“Энг гўзал ҳикоятлар-2” танловига марҳамат!

Рукн: Янгиликлар Чоп этилган: 27.04.2018

www.ziyouz.uz ва www.qadriyat.uz сайтлари “Энг гўзал ҳикоятлар-2” танловини эълон қилади. Танловда энг гўзал, ибратли ҳикоятлар таржималари ҳамда ўзингиз ҳаётда кўрган ёки яқинларингиз ҳаётида юз берган реал ибратли ҳикоялар билан иштирок этишингиз мумкин.

Танлов тартиби:

Танлов учун ўзингиз таржима қилган ҳикоят(лар)ни ёки ўзингиз ҳаётда кўрган, яқинларингиз ҳаётида юз берган ибратли реал ҳикоя(лар)ни чиройли баён қилиб Этот адрес электронной почты защищен от спам-ботов. У вас должен быть включен JavaScript для просмотра. почтасига юборинг. Материаллар 2018 йил 1 майдан 30 майга қадар қабул қилинади. Ғолиблар Рамазон ҳайити арафасида  эълон қилинади.

Танловга турли тиллардан қилинган таржималар қабул қилинади. Олимлар, буюк кишилар ҳаётидан ибратли лавҳалар маъқулланади. Интернет ўқувчиси учун қулайлик мақсадида қисқароқ ҳикоятлар танланса мақсадга мувофиқ.

Иштирокчилар юборадиган материаллар сони чекланмаган. Ғолибларни аниқлашда ҳикоятнинг мазмуни, долзарблиги, матннинг бадиий хусусиятлари, манбанинг ишончлилиги ҳам эътиборга олинади.

Танловга юборилган ҳикоялар www.ziyouz.uz ва www.qadriyat.uz сайтларида эълон қилинади.

Танлов талаблари:

1. Ҳикоя аввал бошқа манбаларда чоп этилмаган бўлиши керак. Буни Google қидирувчида текшириб олишингиз мумкин.
2. Ҳикоянинг манбаси ва муаллифи кўрсатилиши керак. Тўқима ҳикоялар қабул қилинмайди.
3. Ҳикоя ўзбек тилида чиққан турли манбалардан кўчирилмаган бўлиши керак.
4. Ҳикоя юборувчининг ўзи томонидан таржима қилинган бўлиши керак.
5. Ҳикоя қайси тилдан таржима қилинганлиги ҳам ёзилиши керак.

Ушбу китоблар ғолиблар орасида тақсимланади:

1. Шайх Муҳаммад Содиқ Муҳаммад Юсуф раҳимаҳуллоҳнинг 6 жилдли “Тафсири ҳилол”
2. Сафиюрраҳмон Муборакфурийнинг «Ар-Раҳиқул махтум» китоби
3. Шайх Муҳаммад Содиқ Муҳаммад Юсуф раҳимаҳуллоҳнинг 2 жилдли "Ислом тарихи" китоби (3 дона)
4. Аҳмад Лутфий Қозончининг 4 жилдлик "Саодат асри қиссалари" китоби
5. Зиёвуддин Раҳимнинг «Бахтли ҳаёт сари» китоби.

Қўшимча номинациялар ҳам ташкил этилиши мумкин. Танловга ҳомийлик масалалари бўйича Этот адрес электронной почты защищен от спам-ботов. У вас должен быть включен JavaScript для просмотра. почтасига мурожаат қилишингиз мумкин.

2016 йили ўтказилган “Энг гўзал ҳикоятлар” (329 та ҳикоя юборилган) ва “Энг ибратли ҳаётий ҳикоялар” (57 нафар муаллиф 93 та ҳикоя билан иштирок этган) танловларига юборилган ҳикоялар билан ҳам танишишингиз мумкин.

Танловга юборилган ҳикоялар (тўлдириб борилмоқда):

