“Китоб байрами”га марҳамат!

2013 йил 23-24 май кунлари Тошкент шаҳрининг Ғафур Ғулом номидаги истироҳат боғида Республика “Китоб байрами” тадбири бўлиб ўтади. Сайл тарзида ташкил этиладиган “Китоб байрами” очилиш маросимида иштирок этганлар нашриёт-матбаа ижодий уйлари ҳамда соҳада фаолият юритаётган етакчи нашриётлар томонидан ташкил этилган кўргазма стендларни томоша қилишлари мумкин.
Тадбирда республикамиз нашриётлари томонидан чоп этилиб, сўнгги йилларда турли халқаро нуфузли китоб кўргазмаларида совринли ўринларни қўлга киритган, Ўзбекистон ноширлари ва матбаачиларининг бугунги ижодий имкониятлари ва техник салоҳиятларини кўрсатадиган илмий-оммабоп, ижтимоий-сиёсий, маънавий-маърифий, адабий-бадиий ва болалар ҳамда ўсмирларга мўлжалланган китобларни намойиш қилувчи 20 дан зиёд кўргазма-стендлар ташкил этилади.
“Китоб байрами” доирасида мушоиралар ўтказилади. “Китобдан яхши дўст бўлмас”, “Китоб – оламнинг саккизинчи мўжизаси”, “Китоб – беминнат устоз” мавзуларида интеллектуал викториналар ташкил этилади. Байрамда китоб графикаси ва миниатюра жанрида ижод қилаётган ёш рассомларнинг ижодий кўргазмалари ҳам уюштирилади.
Республика “Китоб байрами” доирасида куннинг иккинчи ярмида Ўзбекистон Матбуот ва ахборот агентлигининг 300 кишилик мажлислар залида “Китоб – миллатнинг бебаҳо маданий мероси” мавзуида илмий-амалий конференция бўлиб ўтади. Унда “Ўзбекистон китобат санъати тарихидан лавҳалар”, “Ноширлик соҳасидаги муаммолар ва уларнинг ечимлари масалалари”, “Ўзбекистонда энциклопедик нашрларнинг ривожланиши”, “Бадиий графика санъатининг бугунги ривожи” каби мавзуларда маърузалар қилинади. Мазкур конференция доирасида Ўзбекистон Республикасининг “Вояга етмаганларнинг маънавий ва жисмоний ривожланишига салбий таъсир қилувчи ахборотлардан ҳимоя қилиш тўғрисида”ги Қонуни лойиҳасининг тақдимоти ҳам ўтказиш режалаштирилган.

2013 yil 23-24 may kunlari Toshkent shahrining G‘afur G‘ulom nomidagi istirohat bog‘ida Respublika “Kitob bayrami” tadbiri bo‘lib o‘tadi. Sayl tarzida tashkil etiladigan “Kitob bayrami” ochilish marosimida ishtirok etganlar nashriyot-matbaa ijodiy uylari hamda sohada faoliyat yuritayotgan yetakchi nashriyotlar tomonidan tashkil etilgan ko‘rgazma stendlarni tomosha qilishlari mumkin.
Tadbirda respublikamiz nashriyotlari tomonidan chop etilib, so‘nggi yillarda turli xalqaro nufuzli kitob ko‘rgazmalarida sovrinli o‘rinlarni qo‘lga kiritgan, O‘zbekiston noshirlari va matbaachilarining bugungi ijodiy imkoniyatlari va texnik salohiyatlarini ko‘rsatadigan ilmiy-ommabop, ijtimoiy-siyosiy, ma’naviy-ma’rifiy, adabiy-badiiy va bolalar hamda o‘smirlarga mo‘ljallangan kitoblarni namoyish qiluvchi 20 dan ziyod ko‘rgazma-stendlar tashkil etiladi.
“Kitob bayrami” doirasida mushoiralar o‘tkaziladi. “Kitobdan yaxshi do‘st bo‘lmas”, “Kitob – olamning sakkizinchi mo‘jizasi”, “Kitob – beminnat ustoz” mavzularida intellektual viktorinalar tashkil etiladi. Bayramda kitob grafikasi va miniatyura janrida ijod qilayotgan yosh rassomlarning ijodiy ko‘rgazmalari ham uyushtiriladi.
Respublika “Kitob bayrami” doirasida kunning ikkinchi yarmida O‘zbekiston Matbuot va axborot agentligining 300 kishilik majlislar zalida “Kitob – millatning bebaho madaniy merosi” mavzuida ilmiy-amaliy konferentsiya bo‘lib o‘tadi. Unda “O‘zbekiston kitobat san’ati tarixidan lavhalar”, “Noshirlik sohasidagi muammolar va ularning yechimlari masalalari”, “O‘zbekistonda entsiklopedik nashrlarning rivojlanishi”, “Badiiy grafika san’atining bugungi rivoji” kabi mavzularda ma’ruzalar qilinadi. Mazkur konferentsiya doirasida O‘zbekiston Respublikasining “Voyaga yetmaganlarning ma’naviy va jismoniy rivojlanishiga salbiy ta’sir qiluvchi axborotlardan himoya qilish to‘g‘risida”gi Qonuni loyihasining taqdimoti ham o‘tkazish rejalashtirilgan.

• Олдинги
• Кейинги