи томонидан зиёратчилар ибодати, овқатланиши (сахарлик ва ифторлик), тиббий хизматни юқори даражада ташкил этиш бўйича барча шароитлар яратилган.

Шу билан бирга, сафар мобайнида фуқароларимиз Макка ва Мадина шаҳарларидаги тарихий жойларни зиёрат қилишга муяссар бўладилар.  

Зиёратчиларни Жидда аэропортида кутиб олиш, кузатиш ва уларга шароит яратиш масалалари Жиддадаги Бош консуллик таркибида жорий этилган Ҳаж ва Умра масалалари бўйича атташе бошчилигида амалга оширилади.

* * *

Din ishlari bo‘yicha qo‘mita Axborot xizmatining ma’lum qilishicha, joriy yilning 18 iyul kunidan 10 avgust kuniga qadar Umra safarining ikkinchi bosqichi tashkil etiladi. Unda 1183 nafar yurtdoshlarimizni Ramazon oyida (Toshkent-Jidda-Toshkent yo‘nalishi bo‘yicha 7 ta reys) ziyoratlarini tashkil etish rejalashtirilmoqda.

Din ishlari bo‘yicha qo‘mita, O‘zbekiston musulmonlari idorasi, mutasaddi vazirlik va idoralarning xodimlari bilan birgalikda kuzatish va kutib olish tadbirlarini uyushgan holda amalga oshiriladi.

O‘zbekistonlik ziyoratchilar Madina shahrida “Mavadda Nur” va Makka shahrida “Bishora Mavadda” mehmonxonalariga joylashadilar.

Ziyoratchilar Madina shahrida 3 kechayu 4 kunduz bo‘lib, bu yerdagi muqaddas qadamjolarni ziyorat qilganlaridan so‘ng, Makka shahrida o‘z ibodatlarini davom ettiradilar. Ziyoratchilarimizga Ramazon umra mavsumida o‘zbekistonlik 2 ta ishchi guruh, 6 nafar shifokor va 2 nafar oshpaz xizmat ko‘rsatadi.

Ishchi guruhi tomonidan ziyoratchilar ibodati, ovqatlanishi (saxarlik va iftorlik), tibbiy xizmatni yuqori darajada tashkil etish bo‘yicha barcha sharoitlar yaratilgan.

Shu bilan birga, safar mobaynida fuqarolarimiz Makka va Madina shaharlaridagi tarixiy joylarni ziyorat qilishga muyassar bo‘ladilar.  

Ziyoratchilarni Jidda aeroportida kutib olish, kuzatish va ularga sharoit yaratish masalalari Jiddadagi Bosh konsullik tarkibida joriy etilgan Haj va Umra masalalari bo‘yicha attashe boshchiligida amalga oshiriladi.