Аввало, Ватан! (туркчадан Абдуллоҳ Раҳимбоев таржимаси)
Ибодати ортса, ризқи ҳам ортади! (туркчадан Абдуллоҳ Раҳимбоев таржимаси)
Оқкўнгил одамлар орасида (Бердиқобил Худойқулов)
Ҳуқуқшуносликдан шайхликкача... (арабчадан Иброҳимхўжа Рихсихўжаев таржимаси)
Фойда бадалига тўлов (арабчадан Суннатуллоҳ Абдулбосит таржимаси)
Мўъмин Аллоҳнинг нури билан қарайди (арабчадан Муҳаммадий Абдураҳимов таржимаси)
Қимматли фатво (туркчадан Марям Осиё таржимаси)
Акси бўлиши мумкин эди (туркчадан Марям Осиё таржимаси)
Сенинг сиртинг кир, менинг эса – ичим (туркчадан Марям Осиё таржимаси)
Тахтдан тушиш (туркчадан Марям Осиё таржимаси)
Барибир шу ерга келади (туркчадан Марям Осиё таржимаси)
Майдон тулкиларга қолмасин (туркчадан Марям Осиё таржимаси)
Ўзини саҳобага тенглаган қори (арабчадан Робия Маннобжонова таржимаси)
Фитнес клубдаги қиз (инглизчадан Отабек Матқулов таржимаси)
Сулаймон ва гилам (туркчадан Абдуллоҳ Раҳимбоев таржимаси)
Султонга дарс берган қул (туркчадан Абдуллоҳ Раҳимбоев таржимаси)
Сизни, отамни ва ёқтирган оёқ кийимимни қолдириб келдим… (туркчадан Муҳаммад Мубийн таржимаси)
Қирмиз баргли оғочлар (Мансурхон Тоиров)
Паранжи (Мансурхон Тоиров)
Сўнгги сабоқ (Мансурхон Тоиров)
Тушдаги ташаҳҳуд (Абдулазиз Муҳаммад)
Фарзандингиз тарбиясини ўзингиз бузманг! (Умму Амина)
Отанинг ҳидоятига сабабчи бўлган қизалоқ (русчадан Шаҳбоз Раҳмонов таржимаси)
Фаришта (инглизчадан Фарангиз Салимова таржимаси)
Дурли маржон қиссаси (арабчадан Аъзамхон Абдураҳмонов таржимаси)
Бақлажондан ўзини тийган толиб (арабчадан Аъзамхон Абдураҳмонов таржимаси)
Ҳалолдан келган барака (арабчадан Аъзамхон Абдураҳмонов таржимаси)
Ширин кулчалар (Абдулатиф Абдуллаев)
“Ўз-ўзидан ясалган қайиқ” (туркчадан Абдулатиф Абдуллаев таржимаси)
Нодонликнинг давоси йўқ (туркчадан Абдулатиф Абдуллаев таржимаси)
Нажот қўнғироғини ким босган эди? (туркчадан Абдулатиф Абдуллаев таржимаси)
Отамнинг сабоғи (Абдулатиф Абдуллаев)
“Намоз вақти бўлди, тур!” (туркчадан Вазира Шодиева таржимаси)
Ҳазрат Али ва душмани (туркчадан Вазира Шодиева таржимаси)
Тақводор ўғри (арабчадан Робия Маннобжонова таржимаси)
Чол ва чегарачи (Акбаржон Абдулмажид)
Тарбия (Акбаржон Абдулмажид)
Учрашув (Акбаржон Абдулмажид)
Оқибат (Акбаржон Абдулмажид)
Мушук (Акбаржон Абдулмажид)
Ирқчиликка муносабат (русчадан Акбаржон Абдулмажид таржимаси)
Муштипар она дуоси (инглизчадан Отабек Матқулов таржимаси)
Савобнинг аълоси (Болтабой Муҳаммад Қурбон)
Бировники боришда, бировники келишда (Болтабой Муҳаммад Қурбон)
Абу Язид ва отаси (арабчадан Иброҳимхўжа Рихсихўжаев таржимаси)
Оқил самурай (русчадан Хуршид Нуруллаев таржимаси)
Дўстлик ёлғиз юрмайди (русчадан Хуршид Нуруллаев таржимаси)
Севгидан воз кечилмайди (русчадан Хуршид Нуруллаев таржимаси)
Бахт ва бойлик ҳақида (русчадан Хуршид Нуруллаев таржимаси)
Мевани билмаган қизалоқ (русчадан Хуршид Нуруллаев таржимаси)
Дунё — шайтоннинг моли (туркчадан Фатима Алий таржимаси)
Кар, Кўр ва Яланғоч (туркчадан Фатима Алий таржимаси)
Иймонни пулга сотиб олиб бўлмайди (туркчадан Фатима Алий таржимаси)
Яхшиямки, туғилган экансан, болам! (туркчадан Фатима Алий таржимаси)
Эҳтиётингни қил, ўғлим! (Муслим Мирзажонов)
Машаққатсиз ризқ истаган одам (туркчадан Вазира Шодиева таржимаси)
Тошбақа нега қисилиб қолди? (Гулчеҳрахон Абдуллаева)
Дард яқинлаштиради (туркчадан Марям Осиё таржимаси)
Маймун тузоғи (туркчадан Марям Осиё таржимаси)
Инсон нимага бақиради? (туркчадан Марям Осиё таржимаси)
Хўрозни ким бўғизлади? (Ҳожиаҳмад Умурзоқов)
Нуфайса нима ёки фақирлар хизматкори (туркчадан Вазира Шодиева таржимаси)
Қўли очиқ аёл (туркчадан Наргиза Атабаева таржимаси)
Мусо алайҳиссалом ва лочин қуши (туркчадан Наргиза Атабаева таржимаси)
Болалари оч қолган ота ва тиланчи (туркчадан Наргиза Атабаева таржимаси)
Бировга чоғ қазисанг, ўзинг тушасан (туркчадан Наргиза Атабаева таржимаси)
Аллоҳ ошиғи (туркчадан Наргиза Атабаева таржимаси)
Малак ва балиқ (туркчадан Наргиза Атабаева таржимаси)
Ризқ сендан, ё Раббим! (туркчадан Наргиза Атабаева таржимаси)
Ният пок бўлса… (Санжарбек Ҳамидов)
"Туҳфа"сини шарҳлади — қизига уйланди (туркчадан Марям Осиё таржимаси)
Ўйинчоқ она (туркчадан Марям Осиё таржимаси)
Мeнга бироз ўтин тўпланг! (туркчадан Фатима Алий таржимаси)
Қабрига қайта кирди (туркчадан Фатима Алий таржимаси)
Кибрнинг зарари (туркчадан Марям Осиё таржимаси)
Убунту (туркчадан Марям Осиё таржимаси)
Сукутнинг фойдаси (туркчадан Марям Осиё таржимаси)
Таваккул дарси (туркчадан Марям Осиё таржимаси)
Агар Аҳмад сeни чақирмаса (туркчадан Марям Осиё таржимаси)
Намозини кeчиктириб юрувчи йигит (туркчадан Фатима Алий таржимаси)
Яна бeш дақиқа (туркчадан Фатима Алий таржимаси)
Шайтонга ўхшаганлар (туркчадан Фатима Алий таржимаси)
Аёлимнинг иймони меникидан кучли экан (Зиёдулла Холиқов)
Миллатпарварлик (Фаррух Қурбонқулов)
Довулдан-да кучли (инглизчадан Отабек Матқулов таржимаси)
Бизга ўхшаб — биздан бўлмаган (туркчадан Марям Осиё таржимаси)
Итоатнинг меваси (туркчадан Марям Осиё таржимаси)
Тоғлардан қувватлироқ (туркчадан Фатима Алий таржимаси)
Биринчи муаллим (туркчадан Фатима Алий таржимаси)
Вақтида келган Аллоҳнинг ёрдами (Улуғбек Исмонов)
Чекишни тарк этган тасвирчи (арабчадан умму Ясмин ва Мустафо таржимаси)
Рамазон дуоси (арабчадан умму Ясмин ва Мустафо таржимаси)
Илмга бағишланган умр (Муҳсинжон Алимов)
Қувончдан ёшланган кўзлар (Муҳсинжон Алимов)
Онажоним, мени кечиринг (Сарвар Хуррамов)
Тобут (туркчадан Фатима Алий таржимаси)
Зарарли ҳарфлар (туркчадан Фатима Алий таржимаси)
Оқшомгача яшашимни билмасдим! (туркчадан Марям Осиё таржимаси)
3 филтр (туркчадан Марям Осиё таржимаси)
Қизим эшик очади (туркчадан Марям Осиё таржимаси)
Уламоларга эргашиш (арабчадан Абдулла Камолов таржимаси)
Сахийликнинг ажри (русчадан Ёқуб Умар таржимаси)
Машинани нега ўраб қўядилар? (русчадан Ёқуб Умар таржимаси)
Сахийлик учун 5 сабаб (русчадан Хуршид Нуруллаев таржимаси)
Уйлансамми, уйланмасамми? (русчадан Хуршид Нуруллаев таржимаси)
Мукаммал аёл (русчадан Хуршид Нуруллаев таржимаси)
Аёлнинг кўз ёшлари (русчадан Хуршид Нуруллаев таржимаси)
Она, қиз ва келин (русчадан Хуршид Нуруллаев таржимаси)
Кечиримли бўлиш (русчадан Хуршид Нуруллаев таржимаси)
Инсоннинг асосий бойлиги (русчадан Хуршид Нуруллаев таржимаси)
Кимни ўқитиш керак? (русчадан Хуршид Нуруллаев таржимаси)
Донишманднинг ҳайрон қолгани (русчадан Хуршид Нуруллаев таржимаси)
Бой берилган имкониятлар (русчадан Хуршид Нуруллаев таржимаси)
Бой ва камбағалнинг фарқи (русчадан Хуршид Нуруллаев таржимаси)
Биз сезмаган ёнимиздагилар (русчадан Хуршид Нуруллаев таржимаси)
Хуш кўрдик, ё Расулуллоҳ! (туркчадан Абдуллоҳ Раҳимбоев таржимаси)
Лоторея ишқибози ва жаннатий ҳид (Жалолиддин Исмоилов)
Пайғамбарнинг (с.а.в.) жаннатдаги ҳамроҳи (арабчадан умму Ясмин ва Мустафо таржимаси)
Ичимиздаги душман (туркчадан Марям Осиё таржимаси)
Эри бошига кўтарган аёл (туркчадан Марям Осиё таржимаси)
Қайтар дунё (туркчадан Фатима Алий таржимаси)
Табассум қил! (туркчадан Фатима Алий таржимаси)
Инсон ва дунё (туркчадан Фатима Алий таржимаси)
Қуръон зиёфати... бўлмади (Рустамжон Ҳусанов)
Туйнук соҳиби (арабчадан Абдулҳай Хушвақтов таржимаси)
Ўриндиқда қолдирилган тиллалар... (Нурбек Тошниёз)
Агар бир ой умрингиз қолса... (туркчадан Марям Осиё таржимаси)
Хунук қизга уйланиб пушаймон бўл(ма)ган йигит (туркчадан Марям Осиё таржимаси)
Шайтоннинг заиф нуқтаси (Абдулбосит Нусратуллаев)
Жаннатдаги иккинчи қаср кимники? (арабчадан Абдулбосит Нусратуллаев таржимаси)
Масжид қуришнинг мукофоти (арабчадан Абдулбосит Нусратуллаев таржимаси)
Ўғлим қандай ўлим топди? (туркчадан Марям Осиё таржимаси)
Адолат (туркчадан Марям Осиё таржимаси)

Мулоҳазалар   

#115 Qadriyat.uz 01.06.2018 12:44
Танловга юборилган ҳикоя

АДОЛАТ

Ҳали янги бошлаган офицантлик ишини яхши ўзлаштиролмаганини билдириб қўйгудек эди. Қанчалик ҳушёр ҳаракат қилсада ҳаяжондан қўл оёғи чалкашиб кетарди гўё. Лекин у аҳволини яхшилашга қаттиқ уринарди.
Денгиз тарафга қараган столга келган охирги гуруҳ буюртмаларини бергач, гуруҳдаги олифта, отасининг эркаси бўлган бир йигит бошқа оғайниларига эшиттириб, официантни ранжитадиган сўзлар билан мазахлади. Асаби бузилган официант бир буюртмани эсидан чиқарганди. Ўша олифта худди шу оқшом у билан ўйнашишни истагандай яна ҳақоратомуз гаплар айтганида баданидан муздай тер чиқиб кетди. Лекин сукут сақлашга мажбур эди.
Уйда касал онаси ва укаси бир бурда нонга зўр бўлиб кутаркан, бу бетарбияга ҳаддини билдирса ишидан айрилади. Кейин яна қийин кунлар тушади бечоранинг бошига. Сабр билан стол буюртмасини олиб борарди, лекин масхаромуз кулишлар ва тўхтовсиз илмоқли гаплардан мувозанатини сақлолмай, қўлидаги қаҳвани ўша столдаги бир аёлнинг устига тўкиб юборади.
Яна ўша такасалтанг бу сафар фурсат кутгандай, ҳақорат қила бошлайди, охирида кафе мудирини чақириб шикоят қилади. Йигит шунча ҳақорат ортидан, мудиридан ҳам озор кўргач шу аҳволида ташқарига чиқади ва бўғзига қадалган аччиқ алам, кўз ёшлари билан ишни тарк этади. Уйига тўғри юраркан, ёқасига тўғнағич билан маҳкамланган иш гувоҳномасини тўғнағичи билан бирга жаҳл билан катта йўлга отиб юборади.
Ярим соат кейин овқатланиб бўлган бу гуруҳ ресторандан чиқиб, келган машиналарига миниб кетишади. 20 дақиқадан кейин радиода бир хабар эълон қилинади.
"Қизил қимматбаҳо бир машина дара бошида ҳалокатга учради. Тўрт киши оғир яраланган. Ҳалокатга катта тезликда келаётган машинанинг балонига санчилган бир тўғноғич (игнаси) сабаб бўлгани аниқланди.

Туркчадан Марям Осиё таржимаси
Иқтибос олиш
#114 Qadriyat.uz 01.06.2018 12:44
Танловга юборилган ҳикоя

ЎҒЛИМ ҚАНДАЙ ЎЛИМ ТОПДИ?

Докторларнинг иш вақти тугаган маҳал бир ерда тўпланиб ўтирган уч доктор касалхона автотураргоҳидан бир машинага миндилар. Катта кўчага чиқаркан, бир фалокат устига бориб қолдилар. Шошилиб кетаётган бир йигит бирдан серқатнов йўлга отилиб чиққан, чапдан келаётган такси қаттиқ тормоз бериб аранг тўхтаган, айни тезликда ўнгдан келаётган машина уриб кетганди. Докторлар худди чақирилгандай айни пайтда машинадан отилиб ҳалокат жойига югурдилар. Қулоқ томоқ бурун шифокори йигитни елкасидан тутиб бироз суриб автомобил остидан чиқарди.
— Биродар, сенга қарайман, хавотир олма. Мен докторман.
Лекин тажрибасига таяниб, йигитнинг ҳаёти сўниб бораётганини тушунди.
— Калимайи шаҳодатни айт, биродар.
Орада кўз қовоқларини қимирлашини айтмаганда, ҳаёт аломати йўқ эди.
— Шаҳодат калимасини биласанми, "ашҳаду алла..."
Йигит тасдиқлагандай бошини секин пастга эгиб, "Ашҳаду..." деди эшитилар эшитилмас. Бошқа докторлар билан бирга эҳтиёткорлик билан кўтаришга уриндилар. Лекин бунга ҳожат қолмаганди. Оғир жароҳатланган йигит сўнги сўзи ўлароқ "Ашҳаду..." деб калимаи шаҳодатни айтиб жони узилганди. Докторлар зарур ҳужжат ишлари учун ўликхонага тўғри йўналган машина ортидан касалхонага бордилар. Йигитнинг чўнтагидаги гувоҳномаси орқали полиция топиб хабар берган, ота-онаси келганди. Ортиқча дод-вой қилишмади. Онаси унсиз йиғларкан, отаси ғамнок ҳолда сўради:
— Қандай бўлди, қандай ўлди ўғлим?
Қолган икки доктор кетганди. Йигитнинг охирги лаҳзаларига гувоҳ бўлган доктор тасалли бериб:
— Машааллоҳ амакижон, жуда насибадор ўғлингиз бор экан. Охирги нафасида шаҳодат келтирди. Уч доктор ҳаммамиз эшитдик. Соф мусулмон бўлиб, роҳатла кетди охиратга.
— Нима деяпсан сен-а? — деб ғазаби қўзиди отасининг. Она бир пас йиғисини тўхтатиб, чақчайган кўзлари билан бир докторга бир эрига қаради. Кейин эр-хотин касалхонадан чиқдилар. Бироздан кейин доктор ҳам кетишга тайёрланаркан, ўлган йигитнинг укаси келди. Масъуллардан, укасини охирги кўрган шу доктор эканини билганди.
— Мен эгизагиман. Қандай ўлди рости?
Доктор қандай ўлганини бироз тушунтирди. Кейин доктор ундан сўради:
— Хўш, қандай инсон эди эгизагингиз?
Қайғу, пушаймонлик ва севги аралаш бир табассум билан жавоб берди:
— Тилладай эди қалби, меҳр-муруввати кенг эди. Қизиғи биз арманимиз, лекин у Боснияда, Афғонистонда, Ироқда, Сурияда мусулмонларнинг ўлдирилишига қайғу чекарди, жуда хафа бўларди. Доктор, эгизагини билагидан тутиб тор ва узун йўлак бўйлаб юриб боришаркан:
— Исломга кўра охирги нафасида калимаи шаҳодатни келтирган киши покланиб кетади охиратга. Сенинг уканг иншааллоҳ гуноҳларидан покланиб кетди, — деди.

Туркчадан Марям Осиё таржимаси
Иқтибос олиш
#113 Qadriyat.uz 31.05.2018 10:44
Танловга юборилган ҳикоя

МАСЖИД ҚУРИШНИНГ МУКОФОТИ

Шом диёрида бир ҳукмдор ҳеч кимни шерик қилмасликни тайинлаган ҳолда масжид қуришни бошлабди. Масжид пештоқига ўз исмини ёздириб қўйибди. Куни келиб туш кўрибди. Осмондан бир фаришта тушиб, масжиддан унинг исмини ўчириб, бир аёлнинг исмини ёзиб кетибди.
Қурувчилардан кимдир шерик бўлдими, деб сўраса, ҳеч кимни шерик қилишмаётганини айтишибди. Бу тушни у иккинчи ва учинчи неча марта кўрибди. Ҳар гал осмондан бир фаришта тушар ва унинг исмини ўчириб, айнан бир аёлнинг исмини ёзиб кетар эди.
Ниҳоят ўша аёлнинг исмини ҳамма ёққа эълон қилиб, қидиришга тушибди. Бир кампир топилибди. Ундан “бу масжидни қуришга қандай ҳисса қўшдинг?”, деб сўрашибди.
— Ҳеч қандай ҳисса қўшмадим, қўшишга йўл қўймайсиз ҳам, қўшадиган молим йўқ, деб жавоб берибди кампир.
— Яхшилаб эслаб кўр, масжид қуришга қандайдир ҳисса қўшгансан...
Кампир яхшилаб эслашга ҳаракат қилиб, шундай дебди:
— Бир куни одатдагидай ўз йўлимдан кетаётган эдим. Қурилишга ғишт ташийдиган отларингиздан бирини ишчилар боғлиқ ҳолда қаровсиз қолдиришган экан. У эса чанқоқдан тили осилиб, ўлай деб турганди. Қарасам, челакда сув турипти. Бордиму, сувни унинг ёнига қўйдим.
Шунда ҳукмдор:
— Ҳа, сен бу ишингни фақат Аллоҳ учун қилдинг. Мен эса бу қурилишни Аллоҳ учун холис қилмадим, деди ва ўз исмини ўчиртириб, масжидга кампирнинг номини берди.

Арабчадан Абдулбосит Нусратуллаев таржимаси
Иқтибос олиш
#112 Qadriyat.uz 31.05.2018 10:44
Танловга юборилган ҳикоя

ШАЙТОННИНГ ЗАИФ НУҚТАСИ

Акам қўнғироқ қилиб, андижонлик дўсти ўз квартирасида олти юз доллар пулини йўқотганини айтиб қолди. Бирдан эсимга тушиб қолган усулни қўлладим… “Унга айтинг, бугун тунда бир соат нафл намоз ўқисин”, дедим акамга. Ярим соатча ўтгач, акам яна телефон қилиб, “пул топилибди, намоз ўқишга улгурмапти ҳам, лекин ният қилган экан”, деб айтди. Шунда мен акамга бу иш аслида менинг ақлимнинг маҳсули эмаслигини билдириб қўйиш учун бир неча йил олдин “Уқуд ул-жумон” китобида ўқиганим – Абу Ҳанифа роҳимаҳуллоҳ билан содир бўлган бир воқеани айтиб бердим…
Унга кўра, мазҳаббошимиз олдига келган киши олтинларини қаерга қўйганини эслолмаётганини айтганида у зот роҳимаҳуллоҳ “тонггача намоз билан қоим бўл”, дейдилар. Эртаси куни ҳалиги одам хурсанд бўлиб “ҳали кўп намоз ўқимасимдан туриб олтиннинг жойини эсладим” деб ташаккур айтади. Шунда Абу Ҳанифа роҳимаҳуллоҳ “шайтон тун бўйи намоз ўқишингга рози бўлмаслигини билардим, шукронасига ҳам тунни охирига етказиб қўймадингми ахир” деганларини айтиб, “дўстингизга айтинг, ният қилган намозини ўқиб қўйсин”, дедим. Аллоҳ Абу Ҳанифа каби буюк устозлардан рўзи бўлсин! Илм йўлида чархланган ақллари барча соҳада йўл кўрсата олади. Бизнинг вазифамиз эса бу умматнинг устозларини яхшилаб таниб олмоқдир.

Абдулбосит Нусратуллаев
Иқтибос олиш
#111 Qadriyat.uz 30.05.2018 14:02
Танловга юборилган ҳикоя

ТУЙНУК СОҲИБИ

Ибн Қотиба роҳимаҳуллоҳ ўзларининг "Уюнул ахбор" китобларида қуйидаги қиссани зикр қиладилар:
"Маслама ибн Абдулмалик бир қалъани қамал қилди. Бу қалъанинг деворида бир туйнук бор эди. Қалъани ҳеч фатҳ қила олишмагач, Маслама аскарларни бу туйнукдан кириб, дарвозани ичкаридан очишга ундади. Лекин ҳеч кимнинг бу тешикдан киришга юраги бетламади. Шу пайт қўшин ичидан бир киши чиқиб туйнукка кириб кетди ва дарвозани ичкаридан очди. Аскарлар бу одамни танишга улгурмай қолишди. Шундай қилиб, Аллоҳ уларни қалъани фатҳ қилишга сазовор қилди.
Қалъа фатҳ қилингач, Маслама қўшинга юзланиб: "Туйнук соҳиби қани?", деб нидо қилди. Ҳеч ким жавоб бермади. Сўнгра яна қўшинга нидо қилиб: "Мен қандай бўлмасин уни келтиришга азми қарор қилдим. Эй эшикоғаси, "Туйнук соҳиби"ни келган заҳотиёқ ҳузуримга олиб кир", деди.
Шундан сўнг эшикоғасининг олдига бир киши келиб: "Менга амирни олдига киришга руҳсат беринг", деди. Эшикоғаси унга: "Сен "Туйнук соҳиби"мисан?", деди. У: "Мен у ҳақида сизларга хабар бераман", деди. Эшик оғаси Масламани олдига кириб уни киришига изн сўради. Маслама изн берди.
Киши Масламанинг олдига кириб, шундай деди: "Туйнук соҳиби" сизларга учта шарт қўйди. Биринчиси, унинг исмини сўрамайсиз. Иккинчиси, уни мукофот олишга мажбурламайсиз. Учинчиси, уни қайси уруғдан, қайси шаҳардан эканлигини сўрамайсиз. Агар шу шартларга рози бўлсангиз, уни кимлигини айтаман". Маслама "Розиман", деди. Ҳалиги киши: "Ўша киши мен бўламан. Амирнинг сўзини икки қилиб, гуноҳкор бўлмаслик учунгина бу ерга келдим", деди.
Унинг шунчалар ихлосли эканлигидан Масламанинг кўзи ёшланди. Бу ҳодисадан кейин Маслама қачон намоз ўқийдиган бўлса шундай дуо қилар эди:
"Аллоҳим мени қиёмат куни туйнук соҳиби билан қилгин!".

Манба: Шайх Муҳаммад Аввома ҳафизаҳуллоҳнинг "Алмаълим улиршодия фи синоати толибил илм" китоби.
Арабчадан Абдулҳай Хушвақтов таржимаси
Иқтибос олиш
#110 Qadriyat.uz 30.05.2018 14:02
Танловга юборилган ҳикоя

ИНСОН ВА ДУНЁ

Баҳор фаслининг эрта тонги эди. Қуёш йилт-йилт қилиб олтин нурларини ер юзига беминнат сочар эди. Қуёшнинг латиф нурларидан илҳомланиб бир капалак пилласидан ёриб чиқди. Катта ва ҳафиф, нозик оппоқ қанотлари бор эди. Кўзларини очиб ўзини бир боғ гулларининг орасида кўрди. Қаддини ростлаб боғни бир учиб айланиб чиқди. Сўнгра дам олиш учун қизил гулга қўнди. Дам ола туриб қанотларини ўнг-у сўлга ёйиб сўнг бирлаштирди, атрофни кузатди. Боғни кенглиги, яшилликларидан роҳатланиб соатларча сайр қилди... Дам олиб етарли куч тўплаб олган эди. Энди сайр қилишнинг пайти ва олдинда кўп вақт бор эди. Дарахтларга учди. Гул япроқларига қўнди. Эркин, озод ва бахтли эди. Уни ким кўрса “Бунчалар ҳам чиройли бўлмаса?!” дейишар эди. Оқшомгача гулдан-гулга, дарахтдан-дарахтга қўниб учиб юрди.
Қуёш ботишида ичини ғалати бир ҳис қамраб олди, умри охирлаб қолганини тушуниб етди.
Фақатгина бир кундан иборат бўлган умри ниҳоялаб қолган эди. Сўнгги марта атрофни кузатди. Қуёш ботган томонга қараб кўзларини юмди ва бошқа ҳеч қачон уйғонмади!

Туркчадан Фатима Алий таржимаси
Иқтибос олиш
#109 Qadriyat.uz 30.05.2018 14:02
Танловга юборилган ҳикоя

ТАБАССУМ ҚИЛ!

Кичкина бир қизча мактабдан чиқиб уйига қайтаётганида йўлда жуда ҳам хомуш, маҳзун бир кишини учратиб, унга табассум қилди.
Нотаниш одам бу табассумдан сўнг ўзини яхши ҳис қила бошлади. Хафагарчилиги ҳам ариди. Кўп йиллар аввал бошига кулфат тушганида ёрдам қилган дўстини эслаб, унга бир мактуб ёзди.
Хатни олган дўсти эса кутилмаганда келган бу мактубдан қаттиқ хурсанд бўлганидан ўша куни ўзи овқатланган ресторан официантига кўп миқдорда чой-чақа берди. Берилган эҳсондан севина-севина уйига қайтаётган официант йўлда камбағал ва ниҳоятда очиққан бир одамга дуч келди.
Чўнтагига қўлини солиб ҳалигина эҳсон қилинган пуллардан бир қисмини олиб унга берди. Бечора одам эса сўнгги икки кун давомида ҳеч нарса емаган эди. Тезда яқин ўртадаги емакхонага кириб қорнини тўйғазди.
Аллоҳга беҳисоб шукрлар айтиб, ўзи яшаб юрган кўпқаватли бинонинг ертўласига кетаётганида, ёмғирдан ивиб кетган ва совуқдан дир-дир қалтираб ўтирган кучук боласини кўриб қолди.
Ташқаридаги совуқ эса этни жунжиктирар эди. Одам кучук боласини ертўлага олиб келди. Кучукча совуқдан паналангани учун жуда ҳам хурсанд бўлди. Ўша тунда бинода ёнғин чиқди, кучукча овози борича ҳура бошлади.
Аввалига у фақир кимса уйғонди ва қолганларни ҳам уйғотди. Шундай қилиб ёнғиндан ҳеч ким зарар кўрмади.
Шу кечада ёнғиндан қутилиб қолганлар орасида бир ёш бола ҳам бор эди. Ўша бола кўп йиллар ўтиб, давлат раҳбари бўлди ва мамлакатида кўплаб хайрли ва савобли ишлар қилди.

Туркчадан Фатима Алий таржимаси
Иқтибос олиш
#108 Qadriyat.uz 30.05.2018 14:02
Танловга юборилган ҳикоя

ҚАЙТАР ДУНЁ

Исо алайҳиссалом йўлда кетаётганларида, бир ёш йигитнинг кекса чолни тепкилай-тепкилай, судрагудек қилиб олиб кетаётганини кўрдилар. Исо алайҳиссалом қариянинг бу ҳолатига жуда ҳам ачиндилар. Югуриб бориб унга ёрдам бермоқчи бўлган эдилар, бироқ кекса киши бунга йўл қўймади ва деди:
— Майли, тегманг, ҳалал берманг, истаганича тепкиласин!
Бу ҳолатдан ҳайратланиб Исо алайҳиссалом сабабини сўрадилар.
Қария шундай деб жавоб берди:
— Мен ҳам бир вақтлар ўз отамни мана шундай тепкилаган эдим. Бу йигит менинг ўғлим бўлади. Мен отамга қандай муомала қилган бўлсам, бугун ўғлим ҳам менга айнан ўша муомалани қиляпти!

Туркчадан Фатима Алий таржимаси
Иқтибос олиш
#107 Qadriyat.uz 30.05.2018 14:02
Танловга юборилган ҳикоя

ИЧИМИЗДАГИ ДУШМАН

Отлиқ чашма бўйида ухлаб ётган бир кишининг оғзига илон кирганини кўрди. Таёқ билан уриб у кишини уйғотди. Дарахт остида чириган олмалар бор эди. Отлиқ унга, "бу олмаларни е", деб буюрди. Киши таёқ зарбидан қўрқиб, шунақа кўп олма едики, оғзидан қайтиб кела бошлади. Отлиққа қараб:
— Эй йўлчи, нима учун ҳеч сабабсиз менга чирик олмаларни едириб, зулм қилдинг? Сенга дуч крлганим нақадар бахтсизлик. Бир айб ва гуноҳ қилмаса, даҳрийга ҳам азият берилмайди.
Бу гапларига аҳамият бермаган отлиқ, у кишини қувишга тушди. Орқасидан қувиб уни югуртира бошлади. Одам йиғлаб-йиғлаб югурди. Ниҳоят кўнгли айниди ва ичидагиларни ҳаммасини қусди. Илон ҳам чиқди. Одам илонни кўриб жуда қўрқди ва вазиятни тушунди. Чеккан азобларини унутди. Отлиқ олдида уялиб:
— Эй йўлчи, сен фариштадай инсон экансан. Менга Аллоҳнинг раҳматисан. Сен мени бир она каби асрабсан, мен эса сендан ваҳший ҳайвондан қочгандай қочдим. Қандай бахт сени учратганим. Сен учун жоним фидо бўлсин. Мен сенга қаттиқ гапирдим. Эй буюк одам, сенга айтганларим бехабарлигим сабабидандир. Вазиятни бироз билсайдим, ёмон гаплардан тийилардим. Ортиқча гапларим учун мени кечир. Отлиқ шундай жавоб берди:
— Агар сенга илон қорнинга кирганини айтсам, илон заҳридан олдин, қўрқув сени ўлдирарди.

Жалолиддин Румийнинг “Маснавий”сидан
Туркчадан Марям Осиё таржимаси
Иқтибос олиш
#106 Qadriyat.uz 29.05.2018 10:45
Танловга юборилган ҳикоя

ХУШ КЎРДИК, Ё РАСУЛУЛЛОҲ!

Уйғонганида онаси намоз ўқиётган эди. Ўрнидан туриб, таҳорат олди ва онасининг ёнида туриб намоз ўқиди. Ҳали ёш бўлишига қарамай намозини ҳеч қолдирмасди. Авваллари отаси масжидга борганида уни ҳам олиб кетарди. Энди отаси йўқ. Бир кеча келиб отасини олиб кетишганди. Нимага олиб кетишганини ва қаерга олиб кетишганини айтишмаган эди. Онаси ҳар намоздан кейин кўз ёшлар ила қўлларини дуога очарди. У ҳам митти қўлларини кўтарар ва Аллоҳдан отасининг қайтишини сўрарди. Намоздан кейин онаси нонушта тайёрлади. Дастурхонда бир неча бўлак нон ва уч-беш дона зайтун бор эди. Новвойлар ишламас, дўконлар ёпиқ эди. Иқтисодий қамал бор эди. Авваллари очликка чидай олмай йиғлар, бақириб-чақирарди. Кейинчалик аста-секин ўрганиб ҳам қолган эди.
Бир кун онаси унга Пайғамбаримиз саллаллоҳу алайҳи васаллам ва саҳобаларининг ҳам оч қолганлари, Маккаликларнинг уларга 3 йил иқтисодий қамал қўллагани ва мусулмон болалари очликдан ўлгани ҳақидаги ҳикояни айтиб берди. Лекин шундай вақтда мусулмонлар сабр қилишарди. У ҳам сабр қилиши керак эди. Бошқа йиғламай қўйди.
Ҳамма мусулмонлар фақирми? Ер юзида миллиардлаб мусулмон бор эди. Нега улар ёрдам бермайдилар, қоринларини тўйдиришга етгудек таом жўнатмайдилар? Мусулмонлар биродар эмасми? Ажабо бутун мусулмонлар фақирми, уларнинг болалари ҳам очликдан йиғлашяптими? Ҳар ҳолда шундай бўлиши керак, бўлмаса албатта унга ёрдам қўлини чўзишарди.
Нонуштадан сўнг кийимларини кийди, сумкасини тайёрлаб ташқарига чиқди. Мактабга бориши керак. Ўртоқларини кўрмади. Демак кеч қолганди. Ўтган куни бир бомба тушиб, энг яқин ўртоғи Аҳмаднинг қўли узилганди. Аслида синфдошларининг кўпи ё оёқсиз, ё қўли йўқ эди. Юра бошлади. Бирдан қаттиқ овоз эшитди. Ер қимирлар, худдики қиёмат бошланган, атрофда туман кўтарила бошлади. Жуда қўрқди, қалтирай бошлади. Кейин ўртоғи Аҳмад ва бошқаларни кўрди. Аскарлар уларни таёқлар билан урар, ерга отиб тепкилашарди.
“... Отганингда сен отмадинг, Аллоҳ отди”. (Анфол сураси, 17 оят)
Кўча бошида танк турар эди. Уларнинг уйлари томон тўғри юриб келиб, пушкасини унинг уйига қаратди. Онаси уйда, ҳеч нарсадан бехабар. Танк ҳозир уйини яксон қиладиган, онасини ўлдиражак ҳолатда эди. Нима ҳам қила оларди, чорасиз атрофга қаради. Ниҳоят ердан бир тош олди ва танкка қарата отди. Шундай оят бор эди: “... Отганингда сен отмадинг, Аллоҳ отди”. Ана ўшани эслади ва отишда давом этди. Бирдан танасида бир иссиқлик сезди. Ўққа тутилганди. Оёғидан қонлар оқар, танаси ёнарди. Ерга йиқилди, қўлидаги охирги тошни ҳам отишни истарди. Ўша пайт, қаердан келганини англолмаган бир дайди ўқ, тўғри келиб кўксига қадалди. Вужуди парчаланган, ўқлар берган оғриқ ақл-хушидан жудо қилганди. “Али!” деган бир овоз эшитди, онаси эди. “Али! Али!” деб бақирар, фарёд қилиб боласи томон югурарди.
Кўзлари қорайди, кутилмаганда ям-яшил ва жуда гўзал жойни кўрди. Ҳар ёндан сувлар отилиб турарди. Ўйин ўйнаётган болалар бор эди. У ердаги ўйинчоқлар, ҳатто бадавлат яҳудий болаларида ҳам йўқ эди. Бу ер нақадар гўзал, анави қаршисидаги олдинроқ шаҳид бўлган ўртоқлари эмасми? Кейин отасини кўрди, отажон деб бақиришни истади. Отаси унга табассум қилди ва олдинда бир ҳовуз бошида ўтирган нур юзли зотга ишора қиларди. Сочлари елкаларига тушган, кулар юзли бу зот нақадар келишган инсон. У Аллоҳнинг расули, у Ҳайбар фотиҳи, у Фаластин халқининг, исми билан жўш урган, Фаластин халқи борлиғи билан севган Муҳаммад алайҳиссалом эдилар. Яқинлашди, у яқинлашгач Набий ҳам ўринларидан турдилар, табассум қилдилар ва қучоқларини очиб, шундай дедилар:
— Хуш келдинг, мужоҳид Али!
— Хуш кўрдик, Ё Расулуллоҳ!

Турк тилидан Абдуллоҳ Раҳимбоев таржимаси
Иқтибос олиш